Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE KORINFALAZILE

Глава 6

Älgiä suudiettokseh vellenke

1Gu teijän keskes keltahto ollou mittuine riidudielo toizeh, kuibo julgenou häi lähtie sellittämäh sidä mieron suddien edeh? Mikse häi ei jätä sidä jumalanuskojien sellitettäväkse?2Ettogo tüö tiijä sidä, gu jumalanuskojat roijah kerran muailman suddikse? Gu tüö voitto suudie muailmua, ettogo sit pädis suudimah nämii tühjii dieloloi?3Ettogo tiijä, gu müö rubiemmo suudimah anheliloigi - emmogo sit vois suudie muallizii dieloloi?4No konzu teil on riidua mittumistahto muallizis dielolois, tüö otatto suddikse moizii, kudamil uskojien kanzukunnas ei ole nimittumua hindua.5Sanon tämän teijän huigiekse. Eigo teijän omas joukos ole ni ühtü mieleviä, kudai vois sellittiä uskovellien keskenäzet riijat?6Velligo vellenke suudihes da vie uskomattomien ies!

7Jo segi, gu tüö suudittokseh keskenäh, on teile menetüs. Eigo parembi olis tirpua viärüöt? Eigo parembi olis jiähä kiškotukse?8A tüö iče luajitto viärüttü da kiškotto muil, kai omil uskovellilgi.9Ettogo tiijä, gu viärüöl eläjät ei suaha kodivuittii Jumalan valdukunnas? Älgiä muaniettokseh! Ni karguajat, ni valehjumaloile kumardelijat, ni vierahan akanke maguajat, ni miehenke maguajat miehet,10ni vargahat, ni ahnahat, ni juomarit, ni koirijat da kiškojat ei suaha kodivuittii Jumalan valdukunnas.11Moizinnu erähät teis oldih enne, no nügöi teidü on pestü puhtahakse da jiäksittü Jumalale, i tüö rodiittokseh oigiet Ižändän Iisusan Hristosan nimes da Jumalan Hengen väil.

Ristikanzan rungu on Pühän Hengen kodi

12«Minul on valdu kaikkeh», no ei kai ole minule hüväkse. «Minul on valdu kaikkeh», no nimille ei pie andua valdua ičen piäl.13Süömizet ollah vaččah niškoi, vačču - süömizih niškoi, vai Jumal hävittäü sen dai tämän. No rungu ei ole karguandah niškoi, a on Ižändäh niškoi, i Ižändü - rungah niškoi.14Jumal nostatti kuollielois Ižändän i omal väil nostattau meidügi.15Ettogo tiijä, gu teijän rungat ollah Hristosan rungan palazet? Ottazingo sit Hristosan rungan palazet da ühtüttäzin karguajan rungah? Nikonzu!16Tiijättöhäi, ken ühtüü karguajah, roih hänenke üksi rungu. Onhäi sanottu: «Nämä kaksi roijah ühtekse rungakse.»17No ken ühtüü Ižändäh, on üksi hengi Hänenke.18Vältelkiättökseh karguandua. Kai muut riähkät, kudamii luadiu ristikanzu, ollah hänen rungan ulgopuolel, no karguaju luadiu riähkiä omua rungua vastah.19Vai etto tüö tiijä sidä, gu teijän rungu on teis olijan Pühän Hengen kodi? Tämän Pühän Hengen on andanuh teile Jumal. Tüö etto ole ičele ižändät,20sendäh gu Jumal osti teidü tävves hinnas. Eläkkiä sit omas rungas muga, gu Jumal rodies ülendettü!


предыдущая глава Глава 6 следующая глава