Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН РИМЛЯНВЛӒЛӒН КОЛТЫМЫ СИРМӒШӸЖӸ

14 Глава

1 Идӓ йӓтлӹ. 13 Иктӹ-весӹнӓм суйышашлык ана ыл.

1Слабка ӹнянӹмӓшӓн эдемӹм, шанымашвлӓ гишӓн кӹрмӓшӹде, ӹшке лошкыда нӓлдӓ.2Ӹнянӹмӓш иктӹлӓн цилӓ качкаш ирӹкӹм пуа, весӹ, слабка ылешӓт, кавштавичӹ хӓдӹрӹм веле качкеш.3Кӱ цилӓ качкеш, качдымы вӹкӹ шотеш пиштӹде анжышашлык агыл, дӓ кӱ ак кач, качшым йӓтлӹшӓшлык агыл, вет Йымы тӹдӹмӓт ӹшкӹмжӹнеш шотла.4Весӹн цоражым вуйнаматыш лыкташ тӹнь кӱ ылат? Тӹдӹ Господьшы анзылны шалга ӓль кенвазеш. Но тӹдӹ шагалтымы лиэш, вет тӹдӹм шагалташ Йымын силажы улы.

5Южшы ик кечӹм вес кечӹ гӹц когоракеш шотла, а весӹлӓн цилӓ кечӹ икань ылеш. Каждый ӹшке ышыжылан ӹнянӹжӹ.6Кӱ кечӹвлӓм айыра, Господь верц айыра, кӱ ак айыры, Господь верц ак айыры. Кӱ качкеш – Господь верц качкеш, вет тӹдӹ Йымылан таум ӹштӓ, а кӱ ак кач, Господь верц ак кач, тӹдӓт Йымылан таум ӹштӓ.7Мӓ логӹцнӓ иктӓт ӹшкӹлӓнжӹ ак ӹлӹ дӓ ӹшкӹлӓнжӹ ак колы.8Мӓ ӹленӓ гӹнь, Господьлан ӹленӓ, коленӓ гӹнят, Господьлан коленӓ. Ӹленӓ ӓль коленӓ – мӓ Тӹдӹн ылына.9Ӹлӹшӹвлӓнӓт, колышывлӓнӓт Господьышты лиӓш манынок, Христос колен дӓ ӹлӹж кӹньӹлӹн.

10А тӹнь шӱмбелвлӓэтӹм малын сует? Ӓль тӹньжӹ малын шӱмбелетӹм ӹшке гӹцет худаэш шотлет? Вет мӓ цилӓн Христосын судшы анзылан шагалына.11Сирӹмӹ:
«Мӹнь ӹлем, – манеш Господь, –
дӓ анзыланем каждый пылвуйтен шӹцшӓшлык,
каждый йӹлмӹ Мӹньӹм Йымы манын лӹмлештӓрӹшӓшлык».

12Мӓ цилӓнӓт Йымы анзылны ӹшке верцнӓ шамакым кычаш тӹнгӓлӹнӓ.

13Тенге гӹнь, ӹнде иктӹ-весӹнӓм суйышашлык ана ыл. Анжыда, шӱмбелӹм шӹртнялтмӓшкӹ ӓль кенвацмашкы кандышым нимамат идӓ ӹштӹ.

14Господь Иисус доно ушнен, мӹнь ӹнянем дӓ яжон пӓлем: ӹшке семӹньжӹ ире агыл нимат уке, но эдем иктӓ-мам ире агылеш шотла гӹнь, тӹдӹлӓн тидӹ ире агыл.15Шӱмбелет качкышет гишӓн орлана гӹнь, ӹнде тӹнь яратен ат ӹштӹ. Кӱ верц Христос колен, тӹдӹм качкышет доно ит пӹтӓрӹ.16Мам тӓ яжоэш шотледӓ, тӹдӹ ӹнжӹ мыскылалт.17Йымын Кугижӓншӹ качмы-йӱмӹ агыл, а Святой Шӱлӹш доно ушнымашты тӧр ӹштӹмӓш, тыр дӓ ӹвӹртӹмӓш.18Кӱ Христослан тенге служа, Йымылан ярал ылеш, эдемӓт тӹдӹм шотеш пиштӓ.

19Тенгежӹ, ӓлдӓ, ма тырым канда дӓ икӹжӓк-иктӹм пингӹдемдӓ, тӹдӹм кӹчӓлӹнӓ.20Качкыш верц Йымын пӓшӓжӹм идӓ шӓлӓтӹ. Цилӓ качкыш ире, но ма вес эдемӹм шӹртньӹмӓшкӹ канда, техеньӹм качкаш яжо агыл.21Лучи пайым качкаш агыл, ӓрӓкӓм йӱӓш агыл, нимамат техеньӹм ӹштӓш агыл, ма гишӓн шӱмбелет шӹртньялтеш, аздаралтеш ӓль силажым ямда.22Ти шотышты тӹнь малан ӹнянет? Йымы анзылны, ӹшке шӱмӹштет тӹдӹм кычы. Кӱ мам айырен нӓлмӹжӹ гишӓн ӹшкӹмжӹм ак йӓтлӹ, тӹдӹ цӓшӓн.23Кӱ качкеш дӓ ти веремӓнок коктешлӓнӓ, тӹдӹ суялтеш, вет тӹдӹ ӹнянӹмӓш ядмы семӹнь агыл ӹштӓ, а цилӓ, ма ӹнянӹмӓш семӹнь агыл – сулык.
24-25Мӹньӹн увертӓрӹмӹ, Иисус Христос гишӓн шайыштшы Пуры Увер доно
дӓ курымок келесӹде кодымы,
но ӹнде, цилӓ халык ӹнянӹмӓш шамакым колыштшы лижӹ манын,
курымаш Йымын шӱдӹмӹжӹ семӹнь
пророквлӓн сирӹмӹштӹ гач пӓлдӓрӹмӹ тайнын пачылтмыжы доно
тӓмдӓм пингӹдемден Кердшӹлӓн,
26пиш кого ышан Ик Ӹшкет Йымылан,
Иисус Христос гач курым-курымеш лӹмлештӓрӓлтмӓш лижӹ! Аминь.


*а 14:11 Ис 45:23.


предыдущая глава Глава 14 следующая глава