Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE TIMOFEILE

Глава 3

Mittumannu pidäü olla uskojien kanzukunnan kaččojal?

1Uskottavu on sanondu: ken tahtou piästä uskojien kanzukunnan kaččojan ruadoh, se hüväh ruadoh tahtou.2Kanzukunnan kaččojannu pidäü olla mies, kudamua ei ole mis moittie, ühten naizen ukko, selgiel piäl da oigieh eläjü, vagavumieline da ičenkaččoi, rahvahansuvaiččii da hüvä opastai,3ei humalniekku, ei toračču, a hil'l'aine da hüväsanaine, i ei d'engansuvaiččii.4Hänel pidäü hüvin pidiä käzis omua perehtü, kaččuo, gu lapset kuultas sana da počitoittas kaikkii.5Gu ken ei voinne pidiä käzis omua perehtü, kuibo sit häi voibi huolie Jumalan kanzukundua?6Kaččojannu ei sua olla vaste uskoh kiändünüöl, gu häi ei rodies ülbiekse da ei rodies suuditukse moizel suvvol kui pahalaine.7Hänel pidäü olla hüväl kuulužu uskojien kanzukunnan ulgopuolelgi, gu hänes ei paistas pahua da gu häi ei puuttus pahalazen verkoloih.

Mittumannu pidäü olla diakonal?

8Mugai diakonoinnu oldahes počitoitut ristikanzat, ei kaksikielizet, ei juomarit, ei ahnehet eloloih.9Heil pidäü pidiä uskon peittodielo riähkättömäs henges.10No heidügi pidäü enzimäi hüvin kaččuo, i gu heidü ei olle mis moittie, vaste sit tartuttahes diakonan ruadoh.11Muga i naisdiakonoinnu oldahes počitoitut ristikanzat. Heil ei sua paista toizis pahua. Heil pidäü olla selgiel piäl da kaikes suremattomannu.12Diakonal voibi olla vaiku üksi akku, hänel pidäü hüvin pidiä käzis lapsii da taloidu.13Net, ken hüvin ruatah diakonan ruado, suajah ičele korgei sija rahvahan silmis da voijah julgieh sanella uskoh näh, kudai heil on Hristossah Iisussah.

Uskon peittodielo

14Kirjuttajes tädä sinule, nad'eičemmos, gu terväh piäzen sinun luo.15A ku hätkestünnen, sinä tiijustat täs kirjazes, kui pidäü vediä iččie Jumalan talois, kudai on elävän Jumalan kanzukundu, toven pačas da alustu.16Kiistämättäh, suuri on meijän uskon peittodielo:
Häi jiäviihes ristikanzan rungas,
Händü ozutti oigiekse Hengi, anhelit nähtih Händü,
Häneh näh saneltih Jumalua tundemattomile rahvahile,
Häneh uskottih muailmas,
Händü otettih taivahallizeh valgieh.


предыдущая глава Глава 3 следующая глава