Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛВЛӒН ПӒШӒШТӸ

24 Глава

1 Павелӹм Феликс анзылны йӓтлӹмӓш. 10 Павел ӹшкӹмжӹм Феликс анзылны защищӓен попа. 24 Павел питӹрӹмӓштӹ.

1Вӹц кечӹштӹ халыкын икманяр когоракшы дӓ Тертулл лӹмӓн оратор доно иквӓреш архиерей Ананий толын, нӹнӹ Павел вӹкӹ вуйлатышылан вуйым шинӹт.2Павелӹм ӱжӹн кандымыкы, Тертулл тӹдӹм йӓтлӓш тӹнгӓлӹн дӓ попен:3«Шотеш пиштӹмӹ Феликс, мӓ тӹнь верцет шукы жеп шыпшылтшы тырым нӓлӹннӓ, дӓ тӹньӹн цацымет доно ти халыкын ӹлӹмӓшӹжӹ когон яжоэмӹн. Мӓ тидӹ гишӓн со дӓ цилӓ вӓре кого таум попенӓ.4Тӹньӹм шукы жеп ӹнем кычы, пуры ли, мӓмнӓм пуры кымылын кӹтӹк жеп колышт.5Мӓ ужынна: ти эдем – пижедӹлшӹ цер гань. Тӹдӹ улы сӓндӓлӹк мычкы ӹлӹшӹ иудейвлӓ лошты пыдыранзыкым тӓрвӓтӹл каштеш дӓ Назорей ересь тӹшкӓм вуйлата,6Йымын пӧртӹмӓт лявӹртӓш цацен, седӹндон тӹдӹм кыченнӓ, ӹшкӹмнӓн законна семӹнь суйыненӓ ыльы.7Но полк вуйлатышы Лисий толын дӓ тӹдӹм мӓмнӓн кид гӹц кого сила доно шыпшын нӓлӹн [дӓ тӹнь докет колтен],8тӹдӹм йӓтлӹшӹвлӓлӓн тӹнь докет кеӓш шӱден. Тӹдӹм ядыштын, ма шотышты вуйнаматанеш шотлымынам тӹнь ӹшке цилӓ пӓлен нӓлӹн кердӓт».9Цилӓ тидӹ лачок манын, иудейвлӓӓт пингӹдемденӹт.

10Вуйлатышы Феликс шамак пумым анжыктен, дӓ Павел попаш тӹнгӓлӹн:

«Шукы и ти халыкым тӧр суйыметӹм пӓлен, мӹньӹ кӹзӹт ӹшкӹмемӹн пӓшӓэм ирӹкӓн кымыл доно защищӓен попем.11Иерусалимӹш кымалаш толмемлӓн луаткок кечӹ гӹц шукы эртӹде, тидӹм тӹнь ӹшкеӓт пӓлен нӓлӹн кердӓт.12Мӹньӹм Йымын пӧртӹштӓт, синагогвлӓштӓт, халаштат иктӓжӹн доно кӹрмӓшӹшӹм ӓли халык пыдыранзыкым тӓрвӓтӹшӹм ужделыт.13Ма шотышты нӹнӹ кӹзӹт мӹньӹм вуйнаматанеш лыктыт, тӹдӹм нима донат пингӹдемден ак кердеп,14но тӹлӓнет йӓнг пачын попем: махань Корным нӹнӹ ересь тымдымаш маныт, тӹдӹн донок каштын, мӹнь ӓтявлӓн Йымылан служем; законышты дӓ пророквлӓн книгӓвлӓштӹ цилӓ сирӹмӹлӓн ӹнянем.15Тӧр ӹштӹшӹвлӓӓт, тӧр агыл ӹштӹшӹвлӓӓт колымаш гӹц ӹлӹжӹт манын, Йымылан уанымашем улы. Ти эдемвлӓӓт тидӹмок вычат.16Седӹндон мӹнь ӹшкеӓт Йымы дӓ эдемвлӓ анзылны со ире совестян лиӓш силам пиштем.17Шукы и эртӹмӹкӹ, мӹнь ӹшке халыкемлӓн окса палшыкым пуаш, тенгеок пушашлыкым кандаш толынам.18Тидӹм кандымы годым Йымын пӧртӹштӹ мӹньӹм иреэммӹ овуцам эртӹшӹм ужыныт. Тӹштӹ погынышы эдем цуцаат, пыдыранзыкат ылде.19Мӹньӹм Аси гӹц толшы икманяр иудей ужын, нӹнӹлӓн тӹнь анзылнет тиштӹ ӹшке лиӓш дӓ, мӹнь ваштарешем иктӓ-машты улы гӹнь, йӓтлӓш келеш ыльы.20Тишкӹ толшывлӓ келесӹштӹ: Синедрион анзылны шалгымем годым мӹньӹм ма шотышты вуйнаматанеш ужыныт?21Нӹнӹ лошты шалгымем годым юкем когоэмден попымы техень шамакемӹм, ӓнят, вуйнаматешем шотлат: колышывлӓн ӹлӹжмӹштӹ гишӓн тагачы тӓ мӹньӹм суедӓ».

22Тидӹм колыштмыкы, Господьын корныжы гишӓн яжон пӓленӓт, анжымы пӓшӓм Феликс вес жепӹш ваштен дӓ келесен: «Полк вуйлатышы Лисий толмыкы, тӓмдӓн пӓшӓдӓм анжен лӓктӓм».23А шӱдӹвуйлан шӱден: Павелӹм оролаш, но икманяр ирӹкӹм пуаш дӓ тӹдӹлӓн палшаш ӓли тӹдӹн докы толаш лишӹлвлӓжӹм иктӹмӓт цӓрӓш агыл.

24Икманяр кечӹштӹ Феликс шачынок иудей ылшы Друзилла вӓтӹжӹ доно иквӓреш толын, Павелӹм ӱжӹктен дӓ Христос Иисуслан ӹнянӹмӹ гишӓн шайыштмыжым колыштын.25Тӧр ӹштӹмӹ, ӹшкӹмӹм кычымы дӓ анзыкылашы суйымаш гишӓн Павелӹн попымыжы годым Феликс лӱдӹн колтен дӓ келесен: «Ӹнде ке, а кынам жепем лиэш, тӹньӹм угӹц ӱжӓм».26Ти жепӹнок, ирӹкӹм тӱлен нӓлӓш Павел оксам пуа манын, ӹнянен вычен. Седӹндон тӹдӹм кандаш шӹренок колтен дӓ тӹдӹн доно хытырен.

27Но кок и эртӹмӹкӹ, Феликсӹм Порций-Фест вашталтен. А Феликс, иудейвлӓлӓн ярал лиӓш шанен, Павелӹм питӹрӹмӓшешок коден.


*а 24:1 Оратор – тиштӹ: юрист, адвокат.


предыдущая глава Глава 24 следующая глава