Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE KORINFALAZILE

Глава 8

Valehjumaloile tuodu liha

1Pidäü vie paista valehjumaloile tuoduh žertvulihah näh. Tiettäväine, müö kaikin tiijämmö täh niškoi. No tiedo luadiu ülbiekse, a suvaičus nostau.2Gu ken smiettinöü, buite tiedäü kuda-midä, se vie ei tiijä, kui pidäü tiediä.3No ken suvaiččou Jumalua, sen ristikanzan Jumal tiedäü.

4Valehjumaloile tuovun žertvulihan süömizeh näh sanon nenga: Müö tiijämmö, valehjumaloi ni olemas ei ole. On vai üksi Jumal, tostu ei ole.5I hos taivahas dai mual on muga sanottuu jumalua - onhäi äijü jumalua dai äijü ižändiä -6no meil on vai üksi Jumal, Tuatto. Hänes on lähtenüh kai, Häneh niškoi müö olemmo. Meil on vai üksi Ižändü, Iisus Hristos. Kai on luajittu Hänen vuoh, müö sežo rodiimmokseh Hänen vuoh.7No kaikin sidä ei tietä. Erähät valehjumaloih harjavunnuot, konzu süvväh žertvulihua, iellehgi duumaijah, se on niilöile jumaloile tuodu, i heijän hengi, gu on vähävägine, ga paganoittuu.8Ei süömine tuo meidü lähembäkse Jumalah. Gu emmo süönne, emmo menetä nimidä, gu süönnemmö, emmo sua nimidä.9No vardoikkuattokseh, gu tämä teijän vällüs ei rodies öntästüskivekse niilöile, kenen hengi on vähävägine.10Gu sinun vähävägine uskovelli nägöü sinuu, kudai tiijät tämän kaiken, süömäs valehjumaloin kois, eigo hänen vähävägine hengi sano hänele, gu häigi vois süvvä valehjumaloile tuoduu žertvulihua?11Nenga sinun tiedo vedäü häviendäh sen vähävägizen, sinun oman uskovellen, kudaman täh kuoli Hristos.12Gu tüö nenga luajitto riähkiä vellii kohti da satatatto heijän vähävägistü hengie, tüö luajitto riähkiä Hristossua vastah.

13Sendäh, gu kerran süömine öntäsköittäü minun vellie, minä nikonzu enämbiä en süö lihua, gu en öntäsköittäs händü.


предыдущая глава Глава 8 следующая глава