Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 8

Нила сōтыра э̄лумхōлас тэ̄пын хумус тōвлувēсыт

1Ӣсус пāлт ос сāв мир атхатас. Тāн тэ̄нут ат ōньсыт. Ӣсус ханисьтахтын хумиянэ ляпан вōвсанэ ос лāвыс:

2— Āнумн ты мāхум сāлӣг ōлэ̄гыт. Ам ётум тāн хӯрум хōтал ōлсыт. Тāн тэ̄нут ат ōньсēгыт.3Ам тāнаныл тэ̄тал ке юв-тāртыянум, тāн ювле-миннэ̄ныл сыс сяр вāгтал патэ̄гыт. Тōваныл э̄лы мāныл ōлэ̄гыт.

4Ханисьтахтын хумиянэ Ӣсус китыгласаныл:

— Тамле мāт тāнанылн тыттын ня̄нь мāн хотыл выгув?

5— Манах ня̄нь нāн ōньсегы̄н? — Ӣсус китыглахтас.

— Сāт ня̄нь, — ханисьтахтын хумиянэ лāвсыт.

6Ӣсус мāхум мā тармыл ӯнтуӈкве лāвсанэ. Тав ань сāт ня̄нь висанэ, Тōрумн пӯмасипа лāвыс. Ня̄нит лōмты̄г-лōмты̄г сакватасанэ ос ханисьтахтын юртанэ̄н мисанэ. Тāн ня̄нит мāхумын вос уртияныл.7Тāн ань матахкем мāнь хӯлквет ōньсыт. Ӣсус ты хӯлквет мāгыс Тōрумн ōс пӯмасипа лāвыс. Ты хӯлквет ōс мāхумн уртвēсыт.8Пуссын пōйтнэ̄г тэ̄сыт. Та коны-пāл сāт корсинкат арыгтам тэ̄нут хультыс!9Аквъёт нилахкем сōтыра э̄лумхōлас тэ̄сыт. Ӣсусн мāхум лāкква-тартвēсыт.10Такви хāпн тāлыс ос ханисьтахтын хумиянэ ёт Далманута мāн минмыгтас.

Ӣсусныл тōрум пōс вōвēгыт

11Фарисейт Ӣсус пāлт ёхтысыт. Тāн Тав ётэ ворасьлаӈкве патсыт. Тāн Тавēныл тōрум пōс вовыглалсыт. Таве арталасаныл.12Ӣсус тыстувъялыс, лāвыс:

— Манрыг ты мāхум пōс кинсэ̄гыт? Ам нāнан мак лāвегум: ты мāхумн нэ̄матыр пōс ат мыг.13Тав тāнаныл оссувласанэ, хāпн тāлыс, ся̄рысь та-пāлн унсыс.

Фарисейт ос Ирод-хōныл сунсым ōлэ̄н

14Ханисьтахтын хумиянэ ня̄нь виӈкве хот-ёрувламаныл. Хāпт тӯп акв ня̄нь ōньсыт.15Мины-манылт Ӣсус тāнанылн кантыӈысь лāвыс:

— Сунсэ̄н! Фарисейт ос Ирод-хōн ня̄ньсум витныл пилым ōлэ̄н!

16Ханисьтахтын хумиянэ халанылт китыглахтасыт:

— Мāн ань ня̄нь ат ōньсēв? Таимāгыс Тав ань ня̄ньсум вит урыл потырты?

17Ӣсус вāстэ, мāныр урыл тāн потрамасыт. Тав лāвыс:

— Нāн ня̄нь ат ōньснэ̄н урыл манрыг потыртэ̄гы̄н? Нāн сōль мāн ат кāсаласлы̄н-а? Ат торгамтаслы̄н-а? Нāн сыманы̄н сōль ман āхвтас хурипаг ōлэ̄гыт?18Нāн сам ōньсегы̄н-кос, ат кāсалэгы̄н? Паль ōньсегы̄н-кос, ат хулэгы̄н? Сōль ман ат номылы̄н-а?19Ам та ат ня̄нь ат сōтыра хōтпан хунь уртсанум, арыгтам ня̄нь мансāвит корсинкат хультыс?

— Китхуйплув корсинкат, — ханисьтахтын хумиянэ лāвсыт.

20— Ос Ам та сāт ня̄нь нила сōтыра хōтпан хунь уртсанум, мансāвит корсинкат ня̄нь хультыс?

— Сāт, — тāн лāвсыт.

21Ӣсус китыглас:

— Нāн ман сōль ат торгамтылы̄н-а?

Ӣсус сампыльтāл хōтпа Вифсаида пāвылт пусмалты

22Ӣсус ханисьтахтын хумиянэ ёт Вифсаида пāвылн ёхтыс. Тот Ӣсус пāлт сампыльтāл хум тот тотвес. Та хум Таве кāтыл карссатаптыглаӈкве пойкысаныл23Ӣсус та хум кāтпалэ̄т вистэ, пāвылныл пōхан вāнттыстэ, самагēн салямас. Тувыл кāтыл пиныстэ ос китыгластэ:

— Наӈ матыр кāсалэ̄гын?

24Та хум мӯвлахи āӈкватāлым лāвыс:

— Мāхум кāсалэ̄гум: тāн йӣвыт хольт сусхатэ̄гыт.

25Тувыл Ӣсус кāтаге ōс акв сёс тав самагэ̄н пиныгласаге. Ань хум сампосн ёхтувес, ёмсякв кāсалаӈкве патыс!26Ӣсус таве юв-кēтыстэ, лāвыс:

— Пāвылн ул минэн! Ты ōвылтыт нэ̄мхотъютын ул потыртэн!

Пēтр лāви: Ӣсус ты Кристос

27Ӣсус ханисьтахтын хумиянэ ёт Кесария Филиппова мāн минас. Миныманылт Ӣсус тāнаныл китыгласанэ:

— Мāхум Āнум хотъюты̄г ловиньтыя̄ныл?28Ханисьтхтын хумиянэ лāвсыт:

— Тāн лāвēгыт Наӈ витыл пēрнал пиннэ хум Иоан. Тōват Наӈын Ӣлияг лāвияныл. Мōт мāхум Наӈын Тōрум йӣс лāтыӈ тотнэ хумы̄г лāвия̄ныл.

29Ӣсус тāнаныл китыгласанэ:

— Нāн хумус номсэгы̄н? Ам хотъют?

Пēтр лāвыс:

— Наӈ Кристос.

30Ӣсус тāнанылн ты урыл нэ̄мхотъютын нэ̄матыр потыртаӈкве ат тāртахтас.

Ӣсус такви сормэ урыл потырты

31Тōнт Ӣсус та урыл потыртаӈкве патыс, Э̄лумхōлас Пы̄г хумус савалаӈкве паты. Тав пӯп-ōйкатын хумус хот-ня̄влаве ос порславе тах. Тав ань хӯрум хōтал юи-пāлт хумус нōх-ялты.32Ӣсус ты ōвылтыт сохтыл потыртас. Тōнт Пēтырн Ӣсус э̄лнув вōввес. Пēтр Ӣсус потранэ мāгыс лю̄камтастэ.33Ӣсус ханисьтахтын хумиянэ нупыл āӈкваталым Пēтр нупыл кантыӈысь ля̄галас:

— Аквпалын минэн, сатана! Наӈ э̄лумхōлас номтыл номсэ̄гын. Тōрум сирыл ат номсэ̄гын.

34Ӣсус мāхум ос ханисьтахтын хумиянэ ляпан вōвсанэ, лāвыс:

— Ам юи-пāлумт хотъют йиӈкве-ке таӈхи, таквинāтэ хот вос ёрувлытэ. Такви пēрнатэ вос выгтэ. Ам юи-пāлумт вос юв.35Хотъют такви ōлупсатэ ӯргалаӈкве тāӈхи, таи ōлупсатэ та тыпылтытэ. Хотъют такви ōлупсатэ Ам мāгсылум ос Тōрум Ёмас Ля̄ххал мāгыс мыгтэ, тав лылытэ тах нэ̄гылтытэ.36Мāныр пāрс та хōтпан, хотъют мā-вит пуссын кāтын паттыянэ, ос лылытэ тыпылтытэ.37Манхурип тын лылытэ мāгыс ойтуӈкве вēрми?38Хотъют тах ты карекыӈ мир халт Āнумныл ос Ам потранумныл эссамты, Āнумн та хōтпат мāгыс э̄сырмаг ēмты, хунь Āсюм посэ ёт ос ялпыӈ ангелыт ёт ювле-ёхтэ̄гум.


8:15 ня̄ньсум вит — восьрамыӈ колас вит (ты русь лāтӈыл закваска)

8:27 Кристос — еврей лāтӈыл ты Мессиас. Мессиас — ты вōйл сартнэ хōтпа. Пēс порат Израиль мāт хунь хотъют та хоны̄г виве, ты э̄ли-пāлт тав вōйл сартвес. Ӣсус Тōрумын вōйл сартвес, таимāгыс Тав Мессиас — Кристос. Ань Кристос — ты Мессиас, Израиль мāхумн урвес.


предыдущая глава Глава 8 следующая глава