Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 9

1Ӣсус тāнанылн лāвыс:

— Мāк нāнан лāвēгум. Ань тыт лю̄льнэ мāхум тōва сорумн патнэ̄ныл э̄лы-пāлыт тах Тōрум ōлнэ хōн-мā такви ё̄ре ёт ёхтынэ̄тэ кāсалыяныл.

Ӣсус Моисей ос Ӣлия ёт потырты

2Хōт хōтал юи-пāлт Ӣсус карыс ур алан Пēтр, Яков ос Иоан ёт вōвсанэ. Тāн сунсыманыл Тав каны̄г, хуриптэ пēнтхатас.3Тав маснутанэ сяр войканы̄г, тӯйт хурипāг ēмтсыт. Мā тāрмыл тамле хōтпа āтим, ань маснут тамлэ войканы̄г вāруӈкве вос вēрмынув.4Тувыл тāн э̄лы-пāланылн Ӣлия ос Моисей нэ̄глысы̄г. Тэ̄н Ӣсус ёт потыртасы̄г.5Пēтр Ӣсус нупыл лāвыс:

— Ханисьтан хум! Мāнавн тыт сака ёмас ōлуӈкве. Тыт хӯрум колпāл вāрēв: Наӈы̄н, Моисейн ос Ӣлия мāгсыл.

6Ханисьтахтын хумиянэ такем-та рохтысыт, ань Пēтр ат вāстэ, мāныр лāвуӈкве.7Ань нумыл тул нэ̄глыс. Тāн тулын лап-тотвēсыт. Тул халныл турсуй лāвыс:

— Ты Ам я̄тил Пы̄гум, Тавēн хӯнтлэ̄н!

8Ханисьтахтын хумиянэ мӯвлахи сунсыглахтасыт, Ӣсус коны-пāл воссыг нэ̄мхотъют ат ōлыс.9Урныл ёл-вāглуманыл Ӣсусын лāввēсыт, тāн ты урыл ул вос потыртэ̄гыт та пора мус, хунь Э̄лумхōлас Пы̄г сорме юи-пāлт нōх-ялты.10Ханисьтахтын хумиянэ тāнки халанылт китыглахтасыт: мāныр ман тамле “сорумныл нōх-ялтуӈкве”.

11Ханисьтахтын хумыт Ӣсус китыгласаныл:

— Сāккон тотнэ хумыт манрыг тох лāвēгыт, эрттам Кристос ёхтьнэ̄тэ э̄лы-пāлт Ӣлия ювле-ёхты?

12Ӣсус лāвыс:

— Сōль, Ӣлиян сāртын ёхтуӈкве э̄ри, пуссын вāрмалит сё̄питан мāгыс. Э̄лумхōлас Пы̄г урыл тох хансым ōлы. Тав савалаӈкве паты ос Тавēныл пуссын пōхан-минасыт.13Ам нāнан лāвēгум, Ӣлия ёхтыс. Мāхум тав ётэ мāныр тахсыт, таи вāрсыт. Тав урēтыл тох хансым ōлы.

Ӣсус кулил вуим пы̄грись пусмалты

14Ювле-ёхтуманылт тāн сунсэ̄гыт, юн хультсам ханисьтахтын хумиянэ мирн мӯвылтымат. Тāн ань сāккон тотнэ хумыт ёт ворасьлахтасыт.15Мāхум Ӣсус кāсаламанылт Тав ётэ пасялахтуӈкве тара-та хāйтсыт.

16— Мāныр нāн ворасьлахтэгы̄н? — Ӣсус китыглахтас.

17Тōнт мāхум халныл акв хум нэ̄глыс, лāвыс:

— Ханисьтан хум! Ам Наӈ пāлтын пы̄гум тотсум. Тав кӣврэ̄т нēлмтал куль ӯнлы.18Кулин сака саватаве: мā тāрмыл вуськасаве, сӯпе нēрыл контги, пуӈканэт сяхиртэ̄гыт. Тав йӣв сāйт хольт тōсыс. Наӈ ханисьтахтын хумиянын пы̄гум пусмалтаӈкве ēмталасаныл кос, ат вēрмысаныл.

19Ӣсус ювле-лāвыс:

— Ана-нā! Нāн нэ̄матырн ат агтнэ мāхум! Нāн ётын ōлуӈкве Āнумн иӈ мансāвит э̄ри? Пы̄грись тыг тотэлы̄н.

20Пы̄грись тотвес. Ӣсус кāсаламēт куль та пы̄грысь тōргалтастэ. Тав мā тāрмыл рагатас, сӯпēныл нēр контгыс.

21Ӣсус китыглахтас:

— Тав тамлēг хосат ēмтыс?

— Сяр мāнь пора тāгыл, — āсе лāвыс.

22— Кулин сāв сёс порслаӈкве ēмталавес. Тавман нāйн, тавман витн вуськасāлыстэ. Мāнав сāлитэ̄лын! Вēрмэгын-ке, нё̄тэн!

23Ӣсус лāвыс:

— Манрыг лāвēгын “вēрмегын-ке”? Хотъют агты, тав пуссын вēрми.

24Пы̄грись āсе ань рōӈхувлас:

— Ам агтэ̄гум, Кӯсяй! Ам ат агтнэ вāрмалюмн нё̄тэн.

25Ань Ӣсус сунсы: мāхум ōс атхатаӈкве та патсыт. Тав куль нупыл кантыӈысь ля̄галас:

— Нēлмтал-пальтāл куль! Ам наӈын лāвēгум: пы̄грысьныл кон-минэн! Воссыг нэ̄мхуньт тавēн ул ся̄лтэн!

26Куль рōӈхалтахтас, пы̄грись тōргалтастэ, тавēныл кон-минас. Пы̄грись мā тāрмыл хуяс, сяр ат нёвсыс.

Ань мāхум лāвсыт:

— Сорумн та патыс.

27Пы̄грись Ӣсусын кāтэ̄т пуввес, нōх-лю̄люӈкве нё̄твес. Пы̄грись нōх-лю̄лис.

28Та вāрмаль юи-пāлт ханисьтахтын хумиянэ китыглахтасыт:

— Мāн ты куль кон-ня̄влуӈкве манрыг ат вēрмыслув?

29Ӣсус ювле-лāвыс:

— Тамле куль тӯп пōйкилыл ос пост ёт кон-ня̄влуӈкве вēрмаве.

30Ӣсус ханисьтахтын юртанэ ёт та мāныл Галилея мā тāра минас. Ӣсус сытамыл ōлыс.31Тав юрт хумиянэ э̄лаль ханисьтасанэ:

— Э̄лумхōлас Пы̄г мāхум кāтын миве. Тувыл порславе. Хӯрум хōтал оигпан юи-пāлыт Тав нōх-ялты.

32Ханисьтахтын хумиянэ ты лāтӈыт ат торгамтасаныл, китыглахтуӈкве ос пилсыт.

Хотъют сяр яныгнув?

33Ӣсус ханисьтахтын хумиянэ ёт Капернаум ӯсн ёхтыс. Юн Ӣсусын тāн китыглавēсыт:

— Лāвēн, мāныр урыл нāн лё̄ӈх хосыт минымав потыртасын?

34Тōнт тāн нэ̄матыр ат лāвсыт. Лё̄ӈхыт тāн потыртасыт, хотъютаныл сяр яныгнув. Таи мāгыс тāн астал ōлсыт.35Ӣсус ёл-ӯнтыс, китхуйплув хумиянэ ляпан вōвсанэ, лāвыс:

— Хотъют сяр янгы̄г ōлуӈкве таӈхи, таи сяр юи-ōвылт вос ōлы. Кāсыӈ хōтпан мēтхумы̄г вос ōлы.

36Тав мāнь ня̄врам ляпан вис, тāнки халанылн ӯнттыстэ, э̄лаль потыртас:

37— Хотъют тамле ня̄врам сымн вы̄г, таи Āнум сымн вы̄г. Ос хотъют Анум сымн вы̄г, тав Āнумн кēтум хōтпа сымн вы̄г.

Хотъют мāн торгув ат ōлы, таи мāн ётув ōлы

38Иоан Ӣсус нупыл лāвыс:

— Ханисьтан хум! Мāн акв э̄лумхōлас вāсув, тав Наӈ намынт кулит кон-ня̄влы. Тав мāн ётув ат ōлы, таимāгыс мāн тавēн лāвсув: тох ул вос вāри.

39Ӣсус лāвыс:

— Тох ул вāрēн! Хотъют Ам намум ёт ōлыглаттāл нак вāри, та хōтпа Āнумныл лю̄ль лāвуӈкве ат вēрми.40Хотъют мāн торгув ат ōлы, таи мāн ётув ōлы.41Мāк нāнан лāвēгум: хотьют Ам мāгсылум нāнан витыл айтытэ, та хōтпа такви мӯйлупсатэ ат тыпылтытэ.42Ос хотъют Āнумын агтнэ ня̄врам карек вāруӈкве хуйтытэ, та хōтпа сыплувēн колас-сакватан пāртыл нэ̄гим ся̄рысьн вуськасаӈкве э̄ри.

43Наӈ кāты̄н карек вāруӈкве ке хуйтавен, кāтын хот-саграпēлын. Наӈын ёмаснув кāтпāлыл āкваг э̄лаль ōлуӈкве, ман кāтагын ёт турман мā ёлы-пāлн ся̄лтуӈкве ос тот āкваг нāй кӣвырт сяруӈкве.44Наӈ лāглы̄н карек вāруӈкве ке хуйтавен, лāглын хот-саграпēлын. Ёмаснув, лāгылтал āкваг э̄лаль ōлуӈкве, ман лāглагын ёт турман мāн патуӈкве. 45Наӈ лāглы̄н карек вāруӈкве ке хуйтавен, лāглын хот-саграпēлын. Ёмаснув, лāгылтал āкваг э̄лаль ōлуӈкве, ман лāглагын ёт турман мāн патуӈкве. 46Тот ня̄руй ат холы, нāй ат харыглы.47Наӈ самы̄н ке касилтавен карек вāруӈкве, самын хот-пувтмēлын. Ёмаснув акв сампāлыл Тōрум ōлнэ хōн-мāн ся̄лтуӈкве, ман кит самагын ёт турман мā ёлы-пāлн вуськасавен.

48Тот ня̄руй ат холы, нāй ат харыглы.

49Кāсыӈ хōтпа солвалтаӈкве э̄ри. Кāсыӈ йир солвалтаӈкве э̄ри.50Солвал ёмас. Солвал аттāл ке ēмты, таве солвалыӈы̄г хумус вāрилы̄н? Нāнки кӣвырт ōсьнэ солвалы̄н ӯргалэ̄лы̄н. Халынт юртыӈысь, сымыӈысь олэ̄н.


предыдущая глава Глава 9 следующая глава