Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

KIRJAINE RIIMALAZILE

Глава 12

Uuzi elaigu

1Jumalan suurien armoloin täh kehitän teidü, vellet: Annakkua omua iččie eläväkse da pühäkse, Jumalale mielužakse žertvakse. Nenga tüö mielenke sluužitto Jumalale.2Älgiä heitükkiä tämän muailman eländütaboih, a muutukkua, uvvistakkah Jumal teijän mielet, gu tiijustazitto, midä tahtou Jumal, mi on hüvä, mi on Hänele mieldü müö da kaikelleh moine, mittuine pidäü.

3Jumalan minule annetul armol sanon teile jogahizele: älgiä duumaikkua ičes liigua, enämbiä gu pidäü, a vai miärän mugah, jogahine sen uskon miärän mugah, kudaman Jumal hänele andoi.4Kui meil jogahizel on üksi rungu, no sit rungas on äijü palastu i joga palazel on oma ruado,5mugai müö kaikin Hristosas olemmo üksi rungu, no eriže müö kaikin olemmo toine toizele sen rungan palazet.6Omas hüvüös Jumal andoi meile eriluaduzet n'erot. Se, ken on Jumalan iänenkandajannu, olgah sennü sen uskon miärän mugah, kudai hänel on.7Sluužijan n'eron suannuh sluužikkah, opastajan n'eron suannuh opastakkah,8kehittäjän n'eron suannuh kehitäkkäh, ken andau, annakkah kaikes südämes, ken midä vedäü, vejäkkäh sidä tävvel väil, ken avvuttau köühii, avvutakkah hüväl mielel.

9Suvaičendas älgiä heitelkiättökseh. Vihakkua pahua, ripukkua hüväs.10Suvaikkua toine tostu hellästi kui vellet, kiistai počitoikkua toine tostu.11Älgiä olgua n'äivišköt sit, midä ruatto, anna palau teis Hengen tuli, palvokkua Ižändiä.12Hüväs mieles nad'eikkuattokseh Jumalah, kestäkkiä kai ahtistukset, moliettokseh heittelemättäh.13Avvutakkua hiäs olijoi jumalanuskojii, vastakkua tulijoi, olgua rahmannoit.14Blahoslovikkua niilöi, kudamat teidü painetah, blahoslovikkua, a älgiä kirokkua.15Piekkiä iluo niilöinke, kudamil on ilo, itkekkiä ühtes itkijöinke.

16Olgua keskenäh üksimielizet. Älgiä piekkiä iččie parembannu muidu, mengiä prostoin ristikanzan rinnale. Älgiä duumaikkua iččie ülen mieleväkse.17Älgiä maksakkua nikelle pahas pahal. Huolikkua sidä, mi on hüvä kaikkien silmis.18Gu vai voinnou i gu se ollou kiini teis, eläkkiä rauhas kaikkienke.19Älgiä iče tazakkua, armahat vellet, a jätäkkiä sija Jumalan vihale. Sanotahhäi Pühis Kirjutuksis: «Minun on tazuandu. Minä maksan ruadoloi müö» - sanou Ižändü.20Sanotah i nenga: «Gu sinun vihaniekal ollou n'älgü, süötä händü, gu händü juotatannou, anna juvva. Nenga keriät tulihiildü hänen piän piäle.»21Älä anna pahale voittua iččiedäs, voita sinä paha hüväl.


предыдущая глава Глава 12 следующая глава