Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 6

Ӣсус такви самын патум ӯсэ̄т

1Ӣсус тувыл такви самын патум ӯсэ̄н минас. Тав ётэ ханисьтахтын хумиянэ тув минасыт.2Сабат-хōтал ēмтыс. Тав синагогат ханисьтаӈкве патыс. Таве хӯнтлан сāв хōтпат осятахтыгласыт:

— Ань Тав манры̄г тамле мутраӈ? Тамле ōлыглаттāл нак Тав кāтагэ хумус вāрēг?3Тав йӣвныл матырāти вāрнэ хумы̄г туп кос ōлы? Мария пыге, Яков, Ӯщуп, Иуда ос Симон нампа хумыт — тав ягпыганэ? Эрыӈ Тав э̄сянэ ос мāн халувт ат ōлэ̄гыт?

Таимāгыс мāхум Тавēныл пōхан-ёӈхысыт4Ӣсус тāнанылн лāвыс:

— Тōрум лтыӈ тотнэ хум хōт-āти āкваг янытлаве. Туп такви самын патум ӯсэ̄т, такви колэ̄т ос такви рӯтанэ халт тав ат янытлаве.

5Тот Тав нэ̄матыр ōлыглаттāл нак вāруӈкве ат вēрмыс. Тав тӯп матахкем āгмыӈ хōтпа кāтаге пиным пусмалтас.6Ӣсус тāн Тōрумн ат āгтнэ вāрмаляныл осятахтыглас. Ӣсус ань ляпат ōлнэ пāвлытт яласаӈкве ос мир ханисьтаӈкве патыс.

Ӣсус китхуйплув апостол кēты

7Тав такви палтэ китхуйплув ханистахтын юртанэ акван-атсанэ. Тувыл кит-кит хōтпал тāнаныл кēтуӈкве ōвылтасанэ, кулит кон-ня̄влын ё̄р тāнанылн мис.8Ӣсус тāнанылн тамле лāтӈыт лāвыс:

— ё̄амнэ сув коны-пāл лё̄ӈхын воссыг нэ̄матыр ул вуēн: хōлы-хӯрыг, ня̄нь, олн ул вуēн.9Лāгыл маснут ос суп коны-пāл воссыг нэ̄матыр ул вуēн.10Хотъют колн ке сялтэгы̄н, та колт э̄лаль миннэ̄н мус ōлэ̄н.11Хоты колыт ляпан ат ке вивēн, ман ат ке хӯнтлавēн, миннэ̄н э̄лы-пāлт тот нāн сэ̄иӈ лāгланы̄н хот-паргалтэ̄н. Тох тāнанылн пōри вāрēн, тāн тах вос торгамтыяныл.

12Ханисьтахтын хумиянэ та минасыт ос Тōрум ля̄льт суснэ вāрмаль мирн потыртасыт.13Тāн сāв кулит кон-ня̄влысыт, сāв āгмыӈ ос вāгтал хōтпа вōйл сартым пусмалтасаныл.

Витыл пēрнал пиннэ хум Иоан хумус алвес

14Ӣсус урыл лāтыӈ мā янытыл тāрамлас. Ты лāтыӈ Ирод-хōн хӯлыстэ. Тōва мāхум потыртасыт:

— Ты витыл пēрнал пиннэ хум Иоан! Тав нōх-ялтыс, таимāгыс тамле ōлыглаттāл вāрмаль вāри.

15Тōва хōтпат ос лāвыглāлсыт:

— Тав Илия нампа хум.

Мōт мāхум лāвыглāлсыт:

— Тав эрттам Тōрум лāтыӈ тотнэ хумытныл акв хум.

16Ирод-хōн та потрыт хӯнтамламēт лāвыс:

— Ты Иоан. Ам тав пуӈке хот-сагрыслум. Тав ань нōх-ялтыс.

17Ирод э̄кватэ намэ Иродида ōлыс. Ōвлэ̄т ты нэ̄Ирод каӈке нэ̄г ōлыс. Каӈке наме филипп ōлыс.18Иоан Иродын лāвыглāлыс: “Каӈкын нэ̄ наӈын тотуӈкве ат рōви”.19Таимāгыс Иоан Иродын кāснаколн ӯнттувес. Ань Иродида Иоан нупыл лаве нэ̄глыс, таве порслаӈкве таӈхыстэ, нэ̄матыр вāруӈкве ат вēрмыс.20Ирод Иоанныл пилыс ос таве э̄руптастэ, таимāгыс тав Иоан ӯргаластэ. Ирод-хōн вāстэ, Иоан ялпыӈ ос вēськат хумы̄г ōлыс. Иоан потрыт Ирод-хōнын сака мӯстысыт, пуссын сымн ат вуйсанэ.

21Аквматнакт Иродидан э̄рнэ пора ēмтыс. Ирод-хōн самын патум хōталэ ōлыс. Тав яныг пасан вāрыс. Та пӯрин сāв мāхум вōвыс: сёлыӈ мāхум, хōнт кӯсяйт ос Галилея мā янытыл мирн э̄руптанэ мāхум.22Та пӯрит Иродида āгитэ нё̄тнэ̄г йӣквыс. Мӯй мāхум сака пумсы̄г āги нупыл суссыт.23Хōн āги нупыл лāвыс:

— Наӈын мāныр э̄ри, вōвен! Манырпыл ōньсēгум, кос хōн-мā акв-пāлэ — пуссын наӈын мигум!

24Āги ся̄нэ пāлт китыглахтуӈкве минас.

— Витыл пēрнал пиннэ Иоан хум пуӈке вōвен, — ся̄нэ ля̄галас.

25Āги хōн пāлт хāйтыс ос лāвыс:

— Āнумн витыл пēрнал пиннэ хум Иоан пуӈке āны пис кӣвырн пиным э̄ри.

26Ирод сака кāсталы̄г ēмтыс, мир э̄лы-пāлт лāвум лāтӈе ювле ат выгтэ.27Хōн сираиӈ хумитэ Иоан пуӈке сāгруӈкве тара-та кēтыстэ.28Сираиӈ хум кāснаколн та минас. Тот ань Иоан пуӈке хот-сāграпастэ. Тувыл āны пис кӣвырн пиныстэ, āгин та мистэ. Āги ос ся̄нēн та мистэ.

29Иоан ханисьтахтын хумиянэ ты хӯлманылт, ёхтысыт. Иоан висаныл ос ёл-сё̄питасаныл.

Ат ня̄нь ос кит хӯл

30Апостолыт Ӣсус пāлт атхатасыт. Тавēн потыртасыт, тāн ань э̄лы-мāт мāныр вāрсыт ос мир хумус ханисьтасаныл.31Ӣсус тāнанылн лāвыс:

— Мир ōлтāл мāн минэ̄н. Нāнан мось ӯсьлахтуӈкве э̄ри.

Сāв мир āкваг ёхталас, таимāгыс ханисьтахтынхумиянэ тэ̄ӈкве ат āлымāлсыт.

32Тāн хāпн тāлсыт, мир ōлтāл мāн та минасыт.33Мирн кāсалавēсыт, хумус тāн товумтасыт. Мāхум ся̄рысь вāта хосыт тāн юи-пāланылт хāйталтасыт, хāп э̄лы-пāлт мир ōлтāл мāн ёхтынэ̄ныл мāгыс.34Хунь Ӣсус пāг-квāлыс, сāв мāхум кāсалас. Тавēн тāн сāлӣг ēмтсыт. Тāн аквтуп паля аняг ōлсыт; паля ӯрнэ хум ат ōнсьсыт. Ӣсусн тāн ань ханисьтаӈкве та патвēсыт.

35Э̄типāлаг ēмтум порат ханисьтахтын хумиянэ Тав пāлтэ ёхтысыт ос лāвсыт:

— Э̄тиӣг та ēмты.36Мāхум юв-тāртэ̄н, ляпа пāвлытн вос ялэ̄гыт, тāнкинāнанылн тэ̄нут вос ёвтэ̄гыт.

37Ӣсус ювле-лāвыс:

— Нāн нāнки тāнаныл тыттэ̄н.

Ханисьтахтын хумиянэ осятахтыглāлсыт:

— Наӈ ман сōль номсэ̄гын, ты китсат динарий сāвит олныл тāнанылн тэ̄нут ёвтуӈкве вēрмēв?

38Ӣсус китыглахтас:

— Нāн манах ня̄нь ōньсегы̄н? Ялэ̄н, тара-паттэлы̄н!

Тāн ялсыт, тāра-паттысаныл, манах ня̄нь тот ōсьсыт. Тувыл лāвēгыт:

— Ат ня̄нь ос кит хӯл ōньсēв.

39Ӣсус мāхум ня̄рпумыӈ мāн ёл-ӯнттункве лāвсанэ.40Атпанахкēмыл, яныгсаткēмыл мир ёл-ӯнтсыт.41Тувыл Ӣсус та ат ня̄нь ос та кит хӯлы̄г кāтэ̄н висанэ. Тав тōрум нупыл нōӈхал āӈкватас ос ня̄нь мāгыс Тōрумн пӯмасипа лāвыс. Тувыл Ӣсус ня̄нь ломты̄г-ломты̄г сакватасанэ ос ханисьтахтын хумиянэ̄н уртуӈкве патвēсыт. Ӣсус ань та кит хӯлыгныл кāсыӈ хōтпан ōс мāнь лōмт мис.42Мир пуссын пōйтнэ̄г тэс.43Та коны-пāл аквхуйплув корсинкат арыгтам тэ̄нут иӈ хультыс.44Тысыр атахкем сōтыра э̄лумхōлас тэ̄сыт.

Ӣсус вит хосыт ё̄ми

45Тāра-та ты вāрмаль юи-пāлт Ӣсус ханисьтахтын хумиянэ хāпын тāлуӈкве ос ся̄рысь та-пāлн Вифсаида ӯсн товуӈкве лāвсанэ. Ӣсус такви ся̄рысь ты-пāлт мир юв-тāртнэ мāгыс хультыс.46Мир лāкква-миныглам юи-пāлт, Ӣсус ӯр алан пōйксяӈкве минас.

47Э̄тиӣг ēмтыс. Ханисьтахтын хумиянэ ся̄рысь котильт ōлсыт. Ӣсус тактēтэ ся̄рысь вāтат ōлыс.48Тав сунсыс, тāнанылн вōт пōри товуӈкве хумус тāрвит. Э̄ти, нилахкем сё̄с порат тāн палтанылн вит хосыт лāглыл та минмыгтас.49Тав хāп тāра ё̄мыс. Ханисьтахтын хумиянэ̄н Тав кāсалавес. Тāн хот-рохтысыт, номсэ̄гыт, ты ул исхор, рōӈхалтахтасыт.50Ӣсус тāнанылн аквтаторыг лāвыс:

—Торамлэ̄н! Ты Ам. Ул пилэ̄н.

51Тав хāп кӣвырн тāлыс. Вōт ёл та пōйтыс. Ханисьтахтин хумиянэ сака осятахтыгласыт.52Тāн ня̄няныл ёт ōлум ōлыглаттāл нак иӈ ат торгамтасаныл, сыманыл лап ōлсыт.

53Ся̄рысь та-пāлт тāн Геннисарет ӯс вāтан пāг-пӯхтысыт.54Хунь тāн пāг-квāлсыт, соссаӈ мирн Ӣсус тāра-та хасьвес.55Тāн Ӣсус пāлт хāйтсыт. Ӣсус урыл пāвлыӈ мир халт потыр минас. Тав пāлтэ āгмыӈ мāхум хуйнэ мананыл тотуӈкве патвēсыт.56Хōты мāт Тав ат ōлыс, ӯст манос пāвылт, мир āгмыӈ мāхманыл Тав пāлтэ тотыглалсаныл. Тāн Ӣсус пōйкыглāлсаныл: Тав такви маснутанэ̄н āгмыӈ мāхум карссатаптыглахтуӈкве вос тāртыянэ, хоты хōтпа карссатаптыглахтыглас — та пусмыглас.


*а 6:2 мутраӈ — ты русь лāтӈыл мудрость

*б 6:5 ōлыглаттāл нак — ты русь лāтӈыл чудо

*в 6:37 динарий — Рим ся̄глолн олнкер

*г 6:43 корсинка — ты русь лāтӈыл корзинка


предыдущая глава Глава 6 следующая глава