Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛВЛӒН ПӒШӒШТӸ

25 Глава

1 Павел кесарь анзылны суялташ ядеш. 13 Павел – Агриппа кугижӓ анзылны.

1Вуйлатымы кымдемӹшкӹжӹ толмыкы, Фест кым кечӹштӹ Кесари гӹц Иерусалимӹш кен.2-3Тӹнӓм архиерей дӓ иудей логӹц когорак эдемвлӓ тӹдӹлӓн Павел гишӓн вуйым шинӹт, Павелӹм Иерусалимӹш ӱжӹктӹмӹ доно мӓлӓннӓ пуры кымылетӹм анжыкты манын, сарвален ядыныт. Вет нӹнӹ Павелӹм йӹвӹрт оролынештӹ дӓ корнышты пуштнештӹ ылын.4Павелӹм Кесариштӹ оролен кычымышты гишӓн, ӹшкежӓт шукышты агыл тӹшкӹ кешӓшлыкшы гишӓн Фест келесен.5«Тенгежӹ, – попен тӹдӹ, – тӓмдӓн вуйлатышывлӓдӓ логӹц икманяр эдем мӹнь сагаэм кежӹ, дӓ, ти эдемӹн иктӓ-махань вуйнаматшы улы гӹнь, тӹдӹм йӓтлӹжӹ».

6Иерусалимӹштӹ Фест кӓндӓкш ӓли лу кечӹ гӹц шукы ылде, Кесариш пӧртӹлӹн, а вес кечӹнжӹ суйымы вӓрӹш шӹнзӹн дӓ Павелӹм кандаш шӱден.7Павел толмыкы, Иерусалим гӹц толшы иудейвлӓ йӹржӹ погынен шагалыныт, шукы нелӹ йӓтлӹмӓшӹм вӹкӹжӹ попенӹт, но тидӹ лачок манын анжыктен кердделыт.8Павел ӹшкӹмжӹм защищӓен попен: «Мӹнь иудей закон ваштарешӓт, Йымын пӧрт ваштарешӓт, кесарь ваштарешӓт нима худамат ӹштӹделам».9Фест, иудейвлӓлӓн ярал лиӓш шанен, Павеллӓн келесен: «Иерусалимӹш кенет? Тӹньӹн пӓшӓэтӹм тӹштӹ мӹнь анзылнем суен кердӹнӓ».10Но Павел келесен: «Мӹнь кесарьын судшы анзылны шалгем, тӹдӹн анзылнок суялтшашлык ылам. Мӹнь иудейвлӓ ваштареш нимахань худам ӹштӹделам, тидӹм тӹнят яжон пӓлет.11Мӹнь вуйнаматан ылам дӓ вуйнаматемжӹ мӹньӹм пуштмым лачокыш лыкшы гӹнь, колымаш гӹц карангаш ам цацы, а мӹнь ваштарешем йӓтлӹмӹштӹ лачок агыл гӹнь, иктӓт мӹньӹм нӹнӹн кидӹш пуэн ак керд. Кесарь анзылны суялташ ядам».12Вара Фест кӓнгӓшӹм пушывлӓ доно хытырен дӓ келесен: «Тӹнь кесарьын судшым ядынат, кесарь докок кет».

13Икманяр кечӹ эртӹмӹкӹ, Кесариш, Фестӹм кымылангдаш манын, Агриппа кугижӓ дон Вереника толыныт.14Нӹнӹ тӹштӹ шукы кечӹм эртӓрӹмӹкӹштӹ, Павел гишӓн пӓшӓм кугижӓлӓн Фест тенге ынгылдарен: «Тиштӹ кызаматеш Феликсӹн кодымы эдем улы.15Иерусалимӹштӹ ылмем годым иудей архиерейвлӓ дон когораквлӓ тӹдӹн вӹкӹ вуйым шиӓш толыныт дӓ суяш ядыныт.16Йӓтлӹшӹвлӓм сӹнзӓгӹрӓт ужаш дӓ йӓтлӹмӹ ваштареш ӹшкӹмжӹм защищӓен попаш ирӹкӹм пуде, хоть-махань эдемӹмӓт пушташ Рим овуца семӹнь ак пуэп манын, мӹнь нӹнӹлӓн вӓшештенӓм.17Тенге, нӹнӹ тишкӹ толмыкышты, вес кечӹнок, жепӹм шыпшде, суйымы вӓрӹш шӹнзӹнӓм дӓ ти эдемӹм анзыкем кандаш шӱденӓм.18Йӓтлӹшӹвлӓ тӹдӹм ӓрен шагалыныт, но мӹньӹн вычымем гань ик вуйнаматымат анжыктыделыт.19Нӹнӹ ӹшке ӹнянӹмӓшӹштӹ дӓ колышы тамахань Иисус гишӓн Павел доно споренӹт. Тӹдӹ гишӓн Павел, ӹлӓ манын, пингӹдӹн попен.20Техень спорымашты кыце лиӓш, пӓлӹделам, седӹндон мӹнь ядынам: ”Иерусалимӹш кен, тӹштӹ суд анзылан шагалнет ма?”21Но Август пынзалтышым лыкмы якте Павел ӹшкӹмжӹм оролымашты кодаш ядын, седӹндон, кесарь докы колтымешкӹ, мӹнь тӹдӹм оролен кычаш шӱденӓм».22А Агриппа Фестлӓн келесен: «Ти эдемӹм мӹнят колыштнем ыльы». Тӹдӹжӹ иргодымок колышт кердӓт манын вӓшештен.

23Вес кечӹн Агриппа дон Вереника кого айош толмы гань толыныт, салтак вуйлатышывлӓ дӓ халаштышы сек шотеш пиштӹмӹ эдемвлӓ доно иквӓреш суд погынымы вӓрӹш пыренӹт, дӓ Фест шӱдӹмӹ семӹнь Павелӹм канденӹт.24Вара Фест келесен: «Агриппа кугижӓ дӓ мӓ сагана тишкӹ цилӓ погынышывлӓ! Ти эдемӹм ужыда, тӹдӹ гишӓн цилӓ иудей Иерусалимӹштӓт, тиштӓт мӹлӓм вуйым шинӹт дӓ тӹдӹ ӹлӹшӓшлык агыл манын сасленӹт.25Но пушташ ситӹшӹм тӹдӹ нимат ӹштӹде манын, мӹнь ужынам, а Август анзылны суялташ тӹдӹ ӹшкеок ядын, седӹндон мӹнь тӹдӹм тӹшкӹ колташ шанен пиштенӓм.26Но кесарьлан тӹдӹ гишӓн сирӓш мӹньӹн нимат ӹняндӓрӹшӹ уке. Седӹндон, ти анжымаш паштек мӹлӓм мам сирӓш лижӹ манын, тӹдӹм тӓ анзыкыда, паснаок тӹнь анзыкет, Агриппа кугижӓ, канденӓм.27Мӹнь шанымаштем, кычен питӹрӹмӹ эдемӹм ма шотышты йӓтлӹмӹм анжыктыде, тӹдӹм кесарь докы колташ шот агыл».


*а 25:21 Август – тиштӹ: лӹм агыл, а Рим императорым шотеш пиштен попымаш. Тенгеок – 25:25.


предыдущая глава Глава 25 следующая глава