Your word is a lamp to my feet

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

Турәм айкеԓ туты ху Иона нэпек

Турәм айкеԓ туты ху Иона нэпек

Тӑм нэпек – Турәм айкеԓ туты ху Иона нэпек – Библия эԓты уйәм нэпек уԓ.

Иона нэпек Турәм айкеԓ туты ху эԓты пŏтәртәԓ, ԓўв айкеԓ туты хŏйата уԓты ӑт ԓӑӈхас пӑ щи вохәпса вер эԓты мўй кем йур тӑйәс йŏхԓы ўратәс. Щи вер йис пŏрайән, 2700 мŏԓтас тӑԓ йэԓпийән ус. Тарәм пӑ йурәӈ Ассирия хон мўва Ниневия вŏԓаӈ воша Турәм Иона мӑнты партсәԓы, щи вош хŏйатәта ԓыв нўрԓаԓ эԓпа этәԓтәты урәӈән. Туп Иона ӑт ԓӑӈхас израиль йох вўракәт Ниневия вош хŏйатәт кӑрэкԓаԓ эԓты шӑшән ат керԓәсәт пӑ Турәмән ԓыв кӑрэкԓаԓ ӑт ат йŏрэмәсайәт. Ӑԓт пӑ ԓўв пӑԓәс вўракәт хŏща мӑнты пӑ щишән Ниневия вош эԓты нумԓы пелка мӑнәс.

Ар вера питәԓәмаԓ йупийән Иона ищипа Турәм Кущайа хуԓәнтәс, туп ԓўв шек нŏпсәԓ шӑкәс, хун Ниневия вош хŏйатәта Турәм ԓыв кӑрэкԓаԓ йŏрэмәсԓы. Туп Турәм Ионайа аԉсәԓԓы, хŏты Ԓўв сӑмәӈ хŏԓ хŏйатәт пеԓа, хŏй Ԓўв йасӈәԓ вана ўты ԓэщатыман уԓ, Ԓўв ԓӑӈхаԓ кӑрэкәӈ ŏтәт ӑт ат пӑрсәт, пӑ кӑрэкԓаԓ эԓты шӑшән ат керԓәсәт. Турәм Куща — ӑнтом туп израиль йох Турәм, хŏԓ мўв ԓŏват мир Турәм, войәт-хўԓәт, хŏԓ тŏрнәт пӑ мўй мўвән уԓ, ԓыв ищи Ԓўв партәпсайәԓ щирән уԓԓәт пӑ Ԓўвеԓ щита иса вер уԓ.

Йӑԓәп Йастантәпсайән Иисус Иона эԓты аԉман, Ԓўв пӑрәм пӑ нŏх ԓыԓәӈԓәм верәԓ эԓты хŏйатәта йэԓпи йастәԓ. Ищи Иисус Ниневия вош хŏйатәт аԉԓәԓы, хŏты апрәӈа пӑ йŏхԓы ӑт ватман кӑрэк эԓты шӑшән керԓәты мосәԓ.

Библия тŏлмащԓәты институт, 2018

Иона Турәм Куща эԓты хŏнтаԓ

1Иона, Амафий пŏх, пеԓа Турәм Куща йасәӈ ус:

2«Нŏх ԓойа, Ниневияйа, ун воша, мӑна пӑ щита хŏйатәта такан пŏтәрта, ԓыв шек атәм верԓаԓ Ма уйәтты питсәԓам».

3Туп Иона нŏх ԓойәс пӑ Фарсис вош пеԓа Турәм Куща эԓты хӑԋемәты урәӈән, хŏнтас. Иоппия воша йŏхтәс, Фарсис пеԓа мӑнты паршәӈ ун хоп уйтәс, ŏх сŏхәптәс пӑ хопа ԓэԓәс, ԓыв пиԓэԓән Фарсис унты мӑнты, Турәм Куща эԓты шӑшән хŏнтаты урәӈән.

4Туп Турәм Куща щарәсән так вот этәԓтәс, вот шек тарма йис, паршәӈ хоп шўкаԓәты кема йис.

5Хопәӈ хŏйатәт пӑԓтамәсәт, пӑ кашәӈ хŏйат ԓўв турмәԓ пеԓа пойәкщәс, пӑ пŏрмасԓаԓ йиӈка йовәԓты питсәԓаԓ, хоп йэша кенашәк верты урәӈән; Иона пӑ хоп ԓыпийа, ŏхәԓмаԓ йўпийән, иԓ ŏԓәс пӑ такан вŏйәпса.

6Ԓўв хŏщайәԓ хоп куща йŏхтәс пӑ ԓўв пеԓайәԓ йастәс: «Мўй нӑӈ ŏԓԓән? Нŏх ԓойа, турмен пеԓа пойәкща; мосәӈ пӑ ԓўв мўӈ эԓтэв нумәԓмәԓԓы пӑ мўӈ ӑт пӑрԓув».

7Хŏйатәт кўтԓаԓән йастәсәт: «Пос йўвәтԓув, ватԓэв, хŏй урәӈән мўӈ тӑмәщ шук туԓув». Пӑ пос йўвәтсәт, ин пос Иона пеԓа аԉәс.

8Щиӈәԋща ԓўвеԓа йастәсәт: «Мўӈева йаста, хŏй урәӈән мўӈ тӑмәщ шук туԓув? Мўй вер тӑйԓән пӑ хŏԓща нӑӈ йиԓән? Нӑӈ мўвен хŏта уԓ пӑ мӑты рут эԓты уԓԓән?»

9Ԓўв йастәс: «Ма еврей, щарәс пӑ мўв опсәԓтәм Турәм Куща йэԓпийән шаншэм иԓ эсәԓԓэм».

10Щӑԓта хŏйатәт шек такан пӑԓтамәсәт пӑ ԓўвеԓа йастәсәт: «Мўй урәӈән нӑӈ щиты версэн?» Хŏйатәт ŏша пайәтсэԓ, Турәм Куща эԓты ԓўв хŏнтаԓ, хŏты ԓўв ԓывиԓаԓа йастәс.

11Щарәс йэшащты щирәԓ и тарма, и тарма йис, ԓыв йастәсәт: «А хŏты мўӈэва нӑӈен верты, щарәсән тэвна йиты урәӈәӈ».

12Щи йўпийән ԓўв щиты йŏхԓы йастәс: «Мӑнэм ўйаԓән пӑ щарса йўвтаԓән, щӑԓта щарәсән нын урӈәнән тэвна йиԓ, ма уйәтԓэм, ма ўрӈемән нын тӑм так вот шук ватԓәты».

13Туп щи хŏйатәт йуртат ԓовәԓты питсәт, мўв сыԓа хойты урәӈән пӑ ӑт верәтсәт, щарәс йэшащты щирәԓ мет тарма йис, щишән.

14Щиӈәԋща Турәм Куща пеԓа ўвман пойәкщәты питсәт пӑ йастәсәт: «Турәм Куща, тӑм хŏйат ԓыԓ урәӈән ӑт ат пӑрԓув, пӑ нӑрԓы ўр мўӈева аԓ пŏны; Нӑӈ, Турәм Куща, Нӑӈена хŏты рӑхәԓ, щиты версэн!»

15Иона ўсэԓ пӑ йиӈка йўвәтсэԓ, щӑԓта щарәсән тэвна йис.

16Щиӈәԋща щи хŏйатәт Турәм Куща эԓты шек пӑԓтамәсәт, пӑ Турәм Кущайа йир тусәт пӑ йастәпса мӑсәт.


предыдущая глава Глава 1 следующая глава