Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE EFESALAZILE

Глава 6

Lapset da vahnembat

1Lapset, kuunnelkua vahnembii Ižändän täh, gu muga käsköü oigei elaigu.2«Pie hüvännü tuattua da muamua,» on enzimäine käskü, kudamanke on annettu uskalmo:3«gu sinule rodies hüvä da voizit hätken eliä mual.»4A tüö tuatat, älgiä nostatakkua lapsis tabua, a kazvatakkua heidü opastajen da n'evvojen Ižändän tahton mugah.

Orjat da ižändät

5Orjat, kuunnelkua omii muallizii ižändii. Varakkua da počitoikkua heidü puhtahal südämel, gu Hristossua,6ei vai heijän silmis gu ugodie heile, no Hristosan käsküläzinnü täütäkkiä Jumalan tahto kaikel südämel.7Ruadakkua oma ruado rakkahal, kui ruadazitto Ižändäle, a ei kui rahvahale.8Mustakkua: jogahine, ken luadiu midätahto hüviä, suau Ižändäspäi sit ruavos palkan, olgah häi orju libo vällü.9Mugai tüögi, ižändät, piekkiä nenga omii orjii, heitäkkiä heijän varaittelendu. Tiijättöhäi sen, teil dai heil on taivahis üksi Ižändü, Hänel ei ole ni parembii, ni pahembii.

Jumalan annetut toravehkehet

10Sanon lopukse: lujendakkua iččie Ižändäs, otakkua vägie Hänen suures väis.11Pangua piäle kai Jumalan toravehkehet, ku voizitto kestiä pahalazen muanittelendois.12Emmohäi müö torua ristikanzoinke, a toruammo valin da vägilöinke, tämän pimien muailman haldivoiččijoinke da taivahanalazien pahuon hengivalloinke.13Sendäh otakkua kai Jumalan toravehkehet, gu voizitto pahan päivän tulduu vastustua pahua da, kaiken ruattuu, püzüö püstüi.14Seizokkua lujannu! Pangua vüökse tozi da piäle oigien raudupaidu,15jallaččiloinnu olgah valmehus sanella rauhan jevangeliedu.16Otakkua ainos usko suojusravvakse, kudamal voitto sammuttua kai pahalazen tulihizet piilit.17Šlemakse vie otakkua piäzendü, i otakkua Hengen miekku - Jumalan sana.

18Luajikkua tämä kai malitunke, pangua malittuu da pokoroikkuattokseh ainos, kui käsköü Hengi. Olgua jallas da moliettokseh heittelemättäh kaikkien jumalanuskojien puoles.19Moliettokseh minungi puoles, anna minule, konzu rubien pagizemah, annettas sanat gu kuuloittua julgieh jevangelien peittomielii.20Jevangelien täh olen Hristosan tüötünnü, a nügöi olen türmäs. Moliettokseh, gu voizin paista julgieh, muga kui minul pidäü.

Jälgimäzet sanat

21A ku tüögi tiedäzittö, midä minule kuuluu da midä ruan, tulou teijän luo Tihikku, minun armas uskovelli da Ižändän surematoi käsküläine. Häi sanelou teile kai.22Tüönnän händü teijän luo juuri sikse, gu tüö suazitto tiediä, midä meile kuuluu, i gu häi alevuttas teidü.

23Jumal, meijän Tuatto, da Ižändü Iisus Hristos annettahes teile, vellet, rauhuttu, suvaičustu da uskuo.24Kaikkie hüviä Jumalaspäi kaikile niilöile, kudamat suvaijah meijän Ižändiä Iisussua Hristossua ilmanigäzel suvaičuksel!


предыдущая глава Глава 6 следующая глава