Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРК ХУМ ХАНСУМ ЁМАС ЛЯ̄ХХАЛ

Глава 4

Колас-сам ӯнттум хум

1Ӣсус ся̄рысь вāтат мир ханисьтаӈкве ōс та патыс. Тав мӯвлахитэ̄т сака сāв мир атхатасыт, таимāгыс Тав хāпн тāлыс. Атхатам хōтпат нāлми вāтат лю̄ляхōлсыт.2Ōс сāв ханисьтан потыр тāнанылн потыртас:

3— Хунтлэн, ань колас-сам ӯнттум хум тэ̄пканэ̄н колас-самыт пāхтуӈкве минас.4Матахкем самкве лё̄ӈх похан рагатасыт, та колас-самыт ӯйрисытын юв-тāяпавēсыт.5Тōва колас-самыт āхвтасыӈ мāн рагатасыт. Тот ань мā вōвта ōлыс, таимāгыс тот колас-самыт молях яныгмасыт.6Тӯп ань хōтал рēгыл та ня̄ньпум тарсыт тув-тōссыт, тāраныл тӯпкамыт ōлсыт.7Тōва колас-самыт пēлялахтын йӣв сяхыл халн рагатасыт ос тот яныгмасыт, тāн порс-пумын тармыл яныгмавēсыт. Та колас-самыт тэ̄нутыг ат яныгмасыт.8Ань тōва колас-самыт пōртыӈ мāн рагатасыт. Тāн нōх-нэ̄глысыт, яныгмасыт ос тах: ман вāт, тав ман хōтпан, тав ман яныгсāткем сёс сāвнувēг ēмтыт.

9Тувыл Ӣсус тāнанылн лāвыс:

— Хотъют паль оньси, Анум вос хӯлытэ!

10Ётылнув, мире минам юи-пāлт китхуйплув ханисьтахтын хумиянэ ос мōт хōтпат Ӣсус ханисьтан потре урыл китыгласаныл.

11Ӣсус тāнанылн лāвыс:

— Тōрум ōлнэ хōн-мā ситам наке мир пуссын вāӈкве ат вēрмияныл. Туп нāн вāглын. Тōрум ōлнэ хōн-мā коны-пāлт ōлнэ мāхум ты ситам нак ат торгамтыяныл.

12
“Тан саманыл сунсэ̄гыт ос ат касалэ̄гыт.
Паляныл хунтлэ̄гыт ос ат хулэ̄гыт,
ат торгамтэ̄гыт. Тōрум пāлт ёӈхегыт-ке,
кареканыл ат ёрувлавет”.

13Тувыл Ӣсус тāнаныл китыгласанэ:

— Нāн ты ханисьтан потыр ман ōс ат торгамтаслын-а? Мōт ханисьтан потранум нāн хумус торгамтыяны̄н?14Колас-сам ӯнттум хум Тōрум лāтыӈ хӯлты.15Лё̄ӈх пōхан ӯнттым колас-самыт — тай тамле мāхум, хотъютыт лāтыӈ хӯлэ̄гыт. Тувыл та лāтӈе сымēныл сатанан армалтаве.16Āхвтасыӈ мāн ӯнттым колас-самыт — тай тамле мāхум урыл, хотъютыт лāтыӈ хӯлэ̄гыт. Тувыл та лāтыӈ сымн та выгāныл.17Туп тāн тāр ат ōньсегыт, таимāгыс хоса ат вēритэ̄гыт. Лāтыӈ мāгыс тāрвит пора ēмтнэ торыг, тāн аквтаторыг та лāтӈаныл хот-воратэ̄гыт.18Мōт колас-самыт пēлялахтын йӣв сяхлыт халн рагатэ̄гыт. Тай тамле мāхум, хотъютыт лāтыӈ хӯлыяныл кос,19ос тāн лāтӈаныл порт ат ōньсēгыт. Кāсыӈ хōтал сāв рӯпата ōсьнэ̄ныл мāгыс ос сёлыӈы̄г ōлуӈкве тахнэ̄ныл мāгыс лāтӈаныл хоса ат вēриты.20Пōртыӈ мāн патнэ колас-самыт — тай тамле мāхум, хотъютыт лāтыӈ хӯлыяныл ос сымнанылн выганыл. Та мāхум ман вāт, ман хōтпан, ман ос яныгсāт савнувēг ēмтсыт.

Пос урыл

21Тувыл Ӣсус тāнаныл китыгласанэ:

— Ань исвеся хунь пēламтаве, тав ман койка ёлы-пāлн манос āны кӣвырн хунь тӯсьтаве? Исвеся, алам, тамле мāн тӯсьтаве, хотыл тав посты.22Мāныр сытамы̄г ōлы, ётыл пуссын ос нэ̄глы тах.23Хотъют паль ōньси, Анум ёмсякв хӯлытэ тах!

24Тав тāнанылн лāвыс:

— Номсахтэ̄н, нāн мāныр хулэ̄гы̄н. Манхурип мōртмилыл нāн мортэгы̄н, тамле мōртмилыл нāнан ювле-мōртавēн, ман ос тувныл сāвнувыл мортавēн.25Хотъют матыр ōньси, тавēн савнувег миве. Нэ̄матыр ōсьнэ хōтпа, юи-ōвыл ōсьнутэ виве.

Колас-самыт урыл

26Ӣсус лāвыс:

Тōрум ōлнэ хōн-мā — таи аквтуп хунь э̄лумхōлас колас-сам ӯнтты.27Э̄тэ мины, хōталэ мины. Э̄лумхōлас ёл-хуи, нōх-квāлы. Колас-сам хумус яныгми, тав таи ат вāгтэ.28Мā такви янмалты. Ōвлэ̄т ня̄рпум тальхе нэ̄глы. Та юи-пāлт ня̄рпум колас-самын яныгмаве. Тувыл колас-саманэ янгы̄г та ēмтэ̄гыт.29Хунь ня̄ньпум яктын пора ёхты, тав тāра-та хӯтмилыӈ касайл ёхты, ня̄ньпум якытлаӈкве та ōвылтахты.

Корчица-сам урыл

30Ӣсус лāвыс:

— Мāныр ёт Тōрум ōлнэ хōн-мā мōртуӈкве рōви? Мāныр сирыл таве хӯлтуӈкве рōви?31Тав корчица-сам хурип. Корчица-сам мāн пиннэ̄тэ порат мōт янмалтан самытныл сяр мāнь.32Тав хунь яныгми, тōнт мōт пумытныл сяр янгы̄г ēмты. Тав яныг тованэ халт сāвсыр товлыӈ ӯйит пити вāруӈкве вēрмēгыт.

33Ӣсус сāв тамле ханисьтан потрыт мāхумн потыртас. Тав тасавыт потыртāлыс, мансāвыт тāн торгамтаӈкве вēрмысыт.34Тав ханисьтан потрыттāл тāнаныл нэ̄мхуньт ат ханисьтāлсанэ. Ханисьтахтын хумиянэ ёт хунь Тав тактēтэ хультыглāлыс, тōнт Тав потранэ тāнанылн пуссын толмасьлāлыглāсанэ.

Ӣсус яныг вōт ёл-пōилты

35Акв та хōтал, э̄типāлаг, Ӣсус ханисьтахтын хумиянэ нупыл лāвыс:

— Ся̄рысь та-пāлн хāпыл унсэ̄в.

36Ханисьтахтын хумиянэ̄н мāхум лāкква-тартвēсыт. Тāн хāпн тāлсыт. Тот ань Ӣсус ōлыс. Мōт хāпыт тāн ётаныл ōс минмыгтасыт.37Яныг вōт хояс. Хумпыт хāп ēрн хōюӈкве патсыт. Хāп витн āмараӈкве патвес.38Ӣсус та хāп пōсумыт осмаг матыр пиным хуяс. Хот-рохтум юртанэ Таве нōх-сāйкатасаныл:

— Ханисьтан хумув! Наӈ ман тэ̄лан āтим, мāн алам ты āмаравēв, порсэ̄в!

39Ӣсус нōх-квāлыс, вōт ёл-поилттастэ ос ся̄рысь нупыл кантыӈыс лāвыс:

— Астал ōлэн! Ёл-пōйтэн!

Ань вōт холас, сяр таванты̄г та ēмтыс.

40Ӣсус тāнанылн лāвыс:

— Нāн мāнры̄г тох рохтысы̄н? Нāн ань Тōрумн агтнэ вāрмалин хōт ōлы?

41Хот-рохтум юртанэ халанылт китыглахтасыт:

—Тав аман хōӈха? Вōтын ос ся̄рысн Тав хӯнтлаве?


*а 4:1 колас-сам ӯнттум хум — ты русь лāтӈыл сеятель

*б 4:11 ситам нак — ты русь лāтӈыл секрет

*в 4:24 мōртмил — ты русь лāтӈыл мера

*г 4:26 Тōрум ōлнэ хōн-мā — ты русь лāтӈыл Царство Божье

*д 4:30 корчица — ты русь лāтӈыл горчица


предыдущая глава Глава 4 следующая глава