Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКЫН СИРӸМӸ СВЯТОЙ ЕВАНГЕЛИ

15 Глава


1 Иисус Пилат анзылны. 6 Иисус ӓли Варавва. 16 Салтаквлӓ Иисусым орландарат. 21 Крестеш пыдален сӓкӹмӓш. 33 Иисусын колымыжы. 43 Иисусым тайымаш.

1Ирок ирӹ архиерейвлӓ, халыкын когораквлӓжӹ, закон тымдышывлӓ дӓ Синедрионыш пырышы цилӓ эдемвлӓ кӓнгӓшӓш погыненӹт. Вара нӹнӹ Иисусым пидӹн нӓнгенӹт дӓ Пилатлан пуэнӹт.2Пилат Иисус гӹц ядын: «Тӹнь иудейвлӓн Кугижӓштӹ ылат?» Иисус манын: «Ӹшке тидӹм келесӹшӹц».3Архиерейвлӓ Иисусым шукы гишӓн йӓтленӹт.4Пилат Тӹдӹ гӹц эчеӓт ядын: «Тӹнь нимат ат келесӹ? Ужат, Тӹнь ваштарешет кынар йӓтлӹмӓш улы».5Но Иисус ӹнде нимат попыде, седӹндон Пилат когон ӧрӹн.

6Кычен питӹрӹмӹвлӓ логӹц халык ядмы ик эдемӹм Пилат празнык годым со ирӹкӹш лыктын.7Тӹнӓм Варавва лӹмӓн эдем ӹшке тӓнгвлӓжӹ доно иквӓреш питӹрӹмӓштӹ ылын, пыдыранзык годым нӹнӹ эдемӹм пуштыныт.8Молнамшы семӹньок ӹштӹжӹ манын, Пилат гӹц халык саслен ядаш тӹнгӓлӹн.9Пилат келесен: «Тӓлӓндӓ иудейвлӓн Кугижӓштӹм лыктам гӹнь, яра?»10Тӹдӹ вет пӓлен: архиерейвлӓ йӓнгӹштӹ йылымы гишӓн Иисусым кычен пуэнӹт.11Но архиерейвлӓ Иисусым агыл, а Вараввам лыкташ ядаш халыкым тӓрвӓтенӹт.12Пилат эчеӓт халык гӹц ядын: «Кӱм иудейвлӓн Кугижӓштӹ маныда, Тӹдӹн доно тӓ мӹлӓм мам ӹштӹктӹнедӓ?»13«Тӹдӹм пыдален сӓкӹ!» – халык саслен.14Пилат ядын: «Махань вара худам Тӹдӹ ӹштен?» Но халык эчеӓт когоракын саслен: «Тӹдӹм пыдален сӓкӹ!»

15Пилат, халыклан ярал лиӓш манын, нӹнӹлӓн Вараввам колтен, а Иисусым лыпш доно лыпшыктен дӓ пыдален сӓкӓш пуэн.

16Салтаквлӓ Иисусым преторин кӧргӹ кудывичӹш нӓнгенӹт дӓ улы полкым ӱжӹн канденӹт.17Нӹнӹ Тӹдӹлӓн пӹцкӓтӓ-якшар выргемӹм чиктенӹт. Имӓн укшвлӓ доно вуйгӹшӹлӹм пидӹнӹт дӓ вуйышкыжы пиштенӹт.18«Сусу ли, иудейвлӓн Кугижӓштӹ!» – нӹнӹ попаш тӹнгӓлӹнӹт.19Нӹнӹ Тӹдӹм вуй гӹц панды доно шинӹт, вӹкӹжӹ шӹвенӹт, анзыланжы сукалтен шӹнзӹн, кымалыныт.20Тӹдӹм мыскылен цӓрнӹмӹкӹштӹ, вӹлецӹнжӹ пӹцкӓтӓ-якшар выргемӹм кыдашыныт, ӹшке выргемжӹм чиктенӹт дӓ Иисусым пыдален сӓкӓш нӓнгенӹт.

21Эртен кешӹ ик эдемлӓн, Кириней гӹц ылшы Симонлан, Александр дон Руфын ӓтяштӹлӓн, ныр гӹц толшылан, Иисусын крестӹжӹм намалыктенӹт.22Иисусым Голгофа манмы вӓрӹш канденӹт, ти лӹмжӹ «лепкӓ вӓр» манмым анжыкта.23Иисуслан смирнӓм ярымы якшар ӓрӓкӓм пуэнӹт, но Тӹдӹ йӱде.24Иисусым пыдален сӓкенӹт, а Тӹдӹн выргемжӹм, кӱлӓн мам нӓлӓш, шӹвӓм ӹштен, пайыленӹт.25Тӹдӹм пыдален сӓкӹмӹ годым кымшы цӓш ылын.26Вуйнаматшым анжыктен сирӹмӹ ылын: «Иудейвлӓн Кугижӓштӹ».

27Кок разбойникӹм Иисус доно иквӓреш пыдален сӓкенӹт, иктӹжӹм – вургымла монгыреш, весӹжӹм – шалахаеш.28Сирӹмӓшӹштӹ тенге келесӹмӹ шокталтын: «Законым пыдыртышы лошкы пыртенӹт».29Эртен кешӹвлӓ, вуйыштым ӹрзен, Тӹдӹм мыскылен попенӹт: «Эй, Тӹнь, Йымын пӧртӹм шӓлӓтен дӓ кым кечӹштӹ угӹц ӹштен кердшӹ!30Ӹшкӹметӹм Ӹшке ытары дӓ крестӹ гӹц валы!”31Тенгеок архиерейвлӓ дон закон тымдышывлӓӓт ӹшке лоштышты мыскылен попенӹт: «Йӓлӹм ытарен, а Ӹшкӹмжӹм ытарен ак керд.32Ти Христос, Израильӹн Кугижӓжӹ, ӹнде крестӹ гӹц валыжы! Тидӹм ужмыкы, мӓ ӹняненӓ». Иисус доно иквӓреш пыдален сӓкӹмӹвлӓӓт Тӹдӹм вырсенӹт.

33Кечӹвӓлӹн, куд цӓшӹш кемӹкӹ, улы мӱлӓндӹ вӹлнӹ пӹцкемӹш лин дӓ ӹндекшӹш кемӹ якте тенге ылын.34Ӹндекш цӓшӹш кемӹкӹ, Иисус кого юк доно сӹгӹрӓл колтен: «Элои, Элои, ламма савахфани?» Тидӹжӹ «Йымем, Йымем, малын Мӹньӹм коденӓт?» манмы лиэш.35Сагажы шалгышывлӓ логӹц южышты, тидӹм колын, попенӹт: «Теве Тӹдӹ Илиям ӱжеш».36Ик эдем кыргыж миэн, губкым шапышы ӓрӓкӓэш нӧртен, панды вуеш керӹлӹн, Иисуслан йӱӓш пуэн дӓ келесен: «Вычал, анжалына, Илия Тӹдӹм крестӹ гӹц валташ толеш ма?»37Но Иисус когон сӹгӹрӓл колтен, дӓ йӓнгжӹ лӓктӹн.

38Тӹнӓм Йымын пӧртӹштӹшӹ кого савыц кӱшӹц ӱлӹкӹ коктеш кышкедӓлтӹн.39Иисус ваштареш шалгышы шӱдӹвуй, Тӹдӹн тенге сӹгӹрӓл колымыжым ужынат, келесен: «Ти Эдем лачокат Йымын Эргӹ ылын!»40Тӹштӹ ӹдӹрӓмӓшвлӓӓт ылыныт, нӹнӹ ӧрдӹж гӹц анжен шалгенӹт. Нӹнӹ лошты Мария Магдалина, изирӓк Иаковын дӓ Иосийӹн Мария ӓвӓштӹ, Саломия ылыныт.41Кынам Иисус Галилейӹштӹ ылын, нӹнӹ паштекшӹ кенӹт дӓ Тӹдӹлӓн служенӹт. Тӹшток Иисус доно Иерусалимӹш иквӓреш толшы шукы вес ӹдӹрӓмӓшвлӓӓт ылыныт.

42Вады лишемӹн. Тӹнӓм кукшыгечӹ анзыцшы когарня кечӹ ылын. Седӹндон43Синедрион кӓнгӓшӹн шотеш пиштӹмӹ эдемжӹ, Аримафейӹштӹшӹ Иосиф, толын, – тӹдӹ ӹшкеӓт Йымын Кугижӓншӹ толмым вычен – Пилат докы лӱдде пырен дӓ Иисусын кӓпшӹм ядын.44Иисус лачок колен шоктен ма манын, Пилат ӧрӹн. Тӹдӹ шӱдӹвуйым ӱжӹктен дӓ Иисус шукердок колен ма, манын ядын.45Тидӹм шӱдӹвуй гӹц пӓлен нӓлмӹкӹ, Иисусын кӓпшӹм Иосифлӓн пуэн.

46Иосиф итӹн мӹнерӹм тӱлен нӓлӹн, Иисусым валтен, мӹнереш вӹдӹлӹн дӓ кырык нереш капайымы шӹгерӹш пиштен. Шӹгер ӓнгжӹм кого кӱ доно питӹрен.47Мария Магдалина дӓ Иосийӹн Мария ӓвӓжӹ Иисусым кышак пиштӹмӹм анженӹт.


*а 15:25 Кымшы цӓш – мӓмнӓн жеп доно кӓндӓкш цӓш эртӹмӹкӹ.

*б 15:33 Куд цӓш – мӓмнӓн жеп доно тура кечӹвӓл.

*в 15:34 Пс 21:2.


предыдущая глава Глава 15 следующая глава