Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН ЕВРЕЙВЛӒЛӒН КОЛТЫМЫ СИРМӒШӸЖӸ

1 Глава

1 Йымы эргӹжӹ гач попа. 5 Йымын эргӹжӹ Ангелвлӓ гӹц кӱшнӹ ылеш.

1Перви шукы гӓнӓ дӓ шукы статян пророквлӓ гач ӓтявлӓлӓн попышы Йымы2ти остатка кечӹвлӓн мӓлӓннӓ Эргӹжӹ гач попен. Эргӹжӹм Йымы цилӓ ма ылмын наследникеш шагалтен, Тӹдӹ гачок курымвлӓм ӹштен.3Эргӹ Тӹдӹн лӹмлештӓрӓлтмӹжӹн валгалтмыжы, махань ылмыжын цицмӓш сӹнжӹ ылеш дӓ цилӓок силан шамакшы доно кыча. Ӹшкежӹ доно мӓмнӓм сулык гӹц ирӹктӹмӓшӹм эртӓрӹмӹкӹ, пӹлгом кӱкшӹцӹштӹ Эргӹ Пиш Кого Ылшын [престолжын] вургымла монгырешӹжӹ шӹнзӹн.4Нӓлмӹ лӹмжӹ Ангелвлӓн лӹмӹштӹ гӹц маняреш кӱшнӹ ылеш, тӹнӓреш Тӹдӹ нӹнӹ гӹц кого лин.

5Ангелвлӓ логӹц кӱлӓн кынам Йымы келесен:
«Тӹнь Мӹньӹн Эргем ылат,
Мӹнь Тӹньӹм тагачы шачыктенӓм»?

Дӓ эче:
«Мӹнь Тӹдӹлӓн Ӓтя лиӓм,
а Тӹдӹ Мӹлӓнем Эргӹ лиэш»?

6Тенгеок Пӹтӓриш Шачшыжым сӓндӓлӹкӹш пыртымыжы годым манын:
«Тӹдӹлӓн Йымын цилӓ Ангелжӹ кымалжы».

7Ангелвлӓ гишӓн келесӓ:
«Ангелвлӓжӹм шӱлӹшӹм ӹштӓ,
служышывлӓжӹм − тыл салымым».

8А Эргӹжӹ гишӓн:
«Йымы, Тӹньӹн престолет курым-курымаш,
Тӹньӹн кугижӓншетӹн скипетржӹ − тӧр ӹштӹмӓшӹн скипетржӹ.

9Тӹнь тӧр ӹштӹмӹм яратенӓт,
законде ӹштӹмӹм ужын керддӹмӹ линӓт.
Седӹндон, Йымы, Тӹньӹм Йымет ӹвӹртӹмӓш ӱ доно
сагаэт ылшывлӓ гӹц утларак шӹрен».

10Эче попен:
«Тӹнь, Господь, пӹтӓри мӱлӓндӹлӓн негӹцӹм ӹштенӓт,
пӹлгомат − Тӹньӹн кидетӹн пӓшӓжӹ.
11Нӹнӹ ямыт, Тӹньжӹ соок ылат.
Цилӓок выргем семӹнь тоштемеш,
12выргем семӹнь нӹнӹм вӹдӹл пиштет,
дӓ нӹнӹ вашталтыт.
Но Тӹнь со техеньок кодат,
ӹлӹшӓшлык кечет ак пӹтӹ».

13Ангелвлӓ логӹц кӱлӓн кынам Йымы келесен:
«Тӹньӹн тышманвлӓэтӹм ял лӹвӓкет пиштӹмешкем,
Мӹньӹн вургымла велнем шӹнзӹ»?

14Цилӓ Ангел служышы шӱлӹш агыл ма? Ытарымашым нӓлшӓшлыквлӓлӓн палшаш нӹнӹм Йымы колтыде ма?


*а 1:2 «Курымвлӓм» − ӓль «сӓндӓлӹквлӓм» (тенгеок − 11:3).

*б 1:5 Пс 2:7, 2 Цар 7:14.

*в 1:6 Пс 96:7.

*г 1:7 Пс 103:4. «Шӱлӹш»: грек йӹлмӹштӹ ик шамакок «шӱлӹш» дон «мардеж» шамаквлӓм анжыкта. Анжы Ин 3:8.

*д 1:8 Скипетр – вуйлатышын пандыжы.

*е 1:8-9 Пс 44:7-8.

*ж 1:10-12 Пс 101:26-28.

*з 1:13 Пс 109:1.


предыдущая глава Глава 1 следующая глава