Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE TIITALE

Глава 2

Tervehet opastandat

1A sinä sanele sidä, mi on tervehii opastandoi müö.2Anna vahnat miehet ollah selgiel piäl, vagavumielizet, anna pietäh iččie käzis, ollah tervehet uskos, suvaičukses da keständäs.3Mugai vahnat naizet anna tietäh ičele hinnan, anna ei paista toizes pahua, ei lähtietä viinale selgäh, a ollah hüväh opastajinnu.4Sit hüö voijah n'evvuo nuorii naizii suvaiččemah omua ukkuo, suvaiččemah lapsii,5olemah vagavumielizennü da kaikes puhtahannu, pidämäh huoldu perehes, kuundelemah omua ukkuo. Sanele kaikkie tädä, ku Jumalan Sana ei rodies nagrettavakse.

6Nuorembii miehii sežo kehitä pidämäh mieldü piäs.7Kaikes ozuta omal elaijal, kui ruadua hüvii ruadoloi. Opastajes ole puhtassüdämelline da vagavu,8a sinun paginat oldahes tervehet da moittimattomat, sit sinun vastustajile rodieu huigei, gu ei voija meidü nimis viärittiä.

9Orjii opasta kaikes kuundelemah omii ižändii, ugodimah heile, ei kiistämäh,10ei varrastelemah, a ozuttamah iččie ainos suremattomannu da putillizennu. Sit hüö kaikes ülendetäh Jumalan, meijän Piästäjän, opastandua.

11Jumalan hüvüshäi jiäviihes piäzendäkse kaikile rahvahile.12Se hüvüs opastau meidü hülgiämäh jumalattomuon da sen, mi muailmas himoh panou, da opastau elämäh vagavumielizennü, oigiennu da Jumalua varuajannu täl mual,13kuni vuotammo suuren nad'oužan tulendua tovekse, suuren Jumalan da meijän Piästäjän Iisusan Hristosan taivahallizen valgien jiävindiä.14Häi andoi oman hengen meis tuači, gu piästiä meidü kaikes pahas da gu puhtastua meidü Hänen omakse rahvahakse, kudai rakkahal ruadau hüviä.

15Nenga pagize rahvahanke, kehitä da kohendele kaikel vallal, kudai sinul on, i anna niken ei paheksi sinuu.


предыдущая глава Глава 2 следующая глава