Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 05

Ӣсус кулил вуим хум пусмалты

1Ӣсус ханисьтахтын хумиянэ ёт ся̄рысь та-пāлн Гераса нампа мāн уссыт.2Ӣсус хāпныл пāг-квāлмēт Тав ля̄льтэ кулил вуим хум аквтаторыг нэ̄глыс.3Ты хум савыӈкант ōлнэ курсип кӣвирт ōлыс. Нэ̄мхотъютын тав ёл-нэ̄гсалаӈкве ат вēрмувес.4Тав лāглагэ-кāтагэ сāв сёс кēр квāлгыл ёл-нэ̄гсалāлвēсыт. Кāсыӈ ēмт та юи-пāлт тав хот-маныгтахтыглас.5Э̄тэ ос хōталэ пāлыт тав савыӈкант ос урыт алат тармыл мори рōӈхыс, таквинāтэ āхвтасыл рāтыстэ.6Тав э̄лыл Ӣсус кāсаластэ ос Ӣсус палт хāйтыс. Тавēн пуӈк пиныс,7тāкыс рōӈхалтахтас:

— Наӈын āнумныл мāныр э̄ри, Ӣсус, Тōрум Пы̄г? Ам Тōрум намыл Наӈын пōйкилум, āнум ул саватэ̄лын.

8Та торыг Ӣсус тавēн лāвыс:

— Куль, ты хумныл, кон-квāлэн!

9Тав Ӣсусын китыглавес:

— Наӈ намын мāныр?

Тав Ӣсус нупыл ювле-лāвыс:

— Ам намум Легион. Мāн сака сāвыг ōлэ̄в.

10Куль Ӣсус нупыл пойксяӈкве патыс, ты ōлнэ мāныл тав ул вос ня̄влаве.

11Ты торыг ур пōхат яныг пӯрысь аня пум тэ̄с.12Сāв кулит Ӣсус пōйкуӈкве патсаныл:

— Мāнав ты пӯрсит кӣвырн сялтуӈкве лāвēлын!

13Ӣсусын тāн лāввēсыт. Хумныл кон-квалумкулит пӯрсит кӣвырн та сялтсыт. Ань кит сōтыра пӯрысь ур аланыл витн та лайхатасыт, витн сялтсыт.14Пӯрысь ӯрнэ хōтпат ляпат ōлнэ павлыӈ ос ӯсыӈ мирн ты урыл потыртасыт. Мāхум сунсуӈкве ёхтысыт, ань мāныр нак ēмтыс.15Тāн Ӣсус пāлт ёхтысыт, сунсэ̄гыт, Легион нампа куль ōньсюм хум ань масхатым ос номтыӈы̄г-сайтыӈы̄г унлахōлы. Мāхум хот-рохтысыт.16Ты нак вāсиньтам мāхум мōт хōтпатын ты урыл потыртāлыглāлсыт.17Ты нак ōлум юи-пāлт мāхум Ӣсус пōйкуӈкве пат-саныл: Тав тāн ōлнэ мāнылныл пōхан вос мины.

18Тувыл кулянэ кон-ня̄влым хум Ӣсус ёт минуӈкве воратас. Ӣсусын тав ёт ат вуйвес.19Ань хум нупыл тох лāвыс:

— Наӈки ляпа мāхманын пāлт юв-минэн! Тāнанылн потыртэн, Кӯсяй хумус наӈын сāлитастэ ос наӈ мāгсылын мāныр вāрыс.

20Хум минас. Тав Декаполис нампа мāт потыртаӈкве патыс, Ӣсус тавēн мāныр вāрыс. Мир пуссын сака осятахтыглāлсыт.

Āгирись хумус нōх-ялты ос Ӣсус āгмыӈ нэ̄ хумус пусмалты

21Ӣсус хāпыл ся̄рысь та-пāлныл ювле-ёхтыс, сāв мир Тав мӯвлахитэ ōс атхатас. Тав ся̄рысь вāтат ōлыс.22Синагога акв пуӈкхум Яир тув ōс ёхтыс. Ӣсус кāсаламēт та пуӈкхум Тав лāглаге пāлт рагатас,23Таве пōйкуӈкве патыстэ:

— Ам āгим хотталь ты сялты. Таяныт ёмас варēн, ёхтэн! Āгим кāтыл пиным пусмалтэ̄лын. Лылытэ вос нэ̄глы, āтимы̄г ул вос ēмты.

244Ӣсус тав ётэ минас. Тав юи-пāлэ̄т сāв мир нё̄рыглас.25Мир халт акв нэ̄ ё̄мыс. Тав китхуйплувтал кēлпе нэ̄гылтавес.26Сāв лēккарытн кос пусмалтавес, сāв олын ойтыс, пӯстагыл ат ēмтыс, āкваг вāгтал та патыс.27Ӣсус мир пусмалтанэ̄тэ урыл та нэ̄ хулыглāлыстэ, таимāгыс тав Ӣсус маснутанэ карссатаптыглаӈкве таӈхыс.

28— Ам тӯп Тав маснутанэ карссатаптыянум-ке, тōнт пусмēгум, — ань нэ̄ нōмсыс.

29Та нэ̄ кēлпе тāра-та ёл-пōйтыс. Тав ань торгамтастэ, тав та пусмалтавес.

30Ӣсус хунь торгамтастэ, Тавēныл ё̄р та минас, Тав мāхум нупыл āӈкватас ос китыглахтас:

— Хотъют Ам маснутум палт карссатаптахтыглас?

31Тōнт ханистахтын хумиянэ Тавēн лāвсыт:

— Наӈ наӈки сунсэн, мансāвыт мир Наӈ палтын марылтахтэ̄гыт, Наӈ тай китыглахтэ̄гын: “Хотъют Ам палтум карссатаптахтыглас?”

32Та хōтпа кинсым Ӣсус мӯвлахи сунсыглахтас.33Та нэ̄ рохтыс ос тōргым Ӣсус пāлт ё̄мыс, Тав лāглаге палт рагатас. Тав ётэ мāныр ēмталас, пуссын потыртастэ.34Ӣсус тавēн лāвыс:

— Āгикве, наӈ Тōрумн агтнэ вāрмалин пусмалтавēсын. Тōрум ёт минэн! Пӯстāгыл ōлэн!

35Ань Ӣсус ты нэ̄ ёт потыртамēт синагога пуӈкхум колэ̄ныл ля̄ххал тотнэ хумыт ёхтысыт ос лāвсыт:

— Наӈ āгин āтимыг ēмтыс. Ханисьтан хумн наӈ торас манрыг иӈ вāрēгын?

36Ань Ӣсус ты лāтӈыт хӯлманэ порат синагога пуӈкхум нупыл тох ты лāвыс:

— Ул пилэн! Тōрумын тӯп агтэн!

37Тав юи-пāлэ̄т нэ̄мхотъютын йиӈкве ат тāртахтас. Тав туп Пēтр ос каӈкы̄г-апсиы̄г Яков ос Иоан ёт вōвсанэ.38Тāн синагога пуӈкхум колэ̄н ёхтысыт. Тот мāхум накын патмыт. Тāн сака лю̄сьсыт.39Ӣсус кол кӣвырн сялтыс ос тāнанылн лāвыс:

— Нāн манры̄г лю̄ньсегы̄н. Ня̄врам āтимыг ат ēмтыс. Тав нас ёл-ойилматвес.

40Мāхум Тавēтыл мувиньтасыт. Ӣсус мāхум пуссын кон-кēтсанэ, туп āгирись ся̄няге-āсяге ос Тав ётэ ōлум хумиянэ юн-хультуптасанэ. Тувыл Тав āгирись ōлнэ колнакын сялтыс.41Āгирись кāт вистэ, лāвыс: “Талифа куми!” Ты тох толмасьлаве:“Āгирись, Ам наӈын лāвēгум, нōх-лю̄лен!”

42Āгирись тāра-та нōх-лю̄лис ос ё̄мыгтаӈкве патыс; тав китхуйплувкем тāлэ ōлыс. Сунсум мир пуссын сака осятахтыгласыт.43Ӣсус тāнанылн ты урыл нэ̄мхотъютын потыртаӈкве ат тāртахтас. Тувыл Тав āгирись тэ̄нутыл миӈкве лāвыстэ.


*а 5:9 легион — хот сотыра

*б 5:20 Декаполис — лов-ӯс


предыдущая глава Глава 5 следующая глава