Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛВЛӒН ПӒШӒШТӸ

26 Глава

Павел Агриппа анзылны попа.

1Павеллӓн Агриппа келесен: «Тӹнь кӹзӹт ӹшкӹметӹм защищӓен попен кердӓт». Тӹнӓм Павел кидӹм лӱктӓлӹн дӓ ӹшке верцшӹ попаш тӹнгӓлӹн:

2«Агриппа кугижӓ! Иудейвлӓн цилӓ йӓтлӹмӹштӹ ваштареш тагачы тӹнь анзылнет защищӓйӓлт кердмемлӓн ӹшкӹмемӹм цӓшӓнеш шотлем,3вет тӹнь иудейвлӓн цилӓ ӹлӹмӓш овуцаштым, спорымы ядмашвлӓштӹм яжон пӓлет. Седӹндон мӹньӹм цӹтен колышт манын ядам.4Мӹньӹн ӹрвезем годшенок кыце ӹлӹмем цилӓ иудейвлӓ пӓлӓт. Пӹтӓри ӹшке халыкем лошты Иерусалимӹштӹ ӹленӓм.5Мӹнь фарисей ылынам дӓ мӓмнӓн ӹнянӹмӓшнӓн сек пингӹдӹ тымдымыжы семӹнь ӹленӓм. Мӹньӹм шукердшен пӓлӓт; шанат гӹнь, нӹнӹ тидӹм свидетельствуен кердӹт.6Ӓтявлӓлӓннӓ Йымын сӧрӹмӹжӹлӓн мӹнь уанем, седӹндон кӹзӹт суд анзылны шалгем.7Ти сӧрӹмӓшӹн шокталтмыжылан уанен, мӓмнӓн халыкын луаткок йыхшы йыдшы-кечӹжӹ Йымылан пыт служат. Ти уанымаш гишӓн, Агриппа кугижӓ, иудейвлӓ мӹньӹм йӓтлӓт.8А ма? Колышывлӓм Йымы ӹлӹжтӓ манын, тӓ ӹнянӓш лидӹмеш шотледӓ ма?

9Назорей Иисусын лӹмжӹ ваштареш шукы ӹштӹшӓшлык ылам манын, мӹнят шаненӓм.10Тидӹмок мӹнь Иерусалимӹштӹ ӹштенӓм: архиерейвлӓ гӹц тидӹлӓн ирӹкӹм нӓлмӹкӹ, шукы святой эдемӹм кызаматыш шӹнденӓм, а кынам нӹнӹм пуштыныт, мӹнь тидӹлӓн юкем пуэнӓм.11Цилӓ синагогышты мӹнь шӹренок нӹнӹм орландаренӓм дӓ Иисусым мыскылыкташ цаценӓм, пиш кого шӹдем доно ӧрдӹж халавлӓштӓт поктылынам.

12Тидӹлӓнок, архиерейвлӓ гӹц властьым дӓ правам нӓлӹн, Дамаскыш кенӓм.13Агриппа кугижӓ, кечӹвӓл кытлан мӹнь корнышты пӹлгом гӹц яргата сотым ужынам. Сотыжы кечӹ гӹцӓт когон йӹлгӹжӹн, тӹдӹ мӹнь йӹрем дӓ сагаэм кешӹвлӓ йӹр валгалтарен.14Мӓ цилӓн мӱлӓндӹ вӹкӹ кенвазынна, вара еврейлӓ попымы юкым колынам, тӹдӹ мӹлӓм манын: ”Савл, Савл, малын тӹнь Мӹньӹм поктылат? Сила ваштареш тӹлӓт кеӓш нелӹ”.15Мӹнь ядынам: ”Господь, кӱ Тӹнь ылат?” Тӹдӹжӹ келесен: ”Мӹнь тӹньӹн поктылмы Иисус ылам.16Кӹньӹл. Ял вӹкӹ шагал, тӹнь Мӹньӹн служышем лиӓт, ужметӹм дӓ тӹлӓнет анжыктышашлыкем свидетельствуяш тӹнгӓлӓт. Ти пӓшӓш шагалташ Мӹнь тӹлӓнет кайынам.17Мӹнь тӹньӹм иудей халыкын кидшӹ гӹц ытарем, а кӹзӹт, кынам тӹньӹм язычниквлӓ докы колтем, нӹнӹ гӹцӓт ытарем.18Тӹнь нӹнӹн сӹнзӓштӹм пачат, нӹнӹм пӹцкемӹш гӹц соты докы, сатанан хозаланымыжы гӹц Йымы докы сӓрӓлӓт. Тӹнӓм Мӹлӓм ӹнянӹмӹштӹ гишӓн нӹнӹн сулыкыштым Йымы простя, дӓ свящӓйӹмӹ эдемвлӓ лошты нӹнӹ вӓрӹштӹм нӓлӹт”.

19Седӹндон, Агриппа кугижӓ, мӹнь пӹлгомыштышы каймылан ваштареш ылделам.20Анзыц Дамаскышты дӓ Иерусалимӹштӹ ӹлӹшӹвлӓлӓн, вара улы Иудей мӱлӓндӹ мычкы дӓ язычниквлӓ лошты, цилӓнӓт сулыкыштым простьыктышты дӓ Йымы докы сӓрнӓлӹштӹ манын, увертӓрен тымденӓм дӓ Йымы докы сӓрнӓлмӹштӹм анжыктышы пӓшӓм ӹштӓш ӱжӹнӓм.21Тидӹ гишӓн мӹньӹм иудейвлӓ Йымын пӧртӹштӹ роалтен кыченӹт дӓ пуштнештӹ ылын.22Но Йымы палшымы доно тагачы яктеӓт изилӓнӓт, коголанат свидетельствуен шалгем, пророквлӓӓт, Моисейӓт ма гишӓн анзык ужын попенӹт, тӹдӹ гишӓнок мӹнят попем, а нимат весӹ гишӓн агыл:23Христос орланен колышашлык, колымаш гӹц ӹлӹжшӹ пӹтӓришӹ лишӓшлык дӓ иудей халыкланат, язычниквлӓлӓнӓт сотым увертӓрӹшӓшлык ылын».

24Павелӹн тенге ӹшкӹмжӹм защищӓен попымыжы годым Фест юкым когоэмден келесен: «Павел, тӹнь ышетӹм ямденӓт! Когон тыменьмет тӹньӹм ородыш кемешкӹ шокта».25«Уке, когон шотеш пиштӹмӹ Фест, – манын тӹдӹ, – мӹнь ышым ямдыделам, лачокын шамак доно ышан шаям попем.26Кугижӓ ти пӓшӓ гишӓн пӓлӓ, седӹндон мӹнь тӹдӹлӓн тӧрӧк попем. Ти пӓшӓвлӓ гӹц иктӓ-ма тӹдӹлӓн пӓлӹдӹмӹ кодын манын, мӹнь ам ӹнянӹ. Тидӹ ӧрдӹжтӹ лиде.27Агриппа кугижӓ, тӹнь пророквлӓлӓн ӹнянет? Мӹнь пӓлем, ӹнянет».28Агриппа Павеллӓн келесен: «Христиан лиӓш тӹнь мӹньӹм изиш веле ат ӹняндӓрӹ».29Павел попен: «Изиш ӓли шукы, но Йымым сарвалем: тӹнь веле агыл, а тагачы мӹньӹм колыштшывлӓ цилӓнӓт – ти цепвлӓ гӹц пасна веле – мӹнь ганемок лиштӹ».

30Павел тидӹм попымыкы, кугижӓ, вуйлатышы, Вереника дӓ нӹнӹ доно иквӓреш шӹнзӹшӹвлӓ кӹньӹл шагалыныт31дӓ, ӧрдӹжӹш карангынытат, ӹшке лоштышты попенӹт: «Ти эдем пушташ ӓли кызаматышты кычаш ситӹшӹм нимат ӹштӹде».32А Агриппа Фестлӓн келесен: «Кесарь анзылан суялташ ак яд ылгецӹ, ти эдемӹм ирӹкӹш колташ лиэш ыльы». Тенге Павелӹм кесарь докы колташ вуйлатышы решен.


предыдущая глава Глава 26 следующая глава