Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JIÄVINDÜ IIVANALE

Глава 17

Vavilonan suudo

1Minun luo tuli üksi niilöis seiččemes anhelis, kudamil oli seiččie mal'l'ua, da sanoi: «Tule, minä ozutan sinule, mittuine suudo annetah sille suurele karguajale, kudai istuu vezien piäl,2sille, kudamanke karrattih muailman suarit, i kudaman karguanduviinal humalduttih muan eläjät.»3Hengi valdai minuu, i anheli vedi minuu elämättömäh muah.

Minä näin naizen, kudai istui tuliruskien zvierin selläs. Zvierih oli kaikkielpäi täüdenäh kirjutettu kirovonimie, i sil oli seiččie piädü da kümmene sarvie.4Naine oli šuoritettu purpuranruskieh da tuliruskieh sobah, čomendettu kullal, kallehil kivil da žemčugoil, a käis hänel oli kuldaine mal'l'u, kudai oli täüzi tülgevüttü da hänen karguanduligua.5Hänen oččah oli kirjutettu nimi, peittonimi: «Suuri Vavilon, karguajien da muailman tülgevüksien muamo».6Minä näin, se naine oli humaldunnuh jumalanuskojien verel da niilöin verel, kudamat saneltih tozi Iisussah näh. Hänen nähtüü minä diiviin sidä äijäl.

7Anheli sanoi minule:

«Mikse sinä diivit? Minä avuan sinule tämän naizen peittomerkičüksen dai sen zvierin peittomerkičüksen, sen, kudai kandau händü selläs da kudamal on seiččie piädü da kümmene sarvie.

8Zvieri, kudaman sinä näit, oli, no nügöi sidä ei ole. Se nouzou vie pohjattomas havvaspäi, no menöü häviendäh. Net muan eläjät, kudamien nimet ei ole kirjutettu elaijankniigah muailman luajindua müö, diivitähes zvierin nähtüü, sikse gu se oli, nügöi sidä ei ole, no sit se jiävihes.

9Täh pidäü äijü ellendüstü da mieldü. Seiččie piädü net ollah seiččie mätästü, kudamil istuu naine. Net ollah vie seiččie suarii:10viizi niilöis jo hävittih, üksi on, a üksi vie ei tulluh. Konzu häi tulou, hänen olenduaigu roih lühüt.11A zvieri, kudai oli da kudamua nügöi ei ole, on kaheksas suari; segi on üksi seiččemes da menöü häviendäh.

12Kümmene sarvie, kudamat sinä näit, ollah kümmene suarii, kudamat ei vie nostu valdah, no hüö suajah suarinvaldu da kodvaine pietäh valdua ühtes zvierinke.13Üksis mielin hüö annetah oma vägi da valdu zvierile.14Hüö kaikin ruvetah toruamah Vuonua vastah, no Vuonu voittau heidü. Häi vet on ižändien Ižändü da suariloin Suari, a Hänenke voitetah kučutut, vallitut da suremattomat.»

15Anheli sanoi minule:

«Viet, kudamat sinä näit, kus istuu karguaju, ollah muailman rahvahat, rahvasjoukot, muat da kielet.16A kümmene sarvie, kudamat sinä näit, da zvieri - hüö vihatah karguajua da kiškotah hänel sovat piäl, jätetäh händü alasti, süvväh hänen lihat da poltetah händü tuhkakse.17Jumal panou heijän südämih himon täüttiä Hänen mielet da üksis mielin andua suarinvaldu zvierile, kuni ei täütütänne Jumalan sanat.

18Naine, kudaman sinä näit, on se suuri linnu, kudai pidäü valdua muan kaikkien suariloin piäl.»


предыдущая глава Глава 17 следующая глава