Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE TIITALE

Глава 1

Puavil tüöndäü tervehüttü Tiitale

1Minä Puavil, Jumalan käsküläine da Iisusan Hristosan apostol tüönnän tervehüttü sinule, Tiittu. Minuu on tüöttü, gu kehittiä Jumalan vallittuloi uskomah Häneh da tundemah toven, kudai vedäü jumalahizeh elaigah.2Sit hüö voijah nad'eijakseh ilmanigäzeh elokseh. Jumal, kudai ei kielasta, enne aijoin alguu uskaldi sen eloksen meile,3a omal aijal jiävii tämän viestin, kudaman sanelemine on annettu minule Jumalan, meijän Piästäjän, käsküs.4Sinä, Tiittu, olet meijän ühtehizen uskon täh minule gu oma poigu. Armuo da rauhuttu Jumalas, Tuataspäi da Hristosas Iisusas, meijän Piästäjäspäi!

Tiitan ruado Krital

5Jätin sinuu Kritale sih niškoi, gu sinä luadizit sie kai, midä on vie luadimattah, da gu panizit linnoi müö uskojien kanzukunnile vahnimat juuri muga, kui minä käskin.6Vahnimannu voibi olla moittimatoi mies, ühten akan ukko. Hänen lapsil pidäü olla Jumalan uskojinnu, a ei moizinnu, kudamii suau soimata vällillizikse libo sanankuulemattomikse.7Kanzukunnan kaččojalehäi on annettu Jumalan ruado, sikse hänel pidäü olla moizennu, kudamua ei sua moittie nimis. Anna häi ei olis omanenäine, ruttotabaine, juomari, toračču, libo moine, kudai muanivol tahtou hüödüö.8A hänel pidäü olla rahvahan suvaiččijannu, hüväntahtojannu, vagavumielizennü, oigieh eläjännü, jumalahizennu da hänel pidäü pidiä iččie käzis.9Hänel pidäü püzüö uskottavas sanas, kudamah on opastettu, ku häi vois toizii n'evvuo tervehel opastandal da ozuttua vastahsanojile, mis hüö ollah viärät.

10On äijü vällillistü, tühjän pagizijua da muanittajua, semmite ümbärileikattuloin uskojien keskes.11Heil pidäü salvata suut, sendäh ku hüö uraitetah kogonazii perehii, opastajen midä ei pidäs, ku olis vai ičele hüödüü.12Onhäi üksi kritalazis, heijän oma ennustai sanonuh:
«Kritalazet ollah ainos kielahat,
pahatabazet gu zvierit,
täüdümättömät da laškat.»
13I se on tozi. Sendäh kiännütä heidü oigiele dorogale lujal sanal, ku hüö roittas tervehet uskos.14Anna hüö ei kuunnella jevreilöin zuakkunoi da niilöin rahvahien käskendöi, kudamat kiännüttih iäre toves.15Puhtahile on kai puhtas, a paganoile da uskomattomile ni mi ei ole puhtas, heijän mieli dai hengi on rikottu.16Hüö sanotah buite tundietah Jumalua, a omil ruadoloil hüö kieldävütäh Hänes, ku ollah ilgiet da sanankuulemattomat eigo pätä nimittumah hüväh ruadoh.


предыдущая глава Глава 1 следующая глава