Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JIÄVINDÜ IIVANALE

Глава 4

Taivahallizen prestolan ies

1Sit minä näin, kačo vai, taivahas on uksi avvoi, i iäni, se samaine, rounogu torven iäni, kudaman minä kuulin pagizemas minunke jo enne, sanoi minule: «Nouze tänne! Minä ozutan sinule, midä pidäü roijakseh jälles tädä.»

2I kerras Hengi koppai minuu. Minä näin taivahas prestolan, i sil prestolal oli istuju.3Se istuju läpetti gu kallehet kivet, jašmu da sardis. Prestolas ümbäri oli smaragdan jütüi läpettäi ukonkuari.4Ümbäri täs prestolas oli kaksikümmen n'elli prestolua, i niilöil istui kaksikümmen n'elli vahnimua, kudamil piäl oli valgiet sovat, a piäs kuldaine venču.5Prestolas lähtiettih tuleniškut, iänet da jürüt. Sen ies oli seiččie palajua lampua, Jumalan seiččie hengie.6Vie sen ies oli gu st'oklaine meri, hrustalin jüttüine.

Prestolan ies da ümbäri oli n'elli eläviä, kudamat oldih tävvet silmiä iespäi da taganpäi.7Enzimäine oli gu leijon, toine - gu häkäččü, kolmandel oldih gu ristikanzan rožat, a n'elläs oli gu lendäi kotku.8Nämil n'elläl oli kuuzin siivin, kudamat oldih südämespäi dai ulgoči tävvet silmiä. Heittelemättäh, päiväl dai üöl nämä elävät sanotah:
- Pühä, pühä, pühä
on Ižändü Jumal, Kaikenvaldaine,
kudai oli, kudai on da kudai tulou!
9Ainos, konzu elävät ülendetäh, kunnivoijah da kiitetäh Händü, kudai istuu prestolal da kudai eläü ainos dai ilmazen ijän,10net kaksikümmen n'elli vahnimua langetah muale prestolal istujan edeh da ozutetah Hänele kunnivoičustu - Hänele, kudai eläü ainos dai ilmazen ijän. Hüö pannah omat venčat Hänen prestolan edeh da sanotah:11
- Ižändü, meijän Jumal!
Sinule maksau andua
ülendüs, kunnivo dai valdu,
Sinähäi olet luadinuh kaiken.
Kai rodih i kai oli luajittu
Sinun tahtos.


предыдущая глава Глава 4 следующая глава