Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН ФИЛИМОНЛАН КОЛТЫМЫ СИРМӒШӸЖӸ

1 Глава

1 Вӓшлимӹ шамаквлӓ. 4 Филимонын ӹнянӹмӓшӹжӹ дӓ яратымашыжы. 8 Онисим верц ядмаш. 23 Цеверӹн кодаш согоньлымаш.

1Иисус Христос верц кызаматыш питӹрӹмӹ Павел дӓ Тимофей шӱмбел дорц мӓ донна иквӓреш пӓшӓм ӹштӹшӹ яратымы Филимонлан,2яратымы Апфия ӓкӓлӓн дӓ мӓ донна иквӓреш йӓнг вашт пӓшӓм ӹштӹшӹ Архипплӓн, тенгеок тӹньӹн пӧртӹштет погынышы церкӹлӓн.

3Мӓмнӓн Йымы Ӓтянӓ дӓ Господь Иисус Христос гӹц тӓлӓндӓ благодать дӓ тыр лижӹ.

4Ыдылмем годым тӹньӹм со ӓшӹндӓрем, Йымемлӓн таум ӹштем,5вет цилӓ святойвлӓм яратымет дӓ Иисус Христослан ӹнянӹмет гишӓн мӹнь колынам.6Мӓ докына тӹнь ӹнянӹмӓш гач ушненӓт. Тидӹжӹ Христос Иисус доно ушнымашты тӓлӓндӓ пумы цилӓ яжом келгӹнрӓк пӓлен нӓлӓшет палшыжы манын, Йымым сарвалем.7Тӹньӹн яратымашет мӓмнӓм пиш сусуэмдӓ дӓ кымылангда, вет тӹнь гачет, шӱмбелем, святойвлӓн йӓнгӹштӹ ладнангын.

8Седӹндон, мам тӹнь ӹштӹшӓшлык ылат, тӹдӹм шӱдӓш Христос доно ушнен шалгымашты ирӹкем улы гӹнят,9ядаш яжоракеш шотлем, вет мӹнь тӹньӹм яратем. Весӹ агыл, мӹнь, Павел, когорак эдем, ӹнде эче Иисус Христос верц кызаматыш питӹрӹмӹ,10Онисим эргӹм шотышты тӹньӹм яднем. Мӹнь тӹдӹн ӓтяжӹ кызаматышты линӓм.11-12Андак тӹдӹ тӹлӓт керӓл ылде, а кӹзӹт мӹлӓмӓт, тӹлӓтӓт керӓл ылеш. Мӹнь тӹдӹм, ӹшкӹмемӹн шӱмем, тӹнь докет мӹнгеш колтем. Онисимӹм ӹшке докет нӓл.13Пуры Увер гишӓн питӹрӹмӓштӹ шӹнзӹмем годым мӹлӓм тӹнь вӓрешет палшыжы манын, тӹдӹм сагаэм кодынем ыльы,14но, тӹньӹн шаныметӹм пӓлӹде, нимамат ӹштӹмем ак шо. Пуры пӓшӓэт силом ӹштӹктӹмӹ ӹнжӹ ли, ӹшке кымылет семӹнь ӹштӹмӹ лижӹ.15Ӓнят, сагаэт курымеш кодшы манын веле, тӹдӹ тӹнь гӹцет ик жепеш айырымы ылын.16Но ӹнде тӹдӹ тӹньӹн рабет веле агыл, а раб гӹц шергӹрӓк: яратымы шӱмбелет. Тӹдӹ мӹлӓнем пиш шергӓкӓн, а тӹлӓт эдем семӹнят, Господьлан ӹнянӹшӹ семӹнят эчеӓт шергӹрӓк.

17Тенгежӹ, мӹньӹм ӹнянӹмӓш шотышты шӱмбелеш шотлет гӹнь, ӹшке докет мӹньӹм пыртымы семӹнь тӹдӹм пырты.18Тӹдӹ тӹлӓнет иктӓ-мам худам ӹштен ӓль кӱсӹжӹ улы гӹнь, тидӹ мӹнь вӹлнем лижӹ.19Мӹнь, Павел, ӹшке кидем доно сирем: вӓрешӹжӹ пӧртӹлтем. Попашат уке, тӹньӹн ӹшке верцет мӹлӓм кӱсет улы.20Тенге, шӱмбелем, Господь верц пуры пӓшӓм ӹштӓш ядам. Мӹньӹн йӓнгем Господь доно ушнымашты ладнангдары.

21Шамакым колыштметлӓн ӹнянен, тидӹм сирем. Тӹнь ядмем гӹц шукыракат ӹштет манын, мӹнь пӓлем.22Вес ядмашемӓт улы: мӹлӓнем ӹлӓш кӹдежӹм йӓмдӹлӹ. Йымым сарвалымыда верц мӹньӹм Тӹдӹ тӓ докыда пӧртӹлтӓ манын, уанен вычем.

23-24Христос Иисус верц мӹнь сагаэм кызаматышты шӹнзӹшӹ Епафрас, тенгеок мӹнь донем иквӓреш пӓшӓм ӹштӹшӹвлӓ Марк, Аристарх, Димас, Лука тӹлӓт шӓлӓм колтат.25Мӓмнӓн Господьна Иисус Христосын благодатьшы тӓмдӓн шӱлӹшдӓ доно лижӹ. Аминь.


*а 11-12 Онисим лӹм греклӓ «керӓл» манмы лиэш.


предыдущая глава Глава 1 следующая глава