Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ENZIMÄINE KIRJAINE KORINFALAZILE

Глава 5

Karguandan suudindu

1Kaikkiel paistah, buite teijän keskes on karguandua, kai mostu karguandua, mittumua ei ole ni Jumalua tundemattomien rahvahien keskes: eräs eläü muamindamanke gu oman akanke.2A tüö vie suurendelettokseh, konzu parembi ollus itkie da ajua iäre omas joukos mies, kudai luadii nengostu.3Hos minä rungači en ole teijänke, minun hengi on teijänke, i minä, buitegu sie olii, olen jo suudinuh sen, kudai luadii mostu.4Konzu tüö kerävüttö ühteh Ižändän Iisusan nimes, i teijänke sie on minun hengi da Ižändän Iisusan vägi,5sit sidä miestü pidäü andua sattanale, gu hävies hänen rungu, a hengi piäzis Ižändän tulendupäivännü.

6Teijän löühkändü ei ole hüväkse. Ettogo tüö tiijä, gu n'äppine muijotestu muijottau kogo taiginan.7Kuavikkua iäre vahnu muijotes, gu teis rodies uuzi taigin. Ilmai muijotestu tüö jo olettogi, onhäi meijän Äijänpäivän Vuonu, Hristos, jo iškiettü.8Emmo sit rubie viettämäh Äijänpäivän pruazniekkua kaikenjüttümän pahuon vahnas muijotekses, a vietämmö muijoteksettah, puhtahuos da toves.9Kirjutin jo kirjazes teile, gu teil ei pidäs olla nimidä ühtehistü karguajienke.10En tarkoitannuh uskomattoman rahvahan keskes olijoi karguajii, ahnehii, kiškojii da valehjumaloile kumardelijoi, eiga teil pidäs lähtie kogonah iäre muailmaspäi.11A kirjutin täh niškoi: gu kedä sanotanneh uskovellekse, a häi on karguaju, ahneh, valehjumaloile kumardelii, koirii, juomari libo kiškoi, älgiä ühtükkiä häneh nikui. Ni süömäh älgiä ruvekkua hänenke.12Midä minul suudie ulgopuolizii? Ettohäi ni tüö suudi muidu, suuditto vai teijän joukkoh kuulujii.13Ulgopuolizii suudiu Jumal. «Ajakkua iäre teijän keskes se, kudai on paha.»


предыдущая глава Глава 5 следующая глава