Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

JUUDAN KIRJAINE

Глава 1

1Minä Juudu, Iisusan Hristosan käsküläine da Juakoin velli, tüönnän tervehüttü kučuttuloile, kudamii Tuatto Jumal suvaiččou da Iisus Hristos vardoiččou.2Annakkah Jumal teile enämbän da enämbän armuo, rauhuttu da suvaičustu!

Mittuine suudo vuottau valehopastajii

3Armahat minun, konzu huolitin kirjuttua teile sih niškoi, gu Jumal meidü kaikkii piästäü, sit minule tuligi mieli kirjuttua teile toizes dielos: kehittiä teidü pidämäh torua sen uskon puoles, kudaman Jumal kerran kaikekse aigua on andanuh Hänen uskojile.4Teijän keskeh on, näit, vilissüh moizii, kudamile jo ammui on suudo kirjutettu. Jumalan armon peitos nämä jumalattomat eletäh vällillistü elaigua. Hüö kieldävütäh meijän aino Haldivoiččijas da Ižändäs, Iisusas Hristosas.

5Hos tüö jo tiijättö kai, no tahton üksikai mustoittua teile, kui Ižändü enzimäi piästi oman rahvahan Jegiptan vallan al, no müöhembi hävitti heijän joukos niilöi, ket ei uskottu.6I niilöi anheliloi, kudamat ei püzüttü omal korgiel sijal, a hüllättih oma eländükohtu, Häi pidäü pimies da igäzis čieppilöis suureh suudopäiväh niškoi.7Mugai Sodoman da Gomorran rahvas da niilöis ümbäri olijoin linnoin rahvas karrattih da heitüttih moizien himoloin valdah, kudamat ollah ristikanzan luonduo vastah. Se, kui Jumal tazai nämile linnoile, on varaitus ilmanigäzeh tuleh näh.

8Juuri muga ruatah i nämä uneksijat, kudamat paganoitetah omat rungat, ei tahtota ičen piäle nimittumua valdua, kirotah taivahallizii valdoi.9Konzu ülimäine anheli Mihail, pahalazenke riijeltes kiisti Moisein rungan täh, ni häi ei ruohtinuh kirota da suudie sattanua, vai sanoi: «Opastakkah sinuu Ižändü!»10A nämä rahvas kirotah sidä, midä ei ellendetä, a se, midä hüö gu mielettömät žiivatat kuultah omis rungis, se vedäü heidü häviendäh.11Paha rodieu heile! Hüö lähtiettih Kainan dorogale, d'engulahjoin täh heitüttih moizeh üöksütükseh, kui Valaam, da kui Korah hüö hävittih, konzu nostih valdua vastah.12Nämä rahvas ollah gu ligatačmat teijän suvaičusstolas,*a konzu hüö süvväh teijänke, varuamattah täütetäh vai omua vaččua. Hüö ollah gu vihmattomat pilvet, kudamii taluttelou tuuli; gu puut sügüzül, kudamat ei anneta andimii da kudamat ollah jo kaksinkerdazesti kuolluot, juurineh muas n'ühtätüt;13hüö ollah gu kuohujat meren allot, kudamien vuahtipiännü on heijän huigei; gu üöksünüöt tiähtet, kudamih niškoi ilmazekse ijäkse on varustettu pilkoine pimei.

14Heih näh ennusti Hanok, kudai oli seiččemes jälles Adamua: «Kačo, Ižändü tulou kümmenientuhanzien pühienke15i vedäü kaikkii suudoh. Häi suudiu kaikkii jumalattomii joga jumalattoman ruavon täh, kudai hüö luajittih omas jumalattomuos, i suudiu kaikkien julgieloin paginoin täh, kudamii piettih nämä jumalattomat riähkähizet Händü vastah.»16Net ollah täüdümättömät itkettelijät, kudamat eletäh omii himoloi täüttäjen. Hüö löühketäh suuril dieloloil da opitah olla mieldü müö rahvahale, gu suaja ičele hüödüü.

N'evvot da kehitändät

17No tüö, armahat, mustakkua nämä sanat, kudamat Ižändän Iisusan Hristosan apostolat jo ennepäi sanottih.18Sanottihhäi hüö teile, kui jälgimäzil aijoil tulou nagrajua, kudamat eletäh omien jumalattomien himoloin mugah.19Juuri hüö eroitellah rahvahii toine toizes, hüö duumaijah vai tädä elaigua, Jumalan Hengie heil ei ole.

20No tüö, armahat, nostakkua oma elaigu pühimän uskon alustale da moliettokseh Pühäs Henges.21Püzükkiä Jumalan suvaičukses da vuotakkua, gu meijän Izändü Iisus Hristos omas armos vedäs meidü ilmanigäzeh elaigah.22žiälöikkiä niilöi, kudamat ei olla lujat uskos.23Erähii piästäkkiä pahas gu tules temmaten, erähii žiälöikkiä heijän riähkii varaten, briezguikkua heijän sobiigi, kudamat ollah heijän rungan himoloin lijastetut.

Ülendüssanat

24Hänele, kudamal on vägie vardoija teidü langiendas da suuren ilon keskel azettua teidü vijattomannu Hänen taivahallizen valgien edeh,25aino Jumalale, Hänele, kudai piästi meidü kaikes pahas Iisusan Hristosan, meijän Ižändän kauti, Hänele kunnivo, korgei nimi, vägi da valdu enne aijoin alguu, nügöi dai ilmazen ijän! Amin'.


*a 1:12 Suvaičusstola – vero kudaman uskojat süödih ühtes, gu ozuttua kui hüö suvaijah toine tostu. Süödüü hüö otettih pühät.

предыдущая глава Глава 1 следующая глава