Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE JEVREILÖILE

Глава 8

Uvven sovun ülimäine pappi

1Sanotun piälimäine mieli on tämä: meil on moine Ülimäine Pappi, kudai istuu taivahis Suuren Jumalan prestolan oigiel čural.2Sie Häi sluužiu taivahallizes pühäkois, sit toven pühästuanus, kudaman püstütti Ižändü, a ei ristikanzu.

3Joga ülimäine pappi on pandu tuomah lahjoi da žertvoi Jumalale, sikse meijängi ülimäzel papil, Iisusal, pidi olla midätahto tuodavua.4Gu Häi olis mual, ga ei ni olis papinnu, tiähäi jo ollah papit, kudamat tuvvah žertvulahjoi Zakonan mugah.5Hüö sluužitah pühäkois, kudai on vai taivahallizen kuvahaine. Olihäi Jumal sanonuh Moiseile, konzu häi rubei luadimah pühästuanuu: «Kačo, luaji kai sidä müö, midä sinule oli ozutettu mäil.»6No meijän Ülimäine Pappi, Iisus, on suannuh äijiä suuremban sluužbusijan migu toizet papit, sidä suuremban, midä suurembi on se sobu, kudaman tuojannu Häi on. Sen sovun pohjannu ollah parembat uskalmot.

7Gu enzimäzes sovus, kudaman Jumal luadii rahvahanke, ei ollus vigua, ga sit ei pidänüs eččie tostu sobuu sen sijale.8No Jumal löüdi vigua rahvahas. Häi sanoi:
- Kačo, tullah päivät, sanou Ižändü,
konzu Minä luajin Izrail'an da Juudan heimoloinke uvven sovun,
9ei mostu sobuu, mittuman luajiin heijän tuattoloinke
sennü päivännü, konzu otin heidü käis,
gu tuvva heidü iäre Jegiptan muaspäi.
Hüö ei püzüttü sit Minun sovus,
i sikse Minä hülgäin heidü,
sanou Ižändü.
10Se uuzi sobu, sanou Ižändü, kudaman Minä luajin
Izrail'an rahvahanke niilöin päivien jälles,
on tämä:
panen Minun zakonat heijän mielih,
kirjutan net heijän südämih.
Minä roimmos heijän Jumalakse,
hüö - Minun rahvahakse.
11Sit enämbi niken ei opasta tostu,
velli ei opasta vellie sanoil:
«Tunne Ižändiä»,
sikse gu kaikin pienimäs suurimah suate
jo tundietah Minuu.12Minä prostin heile heijän viärüöt,
engo musta heijän riähkii.
13Uvves sovus paistes Jumal ozutti, gu enzimäine sobu jo vahnani. A se, mi on vahnannuh da kulunuh, hävieü terväh.


предыдущая глава Глава 8 следующая глава