Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 11

Ӣсус Иерусалим ӯст ōлы

1Иерусалим ӯс похат Елеон ур Виффагия ос Вифания пāвлы̄г ӯнлысы̄г. Ӣсус ханисьтахтын хумиянэ ёт тыг ёхтумēт кит юртаге э̄лаль кēтсаге.

2Тав тэ̄натэ̄н лāвыс:

— Минэ̄н э̄лаль ōлнэ пāвылн. Пāвылн сялтэгы̄н тах, ёл-нэ̄гим мāнь осёл нēвыр кāсалэгы̄н. Тав сы̄сэ тāрмыл нэ̄мхотъют иӈ ат яласас. Осёл нēвыр хот-пēстэлын, тыг вāнттэлы̄н.3Китыглаӈкве-ке патавēн, мāныр вāрегы̄н, нэ̄н лавēн — осёл нēвыр Кӯсяйн э̄ри. Тав тах нāнан ювле-мӣве.

4Ханисьтахтын хумы̄г минасы̄г, пӯсас āви пōхан нэ̄гим осёл нēвыр хонтыстэ̄н. Тэ̄н нēвыр хот-пēстуӈкве патыстэ̄н.5Тот лю̄люм тōва мāхум китыглахтуӈкве патсыт:

— Нэ̄н мāныр вāрэгы̄н? Осёл манры̄г хот-пēстылы̄н?

6Хумы̄г Ӣсусын лāвиматэ̄н сирыл ювлэ-лāвсы̄г. Тōнт мāхумн тэ̄н ювле-тāртвесы̄г.

7Тэ̄н осёл нēвыр Ӣсус палт вāнттыстэ̄н. Маснутанэ̄н осёл нēвыр тāрмыл пинсанэ̄н, ань Ӣсус нēвыр сыс тармыл тāлыс.8Сāв мир Ӣсус йинэ лё̄ӈх маснутыл нортыгласаныл, йӣв товыл пантыгласаныл.9Ӣсус э̄лы-пāлт ос юи-пāлт йинэ мāхум рōӈхувлāлсыт:

Осанна!

Тōрум Кӯсяй наме ёт ёхтынэ хōтпа янытлым ōлы.

10Давид-хōн асюв хōн-мāтэ янытлым вос ōлы!

Осанна нумит!

11Ӣсус Иерусалим ӯсн ёхтыс ос ялпыӈ колн минас. Тав тот пуссын янытэ̄т сунсыгластэ. Э̄тыпāлаг ēмтыс. Китхуйплув ханисьтахтын юртанэ ёт Вифания пāвылн минас.

Ӣсус ос смоковница-йӣв

12Ётыт хōтал, Вифания пāвылныл миныманылт Ӣсус тэ̄тал ōлыс.13Тав иӈ э̄лыл смоковница-йӣв кāсалас. Та йӣв лӯптаӈ ōлыс. Тав та йӣв ляпан минас, сунсыглахтас, тэ̄нэ пил ōньси ман āти. Ань йӣв тӯп лӯптат ōньсис. Инжирыт яныгман пораныл иӈ ат ēмтыс.14Тōнт Ӣсус йӣв нупыл лāвыс:

— Вос наӈынныл нэ̄мхотъют нэ̄мхуньт пил ат тэ̄г!

Ханисьтахтын хумиянэ ты лāтӈыт хӯлсаныл.

Ӣсус тыналахтын мāхум ялпыӈ колныл кон-ня̄влы

15Ӣсус Иерусалим ӯсн ханисьтахтын юртанэ ёт ёхтыс ос ялпыӈ колн ся̄лтыс. Тав тыналахтын ос ёвтхатнэ мир ялпыӈ колныл кон-ня̄влысанэ. Олын пēнтутыт пасананыл ос голубь уй тыналан мāхум уласаныл мори пāхвтысанэ.16Ялпыӈ кол āви ултта пормас тотыглаӈкве ат тартахтас.

17Тав тāнаныл ханисьтасанэ:

— Хансым ман ат ōлы: “Ам колум мир пуссын мāгыс пойксян колы̄г лāвуӈкве патаве”. Нāн ты кол хорахсит вōӈхāг вāрыслы̄н.

18Пӯп-ōйкат ос сāккон тотнэ хумыт ты урыл хӯлманылт номсахтуӈкве патсыт, Ӣсус хумус алуӈкве. Тав ханисьтан вāрмале ань мирн сака э̄руптавес, таимāгыс пӯп-ōйкат ос сāккон тотнэ хумыт Тавēныл пилсыт.19Э̄типāлаг Ӣсус ханисьтахтын хумиянэ ёт ӯсныл пōхан минас.

Тӯв-тōсум смоковница-йӣв

20Āлпыл, ё̄миманыл, тāн кāсаласаныл, смоковница-йӣв тāранэ мус тӯв-тōсум.21Тōнт Пēтр Ӣсус лāтӈанэ номылматастэ ос лāвыс:

Рāвви! Сунсэн! Наӈ лāвум лāтӈын сирыл смоковница-йӣв тӯв-тōсум!

22Ӣсус лāвыс:

— Тōрумн агтэ̄н!23Ам нāнан сōль лāвēгум: нāн ты ур нупыл лāвуӈкве вēрмегы̄н: “Нōх-лю̄лэн ос ся̄рысьн лайхатэн!” Сыме ёлы-пāлт агты-ке — тав лāтӈэ сирыл ēмты. Тōнт мāныр лāви — тох ōс ēмты.24Таимāгыс Ам нāнан лāвēгум: пуссын мāныр пойксянэ̄н порат вōвегы̄н — агтэ̄н мивēн, ос тох та ēмты.25Пойксянэ̄н порат хотъют нупыл матыр кант ōньсегы̄н-ке, хот-ёрувлэ̄лын. Тōнт Тōрум Āсин нāн кареканы̄н ōс хот-ёрувлыянэ.26Кант ат ёрувлыянын-ке, тōнт Тōрум Āсин нāн кареканы̄н ōс ат ёрувлыянэ.

Ӣсус ё̄ре урыл пӯп-ōйкатын хумус китыглаве

27Ӣсус ханисьтахтын хумиянэ ёт Иерусалим ӯсн ёхтыс. Ялпыӈ колт ōлмēт Тав палтэ пӯп-ōйкат, сāккон тотнэ хумыт ос матум э̄руптан ōйкат ёхтысыт,28Таве китыгласаныл:

— Наӈ ты вāрмалянын пуссын мāныр ё̄рыл вāрия̄нын?

— Наӈын тысыр вāруӈкве ты ё̄р хотъют мис?

29Ӣсус лāвыс:

— Ам ос нāнан китыглыя̄нум. Āнумн лāвēн, тōнт Ам ос лāвēгум, мāнырман ё̄рыл Ам ты вāрмалит вāрēгум.30Иоан витыл пēрнал пиннэ вāрмале хотыл ōлыс? Э̄лумхōласныл манос Тōрумныл?

31Тāн тāнки халанылт номсахтуӈкве патсыт:

— Лāвев-кē Тōрумныл, Тав тах китыглахты: “Тох ке ōлы, нāн манры̄г тавēн ат агтсын?”

32— Манос лāвēв э̄лумхōласныл ōлы?

Тāн ань мирныл пилсыт. Мирн Иоан Тōрум лāтыӈ тотнэ хумы̄г ловиньтавес.33Таимāгыс тāн ювле-лāвсыт:

— Ат вāглув.

Ӣсус лāвыс:

— Тасыр-ке, Ам ōс нāнан ат лāвегум, мāныр ё̄рыл Ам ты вāрмалит вāрия̄нум.


*а 11:9 осанна — ты еврей лāтӈыл: “Вестэн, нё̄тэн! Ургалэн!”

*б 11:12 смоковница — ты инжир-йӣв, тав яныг атыӈ пил ōньси

*в 11:21 равви — ты еврей лāтӈыл ханисьтан хум

*г 11:25 Тōрум Āсь — ты Тōрум


предыдущая глава Глава 11 следующая глава