Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JIÄVINDÜ IIVANALE

Глава 8

Seiččemes pečatti

1Konzu Vuonu avai seiččemenden pečatin, taivahas kai hil'l'eni, muga oli puolen čuasun verran.2Minä näin seiččie anhelii, kudamat seizottih Jumalan ies. Heile annettih seiččie torvie.

3Tuli vie üksi anheli da seizatui altarin rinnale, hänel oli kuldaine kuajinduast'e. Hänele annettih äijü luadanua, gu häi tuos sen ühtes jumalanuskojien malittuloinke altarile prestolan edeh.4I nouzi kuajindusavvu anhelin käis ühtes jumalanuskojien malittuloinke Jumalan edeh.5Anheli otti kuajinduastien, täütti sen altarispäi otetul tulel da lükkäi sen muale; i jürüü räčkütti, kuului iänii, tuldu iški i mua särizi.

Kuuzi torvensoittuo

6I net seiččie anhelii, kudamil oli seiččie torvie, varustettihes puhaldamah torvih.

7Enzimäine anheli puhaldi torveh. I tuli raistu da tuldu, verenke segai net oli lükättü muah. Kolmas vuitti muadu paloi, i kolmas vuitti puulois paloi, i paloi kai vihandu heinü.

8Toine anheli puhaldi torveh. I buitegu suuri tulel palai mägi lükättih mereh. Kolmas vuitti meres muutui verekse,9i kolmas vuitti kaikis meren elävis kuoli, i kolmas vuitti laivois hävii.

10Kolmas anheli puhaldi torveh, - taivahaspäi pakui suuri tiähti palajen gu tulirobl'o. Se pakui kolmandeh vuittih jogilois da vien nouzemile.11Sen tiähten nimi oli Kargei heinü, i kolmas vuitti kaikis vezis rodih kargei gu kargei heinü, i äijät rahvas kuoltih vien periä, gu se rodih kargei.

12N'elläs anheli puhaldi torveh. Sit hullai kolmanden vuitin päiväzes, kolmanden vuitin kuus da kolmanden vuitin tiähtis. Net pimettih kolmandeksel: kolmas vuitti päiväs oli pimei, muga pimeni i kolmas vuitti üös.

13Sit minä näin kotkan, kudai lendi keskitaivahal da kuulin, kui se kirgui kovah: «Gor'a! Gor'a! Gor'a niilöile, kudamat eletäh mual! Midä rodieu, konzu puhaldetah torvih vie kolme anhelii!»


предыдущая глава Глава 8 следующая глава