Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JIÄVINDÜ IIVANALE

Глава 10

Anheli da torvikniigu

1Sit minä näin vie ühten vägevän anhelin, kudai heitüi taivahaspäi. Hänen sovannu oli pilvi, a hänen piän piäl oli ukonkuari, hänen rožat oldih gu päiväine, a jallat gu tulipaččahat,2käis hänel oli pieni avattu torvikniigu. Häi polgi oigien jallan merele, huran muale,3da kovah kirgui, kui ärizöü leijon. Hänen kirgujes paistih omil iänil seiččie jürüü.4Seiččemen jürün paistes minä varustimmos kirjuttamah, no sit kuulin taivahaspäi iänen, kudai sanoi: «Salbua pečatil se, midä sanottih seiččie jürüü, älä kirjuta!»

5Anheli, kudaman minä näin seizomas merel da mual, nosti oigien käin taivahahpäi6da andoi sanan Hänen nimel, sen, kudai eläü ainos dai ilmazen ijän, kudai on luadinuh taivahan da kai, midä sit on, muan da kai, midä sit on, meren da kai, midä sit on. Häi sanoi: «Aigua enämbi ei rodei!7No niilöil päivil, konzu kuuluu seiččemenden anhelin iäni, gu häi puhaldau torveh, sit täüttüü Jumalan peittopluanu ihan muga, kui Häi kuuloitti omile käsküläzile, omile iänenkandajile.»

8Iäni, kudaman minä kuulin taivahaspäi, rubei müös pagizemah minule: «Mene tuan anhelin luo, kudai seizou merel da mual da ota avattu torvikniigu, kudai on hänel käis.»9Minä menin anhelin luo da küzüin, gu häi andas minule sen torvikniigazen. Se vastai: «Ota da süö se. Vačas se rodieu kargei, no suus se rodieu magei gu mezi.»10Minä otin kniigazen anhelil käis da söin sen. Minun suus se oli magei gu mezi, no konzu minä söin sen, vaččua rubei kobristelemah.

11Minule sanottih: «Sinul pidäü viegi ennustua, midä rodieu muailman rahvahile, mualoile, kielile da suariloile.»


предыдущая глава Глава 10 следующая глава