Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 10

Ӣсус нэ̄ тотнэ ос китты̄г миннэ урыл потырты

1Та мāт хультуптаме юи-пāлт Иордан я̄ мōт пāлныл Ӣсус Юдея мāн ёхтыс. Тав пāлтэ ōс мир атхатас. Тав тāнаныл э̄лаль ханисьтаӈкве патсанэ.2Ӣсус палт фарисейт ёхтысыт. Тāн Таве сāвсыр лāтӈыл пувумтаӈкве ēмталасаныл:

— Нэ̄г-хумы̄гн китты̄г минуӈкве рōви манос āти?

3Ӣсус ювле-китыглахтас:

— Нāнан Моисей сāккон сирыл мāныр вāруӈкве э̄ри?

4Тāн лāвсыт:

— Моисей китты̄г минуӈкве тартахтыглас. Китты̄г миннэ нэ̄пак хумытэ̄н хансуӈкве э̄рыс. Тувыл хумн нэ̄тэ хулю̄ӈкве рōвыс.

5Ӣсус лāвыс:

— Нāн кāнтыӈ лю̄ль сыманы̄н мāгыс Моисей нāнан тамле сāккон хӯлис.6Мā-вит ӯнтум пāсыл Тōрум хум ос нэ̄ вāрыс.7Таимāгыс хум ся̄няге-āсяге хӯлияге, э̄кватэ̄нт аквъёт ōлуӈкве патэ̄г.8Тэ̄н аквтуп акв пуӈк, акв нё̄выль. Тэ̄н кит хōтпāг ат ōлэ̄г. Тэ̄н акв хōтпаг ēмтэ̄г.9Тōрумн маныр акван тотыс, э̄лумхōласын китты̄г тотуӈкве ат рōви.

10Ётыл ханисьтахтын хумиянэ ты урыл ōс китыглахтасыт.11Ӣсус тāнанылн тох лāвыс:

— Хотъют нэ̄тэ ёт киттыг мины, мōт нэ̄ тоты, та хум акв пуӈк акв нё̄выл хот-сакваты.12Нэ̄ хумитэ ёт китты̄г ке мины, тав ос акв пуӈк, акв нё̄выл хот-сакваты.

Ӣсус ня̄врамыт пускāтыл-пуслāглыл э̄лаль ōлуӈкве лāвиянэ

13Мāхум мāнь ня̄враманыл Ӣсус палт тотсаныл. Тав тāн пāлттыланыл вос карссатаптыглахты. Ханисьтахтын хумиянэн та ня̄врамыӈ мāхум ляпан ат тāртыглāлсаныл.14Ӣсус таи кантмувес кāсалас ос лāвыс:

— Тāнаныл Ам пāлтум ёхталаӈкве мāнрыг ат тартыяны̄н? Тōрум ōлнэ хōн-мā тамлэ ня̄врамыт мāгыс ōлы!15Сōль Ам нāнан лāвēгум: хотъют ня̄врам хольт Тōрум ōлнэ хōн-мā ат вы̄г, таи нэ̄мхуньт тув ся̄лтуӈкве ат вēрми.

16Ӣсус кāтагэ ня̄врамыт пуӈканылн пиныгласаге ос тāнаныл Тōрум лāтӈыл э̄лаль ōлуӈкве лāвсанэ.

17Хунь Ӣсус э̄лаль ё̄мыгтас, Тав палтэ акв хум ёхтыгпас. Та хум Тав э̄лы-пāлэ̄н санспуӈкаге тармыл ӯнтыс ос китыглахтас:

— Ханисьтан ёмас хум! Āнумн мāныр вāруӈкве э̄ри, нотум холтāл ōлнэм мāгыс?

18Ӣсус таве китыгластэ:

— Наӈ Āнум мāнрыг ёмасы̄г лāвыслын? Тōрум тӯп ёмас.19Наӈ Тōрум сāкконыт атхунь вāганын: “Нэ̄мхотъют ул алэн”, “Нэ̄г-хумы̄г халн ул ся̄лтэн”, “Ул тӯлмантэн”, “Ул уркен”, “Ся̄нягын-āсягын янытлэ̄лын”.

20— Ханисьтан хум! Ты сāкконыт сирыл мāнь тāглыл ōлэ̄гум, — та хум лāвыс.

21Ӣсус таве э̄руптым āӈкватас, лāвыс:

— Наӈын иӈ акв вāрмаль вāруӈкве э̄ри. Минэн ос мāныр ōньсēгын — пуссын тыналэ̄н. Тувыл олнанын нуса мирн уртэ̄н. Тōнт тах наӈ Тōрум ōлнэ хōн-мāт сюнь оньсегын. Тувыл тыг ёхтэн, Ам юи-пāлумт йиен.

22Хум хот-э̄ссамтавес. Тав кāсталы̄г пōхан та минас. Тав сака сёлыӈ хумы̄г ōлыс.

2323Ӣсус мӯвлахи аӈкватāлыс, ханисьтахтын юртанэ нупыл лāвыс:

— Сёлыӈ хōтпан Тōрум ōлнэ хōн-мāн сака тāрвит ся̄лтуӈкве.

24Ханисьтахтын хумиянэ ты лāтӈытыл осятахтыгласыт. Ӣсус китынтыг лāвыс:

— Ня̄врамыт, хотъют туп сёл кинсы, тамле хōтпан сака тāрвит Тōрум ōлнэ хон-мāн ся̄лтуӈкве.25Верблюдын ю̄нтуп асын кӯпнитнув ся̄лтуӈкве. Сёлыӈ хōтпан сака тāрвит Тōрум ōлнэ хон-мāн ся̄лтуӈкве.

26Ханисьтахтын юртанэ усьпылнэ̄г осятахтыгласыт, китыглахтасыт:

— Ос тасир ке — хōӈха лылытэ нōх-паттуӈкве вēрми?

27Ӣсус тāн нупланыл āӈкватас ос лāвыс:

— Э̄лумхōлас тасир сōль ат вēрми. Тōрум тӯп пуссын вēрми.

28Тōнт Пēтр лāвыс:

— Мāн ōс, вāрмалянув пуссын оссувласанув, Наӈ юи-пāлынт минмыгтасув.

29Ӣсус ювле-лāвыс:

— Ам сōль нāнан лāвēгум: мāхум пуссын, хотъютыт коланыл, āпсияныл, ӯвсияныл, āсяныл, ся̄няныл, ня̄враманыл, тэ̄пкананыл Ам мāгсылум ос Тōрум Ёмас Ля̄ххал мāгыс оссувласаныл.30Тāн яныгсāт сёс сāвнув кол, āпси, ӯвси, āсь, ся̄нь, ня̄врам, тэ̄пкан ос мирн ня̄влатпи халт хōнтэ̄гыт. Тувыл э̄лаль ōлнэ мāт ноттыӈ ōлупса хōнтэ̄гыт.31Ань та сāртын ōлнэ мāхум тах юи-ōвыл хōтпаг ēмтэ̄гыт. Ос тōва юи-ōвыл ōлнэ хōтпат сяр ōвылы̄г ēмтэ̄гыт.

Ӣсус такви сорме урыл ōс потырты

32Ӣсус ос ханисьтахтын хумиянэ э̄лаль Иерусалим ӯс нупыл минасыт. Ӣсус сāртын ё̄мыс. Юртанэ рохтым ос осятахтым Тав юи-пāлэ̄т ё̄мсыт. Тав китхуйплув ханисьтахтын юртанэ ляпан вōвсанэ, ос Тав ётэ тах мосэ̄ртын мāныр ēмты, та ōвылтыт потыртаӈкве патыс:

33— Мāн Иерусалим ӯсн ёхтэ̄в. Тот Э̄лумхōлас Пы̄г яныг пӯп-ōйкат ос сāккон тотнэ хумыт кāтанылн миве. Тāн Таве сорумн сутитыяныл. Тувылмōт пупыг тōрумн агтнэ мāхумн саватан мāгыс мыганыл.34Та мōт мāхум Тав нупылэ нēрхатуӈкве патэ̄гыт, Тав нупылэ полх сальгуӈкве патэ̄гыт, рāтуӈкве патыяныл, юи-ōвылт Таве порслыяныл. Хӯрум хōтал юи-пāлт Тав нōх-ялты.

35Яков ос Иоан — тэ̄н Зеведей-ōйка пыгы̄г, Ӣсус палт ёхтысыг, лāвсы̄г:

— Ханисьтан хум! Мēн Наӈын акв вāрмаль урыл вōвуӈкве кос таӈхиламēн.

36— Нэ̄н мāныр таӈхегы̄н?

37— Наӈ хōн-мāт мēнамэ̄н Наӈ кит-пал сирыл ӯнтуӈкве тāртэ̄лын. Аквамēн — ёмаспал кāт сирыл, мотанēн вōртыпал кāт сирыл, — тэ̄н аньлавсы̄г.

38Ӣсус лāвыс:

— Нэ̄н ат вāглы̄н, мāныр урыл Āнум пōйкилы̄н. Нэ̄н ман ōс Ам хольтум Ам айнэ āнымныл восьрамыӈ аюӈкве вēрмегын? Ос Ам пēрна пиннэм сирыл пēрна пинуӈкве вēрмегын?

39— Вēрмимēн, — тэ̄н лāвсы̄г.

Тōнт Ӣсус тэ̄натэ̄н лāвыс:

— Та āныл, хотыл Ам аегум, нэ̄н ōс аюӈкве патэгы̄н. Āм хумус пēрнал пинвēсум, нэ̄н аквтох пēрнал пинавēн.40Ам нэ̄нан ёмаспāлн манос вōртыпалн хумус унттыянум, ты лāвуӈкве Ам ат вēрмēгум. Та мāн та хōтпат ӯнттавет, ань хотъютыт тув лāвим ōлэ̄гыт.

41Мōт лōв ханисьтахтын хумиянэ ты потыр хӯнтамламанылт Яков ос Иоан нупыл хот-кант маявēсыт.42Ӣсус тāнаныл акван-вōвсанэ ос лāвыс:

— Нāн вāглын, хōныт мир тармыл кӯсяйлахтэ̄гыт.43Нāн халынт тамле ōлупса ул вос ēмты. Тох вāрēн: янытлахтын хōтпа нāнан мēтхумы̄г вос ēмты.44Хотъют ос сāр хōтпаг ōлуӈкве таӈхи, таи пуссын мир мāгыс мēтхумы̄г вос ēмты.45Ань Э̄лумхōлас Пы̄г мēтхум ōсьнэ мāгыс ты мāн ат ёхтыс. Тав мире мāгыс мēтхумы̄г ōлуӈкве ёхтыс. Такви лылытэ пуссын мире мāгыс йирыг мыгтэ.

Ӣсус сампыльтāл хум пусмалты

46Ӣсус ханисьтахтын хумиянэ ёт Иерихон ӯсн ёхтыс. Тувыл ювле йиме порат лё̄ӈх пōхат сампыльтāл Вартимей нампа хум кāсалас. Тав Тимей-ōйка пыгы̄г ōлыс. Хум лё̄ӈх пōхат кāтэ тактым ӯнлыс, мāхумныл олын вōвантас.47Хунь тав торгамтастэ, Назарет мāныл ōлнэ Ӣсус тав тāратэ ё̄ми, тав та рōӈхалтахтас:

— Ӣсус, Давид-хōн пыге! Анумн нё̄тэн!

48— Астал ōлэн, наӈ манры̄г тох рōӈхēгын! — сāв мāхум лāвēгыт. Вартимей ос яныгнув рōӈхалтахтас:

— Ӣсус, Давид-хōн пыге! Ануми нё̄тэн!

49Ӣсус ёл-лю̄лис, таве ляпан вōвуӈкве лāвыстэ.

Мāхум сампыльтāл хум нупыл лāвēгыт:

—Ул пилэн! Нōх-лю̄лен, Тав наӈын ляпан вōвитэ!

50Вартимей нуми маснутанэ хот-вуськасанэ, нōх-лю̄люмтас, Ӣсус палт йис.

51Ӣсус китыглахтас:

— Наӈ мāныр таӈхēгын? Наӈ мāгсылын мāныр вāруӈкве?

— Ханисьтан хум, кāсалаӈкве таӈхēгум, — та хум лāвыс.

52Ӣсус лāвыс:

— Минэн! Наӈ агтнэ вāрмаль наӈын пусмалтастэ.

Сампыльтāл хōтпа тара-та сампосын ёхтувес ос лё̄ӈх хосыт Ӣсус ёт минмыгтас.


10:38 восьрамыӈ — ты русь лāтӈыл горький


предыдущая глава Глава 10 следующая глава