Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE KORINFALAZILE

Глава 9

Apostolan oigevuot

1Engo minä ole vällü? Engo minä ole apostol? Engo minä nähnüh Iisussua, meijän Ižändiä? Eigo se ole minun ruavon tulos, gu tüö oletto Ižändäs?2Toinah muut ei pietä minuu apostolannu, no teijän kačo apostol minä olen. Tüö oletto pečatti, kudai lujendau sen, gu minä olen Ižändän apostol.

3Niilöin ies, kudamat minuu suuditah, minä puolistan iččie nenga:4Eigo meil ole valdua süvvä da juvva?5Eigo meilgi ole valdua matkois olles pidiä rinnal akku, uskosizär, kui ruatah muut apostolat, Ižändän vellet da Kifa?6Pidäügo vai meil Varnavanke suaha elätüs toizel ruavol?7Ken lähtöü sluužimah saldatakse omah d'engah? Ken viinumuarjupellon istuttahuu ei süö sen andimii? Libo ken paimendau lambahii da kozii da ei süö niilöin maiduo?

8En minä sanele täs vai ristikanzan mielii. Eigo Zakongi sano sidä?9Onhäi Moisein Zakonas sanottu: «Älä sivo puimas olijan häkin suudu.» Häkkilöigo Jumal täs huoliu?10Eigo Häi sano tädä juuri meih niškoi? Meih niškoihäi on kirjutettu: «Kündäjäl kündäjes da puijal puijes pidäü uskuo: häi suau täs oman vuitin.»11Gu müö külvimmö teih hengellizen, rodiesgo liigua, gu leikkuazimmo teis einehellizen?12Gu muil ollou valdu ottua teis midägi, eigo meil sidä enämbäl? No müö nikonzu emmo eččinüh tädä valdua, a kestämmö kai, gu ei panna nimidä Hristosan jevangelien tiele.

13Ettogo tüö tiijä, gu jumalankois ruadajat suahah sie elätüksen, a net, kudamat iškietäh žertvoi, suahah altarile tuodulois žertvois oman vuitin.14Muga Ižändü pani täsgi: jevangelien sanelii eläü jevangelien vuoh.15No minä nikonzu en ajanuh jälles ni ühtü nämis oigevuksis. En ni nügöi kirjuta sikse, gu net minule annettas. Parembi kuolen! Tädä ülbevüttü minul niken ei ota!16Sil, gu minä sanelen jevangeliedu, ei ole midä löühkiä, se ruado on minun ruattavu. Paha rodies minule, gu heittäzin jevangelien sanelendan!17Gu ruadanen sidä omal himol, minä suan palkan. A gu en rua omal himol, sit minä vai ruan minule annettuu ruaduo.18Mittuine sit on minun palku? Se palku on, gu minä sanelen jevangeliedu palkattah, engo eči nimidä, mih minul olis valdu jevangelien sanelijannu.

19Hos olen välläl kaikis, iče heitüin kaikkien käsküläzekse, gu suaha Hristosan puolele muga äijii, kui vai voibi.20Gu suaha jevreilöi Hristosan puolele, olin heile jevreinnü; gu suaha Zakonua müö eläjii, olin heile gu Zakonua müö eläi, hos iče en ole Zakonan alaine.21Gu suaha Zakonattah eläjii, olin heile gu Zakonattah eläi, hos en ole Zakonattah eläi - olenhäi Hristosan Zakonan alaine.22Gu suaha vähävägizii, olin heile gu vähävägine. Kaikile minä olin kaikennu, gu kuitahto piästiä hos erähii.23Kaiken tämän luajiin jevangelien täh sidä periä, gu ičegi suazin sen hüvüzii.

24Tiijättöhäi, kiistai juostes juostah kaikin, no voittajan venkan suau vai üksi. Juoskua sit muga, gu suazitto sen.25Joga kiistahjuoksii pidäü iččie käzis, ühtet sendäh, gu suaha venku, kudai on häviejü, a müö - gu suaha häviemätöi.26Sikse minä en juokse kui piäkandau, kulakkazilleh olles en tühjiä huškuta käzii.27Minä kulakoičen omua rungua da väistän sen omah valdah, eiga toizile jevangeliedu sanelles minuu iččie jätetäh bokkah.


предыдущая глава Глава 9 следующая глава