Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE JEVREILÖILE

Глава 3

Iisus on suurembi Moiseidu

1Sendäh tüö, pühät uskovellet, kudamii sežo kučui Taivahalline, kačokkua Iisussah, kudamua müö sanommo meijän apostolakse da ülimäzekse papikse.2Iisus oli surematoi ruadai sille, kudai Händü ruadoh pani, kui Moisei oli surematoi «kaikes Hänen koin kačondas».3No Iisus on suurembas kunnivos piettävü migu Moisei, sidä suurembas, midä suurembas počotas on koin luadii, migu kodi.4Tiettäväine, joga kodi on kenentahto luajittu, no Jumal on luadinuh kai.5Moisei oli surematoi kaikes Jumalan koin kačondas, no häi oli vai sen ruadai, oli elävännü merkinnü sit, mih näh Jumalal pidi sanella müöhembi.6A Hristos on Poigu, Hänen käzih on annettu Jumalan kogo kodi. A sennü koinnu olemmo müö, gu emmo nikonzu kaimanne rohkevuttu da nad'oužua, kudamah näh löühkämmö.

Jumalan rahvas piäzöü huogavumah

7On muga, kui sanou Pühä Hengi:
- Tänäpäi, gu kuuletto Hänen iänen,
8älgiä kovendakkua omua süväindü,
kui ruattih teijän tuatat, konzu hüö nostettih käzi Minuu vastah,
opittih Minun mielii elämättömäs muas.
9Sie hüö opittih Minun tirpandua,
hos nähtih Minun ruavot
n'ellänkümmenen vuvven aigua.
10Sikse Minä suutuin heijän piäle da sanoin:
«Ainos hüö ollah südämeči üöksüksis.»
Ei hüö nouttu Minun dorogoi,
11sikse Minä vihas annoin lujan sanan:
«Hüö nikui ei piästä
Minun huogavundukohtah.»
12Kačokkua, vellet, gu nikel teis süväin ei olis paha da uskomatoi i tüö etto kieldävüs eläväs Jumalas.13No avvutakkua toine tostu joga päiviä, kuni voibi sanuo «tänäpäi», gu riähkü ei muanittas nikedä teis da ei kovendas teijän süväindü.14Meilhäi roih ühtehine oza Hristosanke, gu vai voinnemmo loppuh suate püzüö sit uskos, kudai meil oli allus.15
Täh niškoi on sanottu nenga:
- Tänäpäi, gu kuuletto Hänen iänen,
älgiä kovendakkua omua süväindü,
kui ruavoitto silloi, konzu
nostitto käin Händü vastah.
16Ketbo luajittih nenga: kuultih, üksikai nostettih käzi Jumalua vastah? Kaikin net, kudamat Moisein vietettävinnü lähtiettih iäre Jegiptaspäi.17Kenen piäle Jumal oli vihas n'ellikümmen vuottu? Niilöin piäle, kudamat luajittih riähkiä da kudamien luut jiädih elämättömäh muah.18Kelle Häi andoi sanan, gu hüö ei piästä Hänen huogavundukohtah? Sanankuulemattomile.19Sen müö näimmögi: hüö ei voidu piästä sinne, gu ei uskottu.


предыдущая глава Глава 3 следующая глава