Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE TIMOFEILE

Глава 5

Ole kaikkienke gu omienke

1Älä kovah čakkua vahnua miestü, a kehitä händü gu omua tuattua, nuorembii miehii kehitä gu omii vellii,2vahnoi naizii - gu omua muamua, nuorembii naizii kehitä gu sizärii, puhtahal mielel kaikes.

Kui pidiä huoldu leskis

3Pie huoldu ihan üksinäh jiännüzis leskis.4No gu leskel ollou lastu libo vunukkua, anna enzimäi hüö opastutah luadimah omale perehele sidä, midä uskojil pidäü luadie, da maksamah vahnembien vaivois. Se on Jumalale mieldü müö.5Üksin jiännüh putin leski nad'eičeh Jumalah, pokoroičeh da molihes heittelemättäh üöt dai päivät.6A leski, kudai eläü magiedu elaigua, on jo hengis olles kuolluh.7Anna heile nämä käsküt, gu elettäs moittimattominnu.8No ken ei pie huoldu omahizis da semmite omas perehes, se on hüllännüh uskon da on pahembi ihan uskomattomua.

9Leskien luguh pidäü ottua vai moine leskinaine, kudai on jo täüttänüh kuuzikümmen vuottu, kudai on olluh ühten ukon akannu,10kudamua tundietah hüvis ruadolois, sit gu kazvatti lapsii, vastai hüvin matkalazii, pezi jumalanuskojien jalgoi, avvutti niilöi, kel oli jügei, da ruadoi äijän muudu hüviä.11Nuorembii leskii älä ota luguh. Konzu havačutah heijän rungan himot, hüö vieravutah Hristosas da ruvetah tahtomah miehele.12Muga hüö roijah viärät, gu hüllättih se, midä enzimäi uskaldettih Jumalale.13Sen piäle hüö harjavutah kävelemäh talois taloih da roijah laškoikse, da ei vai laškoikse, a vie ruvetah kandelemah kielii, seguomah toizien dieloloih da pagizemah mostu, midä ei suas paista.14Sikse tahton, gu nuoret lesket mendäs miehele, suadas lastu da kačottas kodii i ei annettas vastustajile valdua paista meis pahua.15Erähät, kačo, jo kiännüttih kuundelemah sattanua.16Gu keltahto uskojis naizis ollou omahizien keskes leskinaizii, anna häi pidäü huoldu heis. Heijän täh ei pie vaivata uskojien kanzukundua. Anna kanzukundu pidäü huoldu ihan üksinäzikse jiännüzis leskis.

Kanzukunnan vahnimat

17Vahnimile, kudamat hüvin vietäh uskojien kanzukundua, maksau andua kunnivo dai hüvä palku, semmite niilöile, kudamat ruatah jügiedü ruaduo, gu sanellah jevangeliedu da opastetah.18Onhäi sanottu Pühis Kirjutuksis: «Älä sivo puimas olijal häkil suudu» da «Ruadai on lunnastannuh palkan.»19Älä kuundele, konzu mistahto viäritetäh vahnimua, gu ei olle kahtu libo kolmie tovestajua.20Riähkänluadijoi n'evvo kaikkien ies, gu muutgi varattas.21Jumalan, Hristosan Iisusan da vallittuloin anheliloin ies vagavah käsken sinule noudua nämii n'evvondoi, ei ühtüö ni ühteh ni toizeh, eigo puolistua sidä, kedä käsköü sinun mieli.22Älä huolita panna käzii nikenen piäle, gu ottua händü Jumalan ruadoh, älä seguo toizien riähkih. Pie iččie puhtahannu.23Iellehpäi älä juo vai ühtü vettü, a ota vähäine viinua vačan täh da puaksuh olijoin vaivoin täh.

24Erähien riähkät ollah nägevis i vietäh heidü suudoh kerras, a toizien riähkät avavutah müöhembi.25Muga i erähät hüvät ruavot ollah nägevis, a toizet ei olla nägevis, no netgi ei voija püzüö peitos.


предыдущая глава Глава 5 следующая глава