Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛ ПАВЕЛӸН РИМЛЯНВЛӒЛӒН КОЛТЫМЫ СИРМӒШӸЖӸ

13 Глава

1 Вуйлатышывлӓн шамакыштым колыштшы лимӓш. 8 Лишӹлвлӓм яратымы гишӓн. 11 Христосын кечӹжӹ.

1Кӱшӹл властьым кычышывлӓн шамакыштым каждый эдем колыштшашлык, вет керек-махань власть – Йымы гӹц, цилӓ ылшы властьым Йымы шагалтен.2Кӱ властьлан торешлӓнӓ, Йымын тенге ӹштӹмӹжӹ ваштареш шагалеш, а ваштареш шагалшывлӓ ӹшке вӹкӹштӹ суйымашым кандат.3Вет пуры пӓшӓм ӹштӹшӹ агыл, а акъярым ӹштӹшӹ эдем вуйлатышывлӓ гӹц лӱдшӓшлык. Власть гӹц ӹнет лӱд гӹнь, пурым ӹштӹ, тӹнӓм тӹдӹ тӹньӹм хваля.4Тӹдӹ – Йымын тӓрзӹжӹ, тӹлӓнет яжо лижӹ манын ӹштӓ. Но тӹнь акъярым ӹштет гӹнь, лӱд, вет тӹдӹ такеш агыл мечӹм намалыштеш: тӹдӹ – Йымын тӓрзӹжӹ, тӹдӹ гач Йымын шӹдӹжӹ акъярым ӹштӹшӹ вӹкӹ вазеш.5Тенге гӹнь шамакым колыштшы лимӹлӓ. Тидӹжӹм Йымын наказымыжы гӹц лӱдмӹ гишӓн веле агыл, но совесть верцӹнӓт ӹштӹмӹлӓ.6Седӹндон тӓ лӹм оксамат тӱледӓ, вет власть кычышывлӓ Йымылан служат, со ти пӓшӓм ӹштӓт.7Тенге, мам пушашлыкдам каждыйлан пуда: кӱлӓн лӹм окса – лӹм оксам, кӱлӓн оброк – оброкым, кӱлӓн лӱдмӓш – лӱдмӓшӹм, кӱлӓн шотеш пиштӹмӓш – шотеш пиштӹмӓшӹм.

8Икӹжӓк-иктӹдӓм яратымаш гӹц молы шотышты иктӹлӓнӓт кӱсӹдӓ ӹнжӹ ли. Весӹм яратышы эдем законын ядмыжым цилӓ шоктен.9Вет шӱдӹмӓшвлӓ: «ит шӓхӓрлӓнӹ», «ит пушт», «ит шолышт», «иктӹн верцӓт, иктӹн вӹкӓт алтален ит попы», «йӓлӹнлӓн ит шыкланы» дӓ хоть-махань вес шӱдӹмӓшӓт ик шӱдӹмӓшӹштӹ иктешлӓлтӹт – «лишӹлетӹм ӹшкӹметӹм яратымы семӹньок яраты».10Лишӹл эдемлӓн яратымаш худам ак ӹштӹ, седӹндон яратымаш – законын шокталтмыжы.

11Тӓ кӹзӹтшӹ жепӹм пӓледӓ: ӹнде амален кимӹ веремӓ эртен, кӹньӹлӓш жеп шон, вет ӹнянӓш тӹнгӓлмӹнӓ годшы доно тӓнгӓштӓрӹмӓштӹ, ытаралтмаш кӹзӹт мӓ докына лишӹлрӓк.12Йыд эртӓ, сотыгечӹ лишемеш. Тенгежӹ пӹцкемӹшӹн пӓшӓжӹм шушашлык дӓ сотын кредӓлмӹ хӓдӹржӹм вӹкӹнӓ пиштӹшӓшлык ылына,13сотыгечӹштӹшӹ ганьы ӹшкӹмнӓм яжон кычаш тӹнгӓлӹнӓ, ружген йӱмӓшӹм ӹштен, ӓрӓкӓм йӱн, шӓхӓрлӓнен, тӓйвилӓнен, соредӓлӹн дӓ йӓлӹнлӓн йӓнг йылен ана ӹлӹ.14Мӓмнӓн Господьна Иисус Христосыш вӹдӹлӓлтдӓ дӓ кӓп дон йӓнгдӓ верц шытырланымашдам сулыкан шыкланымаш якте идӓ шокты.


*а 13:9 Исх 20:13-15,17, Лев 19:18; Мф 19:19.


предыдущая глава Глава 13 следующая глава