Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 12

Хумус акв хум винограднике мōт мāхмытн хӯлистэ

1Мāхум Ӣсусын ханисьтан потрыл ханисьтаӈкве патвēсыт.

— Акв хум виноград ӯнттыс. Винограднике пӯсасыл вāрыстэ. Пил ялыглан вōӈха хилыс, ос тэ̄панэ ӯрнэ карыс кол ӯнттыс. Тувыл винограднике янмалтан хумытын хӯлистэ ос такви мōт мāн минас.2Виноград вāтнэ пора ёхтыс. Акв мēтхумитэ кēтыстэ, яныгмам виноград пиланэ тав мāгсыле виӈкве.3Виноград янмалтан мāхмытн мēтхумитэ пуввес, рāтвес ос тāтыл кāтыл кон-ня̄влувес.4Тōнт кӯсяй хум китыт мēтхумитэ кēтыс. Китыт мēтхуме кэ̄лпыг рāтвес ōс кон-ня̄влувес.5Кӯсяй ань хӯрмит мēтхумитэ кēтыс, та мēтхуме сяма алвес. Кēтыглам мōт мēтхумиянэ ōс ратвēсыт. Тōва сяма алвēсыт.6Кӯсяй хум ань сымēн э̄рнэ акв пы̄г ōньсис. Юи-ōвылт пыге та кēтыстэ, тох номсыс: “Ам пыгумныл тāн эсырман патэ̄гыт”.7Виноград янмалтан хумыт пыге кāсаламанылт, номылматсыт: таве алылув, винограднике тах мāнавн хульты.8Тāн ань пы̄г пӯвумтасаныл, сяма алсаныл ос кāрта коны-пāлн лысаныл.

9— Ань кӯсяй мāныр вāри, хунь ты вāрмаль хӯлытэ? Тав ёхты, виноградникт рӯпитан мāхум сяма алыянэ ос винограднике мōт мāхумн мыгтэ.10Нāн мāн ты ōвылтыт Нэ̄пакт ат ловинталсы̄н-а:

“Кол ӯнттын хумытн хоты āхвтас

хот-вуськасавес, та āхвтас кол сāм яныг

āхвтасыг ēмты!

11Тамле вāрмаль Тōрумныл юв.

Мāн сустēвт ты сяр хасьтал вāрмаль”.

12Тōнт пӯп-ōйкат Ӣсус пувуӈкве таӈхысаныл, тӯп ань мирныл пилсыт. Тāн торгамтасаныл: Ӣсус ты ханисьтан потрēт тāн уранылт потыртас. Тāн Тавēныл пōхан-минасыт.

Хōн мāгыс атнэ пōт

13Ётыл тāн Ӣсус пāлт китыглахтан осьмарыӈ лāтыӈ ёт фарисейт ос иродианыт кēтсаныл. Таве пувнэ мāгыс тāн матыр киссыт.14Тāн Ӣсус пāлт ёхтысыт ос китыглахтасыт:

— Ханисьтан хум! Мāн вāглув, Наӈ вēскаты̄г ōлэгы̄н. Наӈ хумыт вӣльт ля̄льт ат сунсэ̄гын. Наӈ тӯп Тōрум лё̄ӈх сирыл макы̄г мир ханисьтыя̄нын. Мāнавн лāвен, хōнын пōт ōйтуӈкве рōви маносāти? Мāнавн пōт миӈкве э̄ри ман āти?

15Ӣсус вāстэ тāн кит-вильтупы̄г мāхум, ань тāнанылн лāвыс:

— Āнум манры̄г āрталылы̄н? Ам палтум динарий олнкер тотэ̄н!

16Ӣсус палт олнкер тотвес. Тав китыглахтас:

— Тыт хотъют пōслым ōлы? Хотъют нам тыт хансым ōлы?

— Тыт хōн пōслым ōлы, — тāн лāвсыт.

17– Хōн мāныр ōньси, хōны̄н маелы̄н. Тōрум маныр ōньси, Тōрумн маелы̄н, – Ӣсус тāнанылн лāвыс.

Тāн Тавēтыл сака осятахтыгласыт.

Нэ̄ тотнэ урыл ос сорум патнэ хōтпа нōх-ялтнэ урыл

18Ӣсус пāлт саддукейт ёхтысыт. Тāн сорум патнэ хōтпа нōх-ялтнэ накын ат агтсыт, Таве китыгласаныл:

19– Ханисьтан хум! Моисей ты лāвыглас: ня̄врамтāл хум сорум патнэ̄тэ юи-пāлыт э̄кватэ āпситэ̄н нэ̄г тотуӈкве э̄ри. Тасыр кол э̄лаль рӯтмалтаве.20Акв сēмьят сāт пы̄г ōлсыт. Ōвыл хумияныл нэ̄ тотыс. Тувыл сорумн та патыс.21Ня̄врамтāл холас. Тōнт тав нэ̄тэ апситэ̄н тотвес. Āпситэ ōс ня̄врамтāл сорумн патыс. Ань хӯрмит āпсияныл ōс акв тох ēмтыс.22Сāт пы̄г та э̄ква пуссын нэ̄г тотыглалсаныл, ня̄врам ат хӯльсыт. Юй-ōвылт та нэ̄ ōс сорумн патыс.23Хумус ēмты, ань сорумн патум хумыт хунь нōх-ялтэ̄гыт? Хоты хумияныл нэ̄гыг тав ēмты тах? Тāн пуссын тавēн хумы̄г ōлсыт.

24Ӣсус тāнанылн лāвыс:

– Нāн хансым Нэ̄пакыт ос Тōрум ё̄р ат вāганы̄н, таимāгыс мори похтэ̄гы̄н.25Нōх-ялтнэ хōтпат нэ̄ ат тотэ̄гыт, хум ат вāрегыт. Тāн ангелыт хольт тōрумт ōлуӈкве патэ̄гыт.426Нōх-ялтнэ нак урыл таи лāвēгум. Нāн ман та урыл Моисей Нэ̄пакт ат ловиньтāлыслын-а, хōт ань Тōрум нāйын тэ̄нэ талква нирт халныл лāвыс: “Ам — Авраам Тōруме, Исаак Тōруме ос Яков Тōруме”?27Тав ман сорумн патум мāхум Тōрум āти, Тав лылыӈ хōтпат мāгыс Тōрмыг ōлы! Нāн мори похтэ̄гын.

Тōрум сяр ōвыл сāкконэ

28Сāккон тотнэ акв хум ты потраныл ōс Ӣсус ёмсякв ювле лāвме хӯнтлас. Тувыл тав китыгластэ:

– Тōрум лāвум хоты лāтыӈ сяр ōвыл сāкконы̄г ōлы?

29Ӣсус лāвыс:

– Тōрум сяр ōвыл сāкконэ тамле: “хӯнтлэ̄н Израиль мā мир! Мāн Кӯсяюв коны-пāл воссы̄г нэ̄мхотты Тōрум āти30Нāнки Кӯсяйӣн сымыӈы̄г, номтаны̄н ос ё̄раны̄н пиным э̄руптэлы̄н”.31Тōрум китыт сāкконэ тамле: “Нāнкинāнын э̄руптанэ̄н хольт ляпа-хōтпан э̄руптэ̄лын”.

32– Наӈ ёмсякв лāвсын, – сāккон тотнэ хум лāвыс. – Тōрум аква ос мōтсыр Тōрум воссы̄г āтим.33Таве сымыл э̄руптаӈкве э̄ри, номтыл э̄руптаӈкве э̄ри, ё̄рыӈы̄г-вāгыӈы̄г э̄руптаӈкве э̄ри, ляпа-хōтпан нāӈки хольттылын э̄руптэ̄лын. Ты нāйл ос йирхатнэ вāрмалитныл сяр яныг вāрмаль34Ӣсус сунсы, ань сāккон тотнэ хум Таве ёмсякв торгамтастэ. Тувыл тавēн лāвыс:

– Наӈ Тōрум ōлнэ хōн-мā ляпат ōлэ̄гын.

Та пāсыл Ӣсус воссыг нэ̄мхотьютын ат китыглалвес.

35Ӣсус мир э̄лаль ханисьтаме порат ялпыӈ колт лāвыглас:

– Сāккон тотнэ хумыт манры̄г āкваг тох лāвēгыт, эрттам Кристос – Давид-хōн пы̄ге?36Давид-хōн такви, Ялпыӈ Лылыл вуим лāвыс:

“Кӯсяй ам Кӯсяюм нупыл лāвыс:

Ам ёмаспал кāтум Наӈ та пора мус унлэн,

хунь Наӈын лавыл нэ̄гыттан мāхум

Наӈ лāглагын э̄лы-пāлт ёл-патэгыт”.

37Давид Таве Кӯсяйг намантэ-ке, Тав Давидын пы̄гы̄г ōлуӈкве хумус вēрми?

Мāхум Ӣсус лāтӈыт сымыӈысь хӯнтлысаныл.

38Ӣсус мāхум э̄лаль ханисьтасанэ:

– Сāккон тотнэ хоса маснутыӈ хумытныл пилым ōлэ̄н! Тāнанылн мӯсты хунь мирыӈ мāт тāн ётаныл мāхум пасялахтэ̄гыт.39Синагогат тāн э̄лы-пāлт лю̄лнэ уласыт тāрмыл ӯнлуӈкве таӈхēгыт. Тэ̄нэ-айнэ пасан вāрнэ колт тāн ōс ёмас мāт ӯнлэ̄гыт.40Тāн хумияныл порсум нэ̄т тэ̄пыӈ коланыл тэ̄ганыл-аияныл. Тувыл ань мир сунснэ торыг намыл хоса та пōйксēгыт. Тамле мāхум тах сака яныг саватпин ёхтавет.

Нуса нэ̄ йир тотме урыл

41Ӣсус йир пиннэ хусап торыг ӯнлыс. Тав сунсыс мāхум хумус йир пинэ̄гыт. Сёлыӈ мāхум сāв олн пиныгласыт.42Ōйкатэ порсум нуса нэ̄ кит аргин олнкēр пиныс.43Ӣсус ханисьтахтын юртанэ ляпан вōвсанэ ос тāнанылн лāвыс:

– Ты нуса нэ̄ мōт мāхумныл сāвнув олн пиныс.44Олн пинум мāхум арыг олнаныл пинсыт. Нэ̄ такви нусатэ̄ныл пиныс. Тав ōлупсатэ мāгыс ōньсюм юи-ōвыл олнанэ — пуссын та мисанэ.


*а 12:18 саддукей – религия ос политика партияныл э̄лумхōлас


предыдущая глава Глава 12 следующая глава