Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 13

Юи-ōвыл хōталыт

1Ӣсус ялпыӈ колныл кон-квāлнэ̄тэ порат акв ханисьтахтын юрт Тав нупылэ лāвыс:

– Ханисьтан хум! Сунсэн, манхурип āхвтасыт ос манхурип колыт!

2Ӣсус лāвыс:

– Ты яныг āхвтас колыт нупыл сунсэ̄н! Тāнанылныл тах акв āхвтас ат хульты, пуссын хот-сакватавет.

3Ӣсус Елеон ур алат ялпыӈ кол торыг ӯнлумēт Тав пāлтэ ханисьтахтын юртанэ Пēтр, Яков, Иоан ос Андрей ёхтысыт. Тāн китыглахтасыт:

4– Мāнавн лāвен, ты нак хунь ēмты, тав мāнырман пōс ōньси?

5Ӣсус тāнанылн лāвыс:

– Сунсым ōлэ̄н! Нэ̄мхотъютн ул вос лāплавēн.6Сāв хōтпа Ам намум ёт ёхтэ̄гыт ос лāвēгыт, эрттам Кристосы̄г ōлэ̄гыт. Сāв хōтпа лāплэ̄гыт.7Хōнтлан ōвыльтыт потыр манос потырохса хӯлнэ̄н порат — ул пилэ̄н. Ты вāрмалит тах пуссын ēмтэгыт. Ты юи-ōвыл хōтал āти.8Мир мир ля̄льт, хōн хōн ля̄льт хōнтлаӈкве патэ̄гыт. Сāвсыр мāт мā тōргуӈкве паты. Мāхум тэ̄тал саватпин патэ̄гыт. Ты āгмыӈ-мосыӈ пора ōвылтахты.

9– Ӯргалахтэ̄н! Нāн тах сутитаӈкве патавēн. Синагогат рāтуӈкве патавēн. Нāн Ам мāгсылум кӯсяйт ос хōныт э̄лы-пāлт тӯсьтавēн. Ам ōвылтытум потыртаӈкве тӯсьтавēн.10Ōвлэ̄т пуссын мир халт Ёмас Ля̄ххал потыртаӈкве ос хӯлтуӈкве э̄ри.11Тах сут э̄лы-пāлт лю̄льнэ̄н порат сāртын ул номсахтэ̄н, мāныр урыл потыртаӈкве патэгы̄н. Та сё̄ст манарыл мивēн, та урыл потыртэ̄н. Ялпыӈ Лылы нāн кӣврынт потырты, нāн хунь потыртэ̄гын.

12– Ягпыг ягпыге нупыл ос āсь ня̄враманэ нупыл сорум нарыгтэ̄гыт. Ня̄врамыт ся̄няныл-āсяныл нупыл квāлэгыт ос ся̄нь-āсяныл алыяныл.13Нāн мирн Ам мāгсылум лавыл нэ̄глуӈкве патавēн. Юи-ōвыл мус вēритан хōтпа вестхатахты.

Яныг саватпи пора

14– Хунь нāн пилисьмаӈ нак та мāт кāсалылы̄н, хōт ты ат рōви — Тōрум лāтыӈ тотнэ хум Данийл хумус лāвыглас — ловинтаӈкве хāснэ хōтпа ты ля̄ххалыт торгамтэ̄н! Тōнт Юдея мāт ōлнэ мāхумн нё̄рн оюӈкве э̄ри.15Та торыг кол алат хотъют ӯнлы-ке, пормасанэ мāгыс юв ул вос ся̄лты.16Тэ̄пкант хотъют рӯпитас-ке, маснут мāгыс юв ул вос ё̄ӈхы.17Āгмыл ōлнэ э̄кватын ос сяквыл тыттын э̄кватын яныг саватпи ēмты.18Пōйксēн, ты нак тэ̄лы ул вос ēмтнув.19Тōнт тах та яныг саватпи ēмты. Ань Тōрум ма-вит ӯнттуме пāсыл тамле нак ат ēмталāлыглас ос ат ēмты.20Тōрум та хōталыт ат мосьсямтасанэ-ке, тōнт ōлнэ мир пуссын та порсынувыт. Тав пēриям э̄лумхоласанэ мāгыс ты хōталыт мосьсяг вāрсанэ.21Тōнт нāнан хотъют ке лāви: “Сунсэ̄н, тыт-ты Кристос!” манос: “Кристос тот-та!” – ул агтэ̄н.22Та порат лāплахтын мāхум танкинāнаныл Кристосы̄г манос Тōрум лāтыӈ тотнэ хумы̄г ловиньтыя̄ныл. Тāн сāвсыр пōсыт ос ōлыглаттāл накыт сусылтаӈкве патэ̄гыт, Тōрумын пēриим хōтпат лāплан мāгыс.423Сунсэ̄н! Мāныр э̄лаль ēмты, Ам нāнан пуссын та лāвсум.24Ты саватпи юи-пāлт “хōтал турманлы, э̄тпос постуӈкве ат паты.25Совтыт тōрум харныл ёл-патыглэ̄гыт, тōрум ё̄ранэ торгэ̄гыт”.26Тōнт мāхум Э̄лумхōлас Пы̄г кāсалыяныл, тулыт халт, сāв ё̄рэ ёт.27Тōнт тах Тав ангеланэ кēтыянэ ос нила мā ēр пāлныл ос тōрум ēр пāл мус ос пēриям мāхманэ акван-атыя нэ.

28– Смоковница-йӣвныл ханисьтахтэ̄н: тав тованэ кāминьты̄г ēмтнэ порат лӯптатал нэ̄главе. Нāн ань ваглы̄н, мосēртын туиӣг ты ēмты.29Тыт ōс тох: хунь касалылын, пуссын Ам лāвмум сирыл ēмтуӈкве паты, вāглы̄н, ань юи-ōвыл хōталыт ты ёхтысыт.30Сōль нāнан Ам лāвēгум: ты нак ēмтнэ э̄лы-пāлт ты э̄лумхōлас рут ат холы.31Мā ос тōрум холэ̄г, туп Ам лāтӈанум ат холэ̄гыт.

Хōтал ос сё̄с ат вāвēг

32– Ты нак хунь ēмты, хоты хōтал ос манах сё̄с порат, нэ̄мхотъютн ат вāве. Тōрум Пы̄г ос ангелыт ōс ат вāганыл. Тōрум Āсь та сё̄с туп вāгтэ.33Сунсэ̄н! Ост ōлэ̄н! Пойксēн! Нāн ат вāглын, хоты порат ты нак ēмты.34Та ӯрнэ вāрмаль ань э̄лумхōлас э̄лы лё̄ӈхын миннэ вāрмаль хурип. Тав колэ мēтхумиянэ̄н хӯлитэ. Кāсыӈ мēтхум такви вāрмалил мыгтэ, āви похат лю̄льнэ хум āви ӯргалаӈкве хӯлитэ.

35– Сунсэ̄н! Ост ōлэ̄н! Нāн ат вāглын кол кӯсяйн хунь ювле-ёхты: э̄типāлаг, э̄т-котильт, сиськурек рōхнэ порат, манос хōтал нэ̄глын порат.36Нāн Таве ат ӯрнэ̄н торыг ул ёхтавēн, ӯрхатэ̄н, ёл ул вос ойлматавēн.37Ам нāнан ōс аквсёс лāвēгум: ӯрхатым ōлэ̄н!


предыдущая глава Глава 13 следующая глава