Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН РИМЛЯНВЛӒЛӒН КОЛТЫМЫ СИРМӒШӸЖӸ

15 Глава

1 Лишӹллӓн ярал лимӓш. 7 Иисус Христос пӹчмӓнвлӓлӓн дӓ язычниквлӓлӓн служышы ылын. 14 Павел – язычниквлӓн Апостолышты. 22 Павелӹн Римӹш толаш шанымыжы.

1Мӓ, силанвлӓ, ӹшкӹлӓннӓ ярал лиӓш цацышашлык ана ыл, слабкавлӓлӓн силашты уке гишӓн палшышашлык ылына.2Мӓ логӹцнӓ каждый лишӹлжӹлӓн ярал лиӓш цацышашлык, тӹдӹлӓн ма яжо дӓ ма тӹдӹн ӹнянӹмӓшӹжӹм пингӹдемдӓ, тӹдӹм ӹштӹшӓшлык.3Христосат Ӹшкӹлӓнжӹ агыл ярал лиӓш цацен, а сирӹмӹ семӹнь «Тӹньӹм вырсен попышывлӓн мыскылымышты Мӹнь вӹкем вазын».4Писани гӹц нӓлмӹ тырхымаш дӓ кымылангдымаш доно уанымашна лижӹ манын, мам андак сирӹмӹ, мӓмнӓм тымдаш сирӹмӹ.5Тырхымашым пушы дӓ кымылангдышы Йымы тӓмдӓм иктӹ-весӹдӓ доно Христос Иисусын тымдымыжы семӹнь икышаным ӹштӹжӹ.6Тенге тӓ икышын, ик юк доно Йымым, мӓмнӓн Господьна Иисус Христосын Ӓтяжӹм, лӹмлештӓрен кердӹдӓ.

7Йымын лӹмлештӓрӓлтмӹжӹм лӱктӓш манын, кыце Христос тӓмдӓм пурын вӓшлин, тенгеок иктӹ-весӹдӓм вӓшлидӓ.8Мӹнь тӓлӓндӓ попем: Йымын лачокшы верц, ӓтявлӓлӓн сӧрӹмӹм пингӹдемдӓш манын, Иисус Христос пӹчмӓнвлӓлӓн служышы лин,9а язычниквлӓлӓн Йымын пурыжы верц служышы лин, тидӹ гишӓн нӹнӹ Йымым лӹмлештӓрӹшӓшлык ылыт. Тенге сирӹмӹ:
«Седӹндон мӹнь Тӹньӹм язычниквлӓ лошты лӹмлештӓрем,
Тӹньӹн лӹметӹм хвален мырем».

10Дӓ эче сирӹмӹ:
«Язычниквлӓ, Тӹдӹн халыкшы доно иквӓреш ӹвӹртӹдӓ!»

11Дӓ эче:
«Цилӓ язычниквлӓ, Господьым хвальыда!
Цилӓ халыквлӓ, Тӹдӹм лӹмлештӓрӹдӓ!»

12Исаияат попа:
«Иессейӹн важшы гӹц хана лиэш,
халыквлӓм вуйлаташ кӹньӹлеш,
язычниквлӓ Тӹдӹлӓн уанаш тӹнгӓлӹт».

13Уанымашым пушы Йымы ӹнянӹмӓшдӓ гач тӓмдӓм сусу дӓ тыр доно темӹжӹ, тӹнӓм Святой Шӱлӹшӹн силажы гач уанымашда шукемеш.

14Шӱмбелвлӓэм, мӹнь ӹшкежӓт тӓлӓндӓ ӹнянем: тӓ пуры доно темӹндӓ, пӓлӹмӓшӹм циц нӓлӹндӓ дӓ иктӹ-весӹдӓм тымден кердӹдӓ.15Шӱмбелвлӓ, юж пӓшӓ гишӓн ӓшӹндӓрӹктен, мӹнь тӓлӓндӓ пингӹдӹ шамак доно сиренӓм гӹнь, Йымын благодатьшы доно мӹлӓм пумы пӓшӓ велдӹк тидӹм ӹштенӓм.16Язычниквлӓ Йымылан ярал дӓ Святой Шӱлӹш свящӓйӹмӹ жертва гань лиштӹ манын, язычниквлӓ лошты Иисус Христослан служышы лишӓшлык дӓ Йымын Пуры Увержӹн святой пӓшӓжӹм ӹштӹшӓшлык ылам.17Тенгежӹ, Иисус Христос доно ушнен, Йымылан служымем гишӓн мӹнь ӹшкӹмемӹм хвален кердӓм.18-19Язычниквлӓм Йымым колыштшым ӹштӓш манын, Христос шамак дӓ пӓшӓ доно, пӓлӹквлӓн дӓ цӱдӓвлӓн силашты доно, Йымын Шӱлӹшӹн силажы доно мӹнь гачем мам ӹштен, тидӹ гӹц молы гишӓн попаш ам смейӹ. Тенге Иерусалим дӓ йӹржӹ ылшы вӓрвлӓ гӹц тӹнгӓлӹн Иллирик якте цилӓ вӓре мӹнь Христосын Пуры Увержӹм увертӓрен шоктенӓм.20Йӓлӹн йӓмдӹ негӹцеш чангаш агыл манын, кышты Христосын лӹмжӹм колделыт, мӹнь тӹштӹ Пуры Уверӹм шӓрӓш цаценӓм.21Сирӹмӹ семӹнь:
«Тӹдӹ гишӓн уверӹм пӓлен нӓлдӹмӹвлӓ ужыт,
Тӹдӹ гишӓн колдымывлӓ ынгылат».

22Тидӹжӹ тӓ докыда толаш мӹлӓнем шукы гӓнӓ ӓптӹртен.23Но ӹнде ти вӓрвлӓштӹ пӓшӓэм пӹтӓренӓм, а тӓ докыда толаш шукы и шанем.24Испанишкӹ кеӓш лӓкмӹкем, тӓ докыда минем. Кешемлӓ, тӓмдӓм ужнем дӓ, тӓ доныда икманяр жеп йӓнгӹм кӓндӓрӹмӹкӹ, тӓ мӹньӹм тӹшкӹ ыжатен колтедӓ манын, уанем.

25Но кӹзӹт мӹнь Иерусалимӹш святойвлӓлӓн палшаш кеем.26Македони дон Ахаиштӹшӹ церкӹвлӓ Иерусалимӹштӹ ӹлӹшӹ святойвлӓ лоштышы укеӓнвлӓлӓн палшыкым пуаш яжоэш шотленӹт.27Тидӹм ӹштӓш яжоэш шотленӹт, вет Иерусалимӹштӹ ӹлӹшӹвлӓ анзылны нӹнӹн кӱсӹштӹ улы. Язычниквлӓ шӱлӹшлӓн керӓлӹм иудейвлӓ гӹц нӓлӹнӹт гӹнь, кӓплӓн керӓл доно нӹнӹлӓн палшышашлык ылыт.28Ти пӓшӓм ӹштӹмӹкем, цилӓ погымым пурынок нӓнген кодымыкем, тӓ гачда Испанишкӹ кеем.29Мӹнь пӓлем, тӓ докыда Христосын Пуры Увержӹн цицмӓш благословенижӹ доно миэм.

30Шӱмбелвлӓ, мӓмнӓн Господьна Иисус Христос доно дӓ Шӱлӹшӹн пумы яратымашыжы доно тӓмдӓм сарвалем: кредӓлмӓштем сагаэм лидӓ, мӹнь верцем Йымылан ыдылда.31Христослан ӹнянӹдӹмӹвлӓ Иудейӹштӹ мӹнь гӹцем карангышты, Иерусалимӹш мӹнь донем колтымы палшык тӹштӹ ӹлӹшӹ святойвлӓлӓн ярал лижӹ манын ыдылда.32Тӹнӓм, Йымы колтынежӹ гӹнь, мӹнь тӓ докыда сусунок миэн дӓ тӓ сагада кӓнӓлтен кердӓм.33Тырым пушы Йымы цилӓдӓ доно иквӓреш лижӹ. Аминь.


*а 15:3 Пс 68:10.

*б 15:9 Пс 17:50.

*в 15:10 Втор 32:43.

*г 15:11 Пс 116:1.

*д 15:12 Ис 11:10.

*е 15:21 Ис 52:15.


предыдущая глава Глава 15 следующая глава