Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE KORINFALAZILE

Глава 12

Hengellizet lahjat

1A gu paista, vellet, Hengespäi tulluzis n'erolois, tahton, gu tüö tiedäzittö niilöih näh toven.2Tiijättöhäi, konzu tüö olitto vie Jumalua tundemattomat, teidü vedeltih kielettömien valehjumaloin luo, kui vai tahtottih.3Sendäh minä sanon teile, gu ellendäzittö: niken, kudai pagizou Jumalan Hengen vallas, ei sano: «Iisus olgah kirottu», i niken ei voi sanuo muite, gu vai Pühän Hengen vallas: «Iisus on Ižändü.»

4N'erot ollah kaikenjüttümät, a Hengi on üksi,5sluužindua on kaikenjüttümiä, no Ižändü on üksi.6Ruaduo on kaikenjüttümiä, no Jumal, kudai ruadau kaikis kai, on üksi.7Häi andau Hengele jiäviekseh jogahizes eri luaduh ühtehizekse hüvüökse.8Ühtele andau Hengen kauti mielevüön sanat, toizele - tiedoloin sanat sen samazen Hengen kauti.9Ühtele andau uskon sen samazen Hengen kauti, toizele - parandamizen n'erot sen Hengen kauti,10erähäle - luadie suurii ruadoloi; erähäle - väin olla Jumalan iänenkandajannu, erähäle - n'eron eroittua, mi on mis henges tulluh, erähäle - n'eron paista kielil, erähäle - n'eron sellittiä nämii kielii.11No kaiken tämän luadiu üksi samaine Hengi, kudai andau n'erot jogahizele, kui Häi tahtou.

Hristosan rungan ühtehüs

12Kui rungu on üksi, i sit on äijü kohtua, no kai net, hos niilöi on äijü, ollah üksi rungu - moine on Hristosgi.13Müöhäi kaikin olemmo ühtel Hengel ristitüt ühtekse rungakse, olemmogo sit jevreit vai gretsieläzet, olemmogo orjat vai vällät, i meile kaikile on annettu juvva ühtü Hengie.

14Eihäi rungu ole luajittu ühtes rungan palazes, a sit on äijü palastu.15Gu jalgu sanonou: «Minä en kuulu rungah, gu en ole käzi», ga eigo sit se üksikai kuulu rungah?16Gu korvu sanonou: «Gu minä en ole silmü, ga sit en kuulu rungah», ga eigo se sit kuulu rungah?17Gu kai rungu olis üksi silmü, kusbo sit olis kuulo? A ku kogo rungu olis üksi kuulo, kuibo sit n'uustazimmo?18No Jumal pani kai palazet rungah, kui Häi tahtoi.19Gu kai oldas vai ühtennü rungan palazennu, kusbo sit olis rungu?20No tälleh palastu on äijü, a rungu on üksi.

21Silmü ei voi sanuo käile: «Minule ei pie sinuu», eigo piä - jalloile: «Minule ei pie teidü.»22Vai ilmai niilöi rungan palazii, kudamat ozutetahes muidu vähävägizembännü, meil ei sua vältiä.23Net rungan palazet, kudamat meijän mieles ollah vähembäl počitoittavat, müö peitämmö suurel huolel. A net, kudamii huijustelemmokseh, peitämmö vie tarkembah.24Niilöi rungan palazii, kudamii emmo huijustai, ei pie peittiä. Jumal muga keräi tukkuh rungan, ga andoi suuremban počotan niilöile palazile, kudamii emmo pie hinnois,25gu rungas ei olis riidua, a kai palazet ühtenjütüi piettäs huoldu toine toizes.26Gu ollou gor'a ühtele rungan palazele, sit senke tirpetäh gor'ua kai palazet, a ku kudamale rungan palazele ozutettaneh čestii, sit kai palazet pietäh senke hüviä mieldü.

27Tüö oletto Hristosan rungu, a jogahine teis on sen rungan palaine.28Uskojien kanzukunnas Jumal enzimäzikse pani erähii apostoloikse, sit erähii Jumalan iänenkandajikse, ielleh erähii opastajikse, erähile andoi väin luadie suurii ruadoloi, erähile - parandamizen n'erot, a erähile - avvuttua toizile, erähile - n'eron ižändöijä, erähile - paista kielil.29Ollahgo kaikin apostolat? Ollahgo kaikin Jumalan iänenkandajat? Luajitahgo kaikin suurii ruadoloi?30Ollahgo kaikil parandamizen n'erot? Paistahgo kaikin kielil? Voijahgo kaikin sellittiä kielii?

31Ečikkiä parahii hengellizii n'eroloi! A minä ozutan teile kaikis parahan dorogan.


предыдущая глава Глава 12 следующая глава