Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

СВЯТОЙ АПОСТОЛВЛӒН ПӒШӒШТӸ

23 Глава

1 Павел Синедрион анзылны. 12 Павел ваштареш йӹвӹрт попен келшӹмӓш. 23 Павелӹм Кесариш кандат.

1Павел Синедрион вӹкӹ тусарен анжен дӓ келесен: «Шӱмбелвлӓ! Мӹнь тагачшы кечӹ якте Йымы анзылны ире совестян ӹленӓм».2А архиерей Ананий Павел сага шалгышывлӓлӓн тӹдӹм ышмажы гӹц шиӓш шӱден.3Тӹнӓм Павел тӹдӹлӓн келесен: «Тӹнь, ошемдӹмӹ стенӓ! Тӹньӹм Йымы шиэш. Тӹнь тиштӹ шӹнзет дӓ мӹньӹм закон семӹнь суйынет, а, законым пыдыртен, мӹньӹм шиӓш шӱдет».4Сагажы шалгышывлӓ келесенӹт: «Йымын архиерейжӹм вырсет?»5Павел вӓшештен: «Шӱмбелвлӓ, мӹнь тӹдӹн архиерей ылмыжым пӓлӹделам. Сирӹмӹ вет: ”Ӹшке халыкетӹн вуйлатышыжы гишӓн худа шамакым ит попы”».

6Синедрионышты ик цуцажы саддукей, а вес цуцажы фарисейвлӓ ылмым пӓленӓт, Павел чӹнь попаш тӹнгӓлӹн: «Шӱмбелвлӓ! Мӹнь фарисей ылам, фарисейӹн эргӹжӹ, колышывлӓн ӹлӹж кӹньӹлмӹштӹм ӹнянен вычымы гишӓн мӹньӹм суят».7Тӹдӹ тенге манмыкыжы, фарисей дон саддукейвлӓ лошты кӹрмӓшӹмӓш тӹнгӓлӹн дӓ погынымаш шелӓлтӹн.8Вет саддукейвлӓн попымышты семӹнь, нимахань ӹлӹжмӓшӓт, Ангелӓт, шӱлӹшӓт уке, а фарисейвлӓ цилӓ тидӹлӓн ӹнянӓт.9Цилӓн когон саслаш тӹнгӓлӹнӹт, фарисейвлӓ лоштышы закон тымдышывлӓ кӹньӹл шагалыныт дӓ кӹрмӓшен попенӹт: «Ти эдемӹштӹ нимахань худам ана уж. Тӹдӹлӓн шӱлӹш ӓли Ангел, ӓнят, лачокат попен? Ӓлдӓ Йымы ваштареш ана ли».10Кӹрмӓшӹмӓш когоэммӹ доно Павелӹм царген шуэн кердӹт манын, полк вуйлатышы лӱдӹн дӓ салтаквлӓлӓн тӹдӹм халык логӹц лыкташ дӓ крепостьыш нӓнгеӓш шӱден.

11А вес йыдын Господь Павеллӓн кайын дӓ келесен: «Ит лӱд, Павел. Кыце тӹньӹ Мӹнь гишӓнем Иерусалимӹштӹ свидетельствуенӓт, Римӹштӓт тенгеок свидетельствуйышашлык ылат».

12Ирок икманяр иудей попен келшенӹт, Павелӹм пуштмешкӹ, ана кач дӓ ана йӱ манын цуратленӹт.13Цуратлышы эдемвлӓ нӹллӹ утлан ылыныт.14Нӹнӹ архиерейвлӓ дон халыкын когоракшывлӓ докы толыныт дӓ попенӹт: «Павелӹм пуштмешкӹнӓ, мӓ нимамат ышмаш ана пиштӹ манын, шамакым пуэн цуратлышна.15Вуйта пӓшӓжӹм тусаренрӓк тергӓш манын, Павелӹм иргодым тӓ докыда кандаш полк вуйлатышы гӹц Синедрион доно иквӓреш ядда, а мӓ тӹшкӹ шомешкӹжок тӹдӹм пушташ йӓмдӹ ылына».

16Павелӹн ӓкӓжӹн эргӹжӹ, шӹлӹн шӹнзӹмӹштӹ гишӓн колмыкы, толын, крепостьыш пырен дӓ Павеллӓн увертӓрен.17А Павел шӱдӹвуй логӹц иктӹжӹм ӱжӹн дӓ келесен: «Ти ӹрвезӹм полк вуйлатышы докы нӓнге, тӹдӹлӓн тамам увертӓрӹшӓшӹжӹ улы».18Тӹдӹжӹ ӹрвезӹм сагажы нӓлӹн, полк вуйлатышы докы нӓнген дӓ попен: «Кычен питӹрӹмӹ Павел мӹньӹм ӱжӹн дӓ ти ӹрвезӹм тӹнь докет кандаш ядын. Тӹлӓнет тамам попышашыжы улы».19Полк вуйлатышы ӹрвезӹм кид гӹц нӓлӹн, ӧрдӹжӹш карангден дӓ ядын: «Мӹлӓнем мам келесӹшӓшлыкет улы?»20Ӹрвезӹ келесен: «Павел гишӓн вуйта шукыракым пӓлӓш манын, иудейвлӓ иргодым тӹдӹм Синедрионыш кандаш тӹнь гӹцет ядаш попен келшенӹт.21Тӹнь нӹнӹлӓн ит ӹнянӹ. Нӹнӹ логӹц нӹллӹ утла эдем тӹдӹм йӹвӹрт вычен шалгат. Павелӹм пуштмешкӹнӓ, ана кач дӓ ана йӱ манын, нӹнӹ цуратленӹт. Кӹзӹт нӹнӹ, тидӹн доно келшӹметӹм вычен, йӓмдӹ шалгат».22Тӹнӓм полк вуйлатышы «Тидӹм мӹлӓм увертӓрӹмет гишӓн иктӹлӓнӓт ит попы» манын дӓ ӹрвезӹм колтен.

23Вара полк вуйлатышы кок шӱдӹвуйым ӱжӹн дӓ келесен: «Кесариш кеӓш кым цӓш йыдеш кокшӱдӹ ялешкӹ салтакым, тенгеок шӹмлу имниэшкӹм дӓ пикшӹзӹ кокшӱдӹ эдемӹм йӓмдӹлӹдӓ.24Оселвлӓмӓт йӓмдӹлӹдӓ. Павелӹм кышкыжтен шӹндӹштӹ дӓ нимахань эксӹкдеок вуйлатышы Феликс докы нӓнгештӹ».25Вара тӹдӹ техень сирмӓшӹм сирен:26«Клавдий-Лисий когон шотеш пиштӹмӹ вуйлатышы Феликслан: сусу ли.27Ти эдемӹм иудейвлӓ кыченӹт дӓ пуштнештӹ ыльы. Мӹнь салтаквлӓ доно кенӓм дӓ, Рим гражданин ылмыжым пӓлен нӓлмӹкӹ, тӹдӹм ытаренӓм.28Вара, тӹдӹм ма гишӓн йӓтлӹмӹм пӓлӓш манын, нӹнӹн Синедрионышкы нӓнгенӓм.29Тӹдӹм иудей закон доно кӹлдӓлтшӹ ядышвлӓ гишӓн йӓтлӹмӹм ужынам, но тӹдӹм пушташ ӓли кызаматыш шӹндӓш ситӹшӹ нимахань вуйнаматшат уке,30а тӹдӹн ваштареш иудейвлӓн йӹвӹрт попен келшӹмӹштӹ гишӓн увер мӹнь докем шомыкы, тӹдӹм тӹнӓмок тӹнь докет колтенӓм, йӓтлӹшӹвлӓлӓн вуй шимӹштӹм тӹнь анзылнет попаш шӱденӓм. Шу ли».

31Салтаквлӓ, шӱдӹмӹм шоктен, Павелӹм сагашты нӓлӹнӹт дӓ йыдым Антипатридаш нӓнгенӹт,32а иргодешӹжӹ имниэшкӹвлӓм Павел доно колтенӹт, молышты крепостьыш пӧртӹлӹнӹт.33А имниэшкӹвлӓ, Кесариш шомыкы, сирмӓшӹм вуйлатышылан пуэнӹт, Павелӹмӓт канден шагалтенӹт.34Вуйлатышы сирмӓшӹм лыдын дӓ Павелӹн кышец ылмыжы гишӓн ядын. Килики гӹц ылмыжым пӓлен нӓлмӹкӹ,35келесен: «Кынам йӓтлӹшӹвлӓэт толыт, тӹнӓм тӹньӹн пӓшӓэтӹм анжен лӓктӓм». Вара Иродын преториштӹжӹ Павелӹм оролаш шӱден.


*а 23:5 Исх 22:28

*б 23:23 Кым цӓш йыд – мӓмнӓн жеп доно ӹндекш цӓш вады.

*в 23:26 «Сусу ли» – грек йӹлмӹштӹ тидӹжӹ здоровайымы шамак.


предыдущая глава Глава 23 следующая глава