Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 7

Тōрум сāкконыт ос э̄лумхōлас сāкконыт

1Иерусалим ӯсныл фарисейт ос матахкем сāккон тотнэ хумыт Ӣсус пāлт ёхтысыт.2Тāн кāсаласаныл: Ӣсус ханисьтахтын хумиянэ тōват кāтаныл ловттāл тэ̄сыт.3Юдея мāт тамле пēс-йӣс сāккон ōлыс: кāт ловттāл тэ̄ӈкве ӯнтуӈкве ат рōвыс. Ты нак фарисей ос еврей мāхумын вāйвес.4Ёвтхатнэ мāныл ёхтынэ̄ныл юи-пāлт кāтаныл ловтуӈкве э̄рыс. Та коны-пāл ōс сāвсыр пēс-йӣс вāрмалит ōлсыт. *aАргин пӯтыт ос мōт āны-сāныт хумус ловтуӈкве э̄ри.5Ань фарисейт ос сāккон тотнэ хумыт Ӣсус китыгласаныл:

— Наӈ ханисьтахтын хумиянын пēс-йӣс сирыл ōлуӈкве манрыг ат таӈхēгыт? Тэ̄нэ э̄лы-пāлт тāн кāтаныл манрыг ат ловтыяныл?

66Ӣсус тāнанылн лāвыс:

— Соль та Исаян, Тōрум лāтыӈ тотнэ хумн, нāн кит-вильтупы̄г намтвесын:

“Ты мир Āнум сӯпаныл-нēлманыл

янытлыяныл.

Тāн сыманыл Āнумныл сака э̄лын ōлэ̄гыт.

7Āнум янытлан вāрмаляныл номт ат оньси.

Тāн ханисьтан вāрмаляныл э̄лумхōлас

ōлнэ писит”.

8— Нāн Тōрум сāккон хултуптаслы̄н. Нāн э̄лумхōлас пēс-йӣс ōлнэ хурин вуйхатэ̄гы̄н. Нāн āны-сāныт ловтнэ вāрмаль ос мōт пēс-йис вāрмалит вāрегы̄н.9Пēс-йӣс вāрмаль мāгыс нāн Тōрум сāккон осьмарыӈы̄г пēнтыслын.10Моисей лāвыс: “Нāнки ся̄нягы̄н-āсягы̄н янытлэ̄лы̄н” ос “Ся̄няге-āсяге люкамтан хōтпа сорумн вос паты”.11Нāн ос э̄лумхōлас ся̄няге-āсяге нупыл тох лāвуӈкве ханисьтылы̄н: “Нэ̄н мāгсылын вāрнэ вāрмалянум ам Тōрумн мӯйлуптасанум”.12Нāн ханисьтанēн сирыл э̄лумхōлас ся̄няге-āсяге мāгыс воссыг нэ̄матыр ул вос вāри.13Нāн Тōрум лāтыӈ нāнки пēс-йӣс ханисьтан накын мāгыс пēнтыслын.

14Ӣсус мир ляпан вōвсанэ, тāнанылн лāвыс:

— Āнум хӯнтлэлы̄н, торгамтэлы̄н!15Э̄лумхōлас юв-тэ̄нэ тэ̄нутыл “пāӈкыӈы̄г” ат ēмты. Э̄лумхōлас такви кӣврēныл квāлнэ вāрмалитныл “пāӈкыӈы̄г” ēмты.16Хотъют пāль ōньси, Āнум хӯлытэ!

17Ётылнув ханисьтахтын хумиянэ̄н Ӣсус ты ханисьтан потре урыл китыглавес.18Тав тāнанылн лāвыс:

— Нāн сōль ат та торгамтылын-а? Э̄лумхōлас кӣврēн коныл ся̄лтнэ матыр-āтин “пāӈкыӈы̄г” ат вāраве.19Тэ̄нэ утанэ тэ̄п хӯргēн ся̄лтэ̄гыт. Тувыл кон-минэ̄гыт. Тāн сымн хунь ся̄лтэ̄гыт.

Ӣсус тох лāвыс:

— Кāсыӈ тэ̄нут сыстамы̄г ōлы.20Ань э̄лумхōлас кӣврēныл квāлнэ номтанэ̄н “пāӈкыӈы̄г” вāраве.21Э̄лумхōлас сымныл лю̄ль номтыт кон-квāлэ̄гыт: мōт хум нэ̄ ёт ōлнэ вāрмаль, алысьлахтын вāрмаль, тӯлмантан вāрмаль.22Нялыӈы̄г, кантыӈы̄г, лаплахты̄гланэ̄г ōлнэ вāрмаль, Тōрум лю̄камтан вāрмаль.23Пуссын э̄лумхōлас кӣврēныл квāлнэ кантэ̄н “пāӈкыӈы̄г” вāраве.

Хумус мōт мāныл ōлнэ нэ̄ Тōрумн агты

24Галилея мāныл Ӣсус Тир ос Сидон мāн минас. Тав сытамыл ёхтыс, ёхтуме урыл мāхумын ул вос вāве. Тав ёхтуме урыл мāхум ань хӯлсаныл.25Ӣсус ёхтуме урыл акв нэ̄ хунь хӯлыстэ, тав аквтаторыг Ӣсус пāлт ёхтыс. Ӣсус э̄лы-пāлн сāнсагēн ёл-патыс. Та нэ̄ āгирысе кулил вуим ōлыс.26Ты грек нэ̄, Сирийский Финикия мāныл, ōлыс. Нэ̄ Ӣсус пōйкуӈкве патыстэ, āгитэ̄ныл куль кон вос ня̄влыянэ.27Ӣсус та нэ̄ нупыл лāвыс:

— Ōвлэ̄т, ня̄врамыт пōйтнэ̄г тыттуӈкве э̄рēгыт. Ня̄врамытныл ня̄нь виӈкве ос кӯтювытын лиӈкве ат рōви

28Нэ̄ ювле-лāвыс:

— Сōль лāвēгын, Кӯсяй. Ня̄врам пасанныл ёл-рагатам ня̄нь саквыт кӯтювытын тэ̄вет.

29Ӣсус ань нэ̄н лāвыс:

— Тамле лāтӈанын мāгыс пускāтыл-пуслāглыл юв-минэн! Куль наӈ āгиныл кон-минас.

30Нэ̄ юв-ёхтуме порат āгитэ пусмум, хуйнэмāт поварāлы. Куль тавēныл кон-минам.

Ӣсус пāльтал хōтпа пусмалты

31Ӣсус Тир мāныл Сидон ос Декаполис мāт тāра минас. Тувыл Галилея ся̄рысь вāтан ёхтыс.32Тыт Ӣсус пāлт пāльтал хōтпа тотвес. Мāхум Ӣсус таве кāтэ пиным пусмалтаӈкве пōйкысаныл.33Ӣсус та хум пōхан вāнттыстэ. Ань тӯлёвланэ та хум палясагēн пинсанэ, салямас ос хум нēлмēн карссатаптыглахтас.34Тувыл Ӣсус нōӈхаль аӈкватас, тыстувъим тавēн лāвыс: “Еффата!” Ты тох толмасьлаве: “Пāлыг-пӯсхатэн!”35Хум палягэ тāра-та пӯсхатасыг. Тав сӯп-нēлумн ёхтувес. Тав сыстамы̄г потыртаӈкве патыс.36Ӣсус ты урыл мирн потыртаӈкве ат тартахтас. Такем-та мāхум ӯсьпылнэ̄г сāвнув потыртасыт.

37Мāхум сака осятахтыгласыт, лāвсыт:

— Тав пуссын ёмас вāри. Насати Тав пальтāл хōтпанэ хӯлэ̄гыт, сӯп-нēлмтал хōтпанэ потыртэ̄гыт!


*а 7:4 аргын — ты русь лāтӈыл медь


предыдущая глава Глава 7 следующая глава