Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE FILIPPALAZILE

Глава 4

Kehitändät

1Ga sit, vellet minun, kudamii minä suvaičen da atkaloičemmos, tüö, minun ilo dai kunnivovenču, püzükkiä lekahtamattah Ižändäs, armahat!2Kehitän Jevodiedu da kehitän Sintihiedu elämäh sobuh Ižändän täh.3Küzün sinuugi, minun surematoi ruadovelli, avvuta nämii naizii, kudamat ühtes minunke torattih jevangelien puoles, muga kui torattih Klemens da toizet minun ruadovellet, kudamien nimet ollah elaijan kniigas.4Piekkiä ainos hüviä mieldü Ižändäs! Uvvessah sanon: piekkiä hüviä mieldü!5Anna teijän vačan pehmehüs tiijustetah kai rahvas. Ižändü on lähäl.6Älgiä huolikkua nimidä, a avakkua ainos Jumalale, midä teile pidäü, molijen da pakiten kiitändänke.7Sit Jumalan rauhus, kudai on korgiembi kaikkie ristikanzan ellendüstü, kaččou da vardoiččou teijän süväindü da teijän mielii, i tüö püzüttö Hristosas Iisusas.

8Da sit vie, vellet, sanon: duumaikkua kaikkie, mi on tozi, mi on čestis piettävü, mi on oigei, puhtas, suvaittavu da hinnois piettävü, mi vai on hüvä da midä maksau kiittiä.9Ruadakkua sidä, midä opastuitto da otitto minus, midä minus kuulitto da näittö. Sit rauhan Jumal on teijänke.

Puavil kiittäü filippalazii heijän lahjas

10Minä ihastuin ülen äijäl Ižändäs, gu teijän huoli minus jälgimäi uvvessah puhkei kukkah. Tüöhäi ainos tahtoitto avvuttua minuu, no enne etto voinnuh.11Tädä en sano sikse, gu minul olis min hädä; minä olen harjavunnuh elämäh sil, midä on.12Tiijän, mi on eliä köühüös, tiijän, mi on eliä bohattuos. Harjavuin kaikkeh da kaikenjüttümäh: süömäh külläl dai nägemäh n'älgiä, elämäh küllüös dai hiäs.13Kai minä voin Hänen avul, kudai andau minule vägie.14No tüö ruavoitto hüvin, gu avvutitto minuu ahtahal aijal.15Tüö, filippalazet, ičegi tiijättö, kui jevangelien alguaijoil, konzu minä lähtin Makedoniespäi, ni üksi uskojien kanzukundu ei andanuh minule jevangeliedu vastah d'enguabuu, sen luajiitto vai tüö.16Konzu minä olin Fessalonikas, tüö sinnegi tüönnittö minule abuu kerran-toizen.17No en minä teis lahjoi eči, tahton vai, gu teijän d'engat tuodas teile suuren korroteksen.18Minä sain tävven maksun da vie enämbängi. Minul on kaikkie kübimänkülläl, gu sain Epafrodital teijän tüötüt lahjat. Net ollah hüvä duuhu, pädii žertvu, ollah Jumalale mieldü müö.19Minun Jumal Hristosan Iisusan kauti andau teile omas suures bohattuospäi kaikkie, midä teile vai pidänöü.20Kunnivo Jumalale, meijän Tuatale, ainos dai ilmazen ijän! Amin'.

Jälgimäzet sanat

21Sanokkua tervehüttü kaikile Hristossah Iisussah uskojile. Vellet, kudamat ollah minun luo, tüötäh teile tervehüttü.22Kai tägäläzet uskojat tüötäh teile tervehüttü, semmite net, kudamat sluužitah keisarin talois.

23Ižändän Iisusan Hristosan hüvüs olgah teijän hengenke!


предыдущая глава Глава 4 следующая глава