Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКЫН СИРӸМӸ СВЯТОЙ ЕВАНГЕЛИ

14 Глава


1 Священниквлӓ Иисусым пушташ шанат. 3 Вифаништӹ Иисусым миро доно шӹрӹмӓш. 10 Иисусым Иуда выжала. 12 Когечӹ вады качкыш. 22 Святой вады качкыш. 27 Тыменьшӹвлӓжӹн карангмышты гишӓн Иисус анзыцок келесӓ. 32 Иисус Гефсимаништӹ йымыдылеш. 43 Иисусым кычат. 53 Синедрион анзылны. 66 Петрӹн карангмыжы.

1Кок кечӹштӹ Когечӹ дӓ Шергиндӹ празнык тӹнгӓлшӓшлык ылын. Архиерейвлӓ дон законым тымдышывлӓ Иисусым алтален кычаш дӓ пушташ йӧнӹм кӹчӓлӹнӹт.2Нӹнӹ попенӹт: «Празнык годым тидӹм ӹштӓш ак кел, халык лошты пыдыранзык тӓрвӓнен кердеш».

3Кынам Иисус Вифаништӹ проказа церӓн Симонын пӧртӹштӹжӹ ылын дӓ качкын, тӹшкӹ ик ӹдӹрӓмӓш пырен, нард гӹц ӹштӹмӹ пиш шергӓкӓн ире миром алебастр ӓтеш канден. Тӹдӹ ӓтӹ нержӹм пыдыртен, а миром Иисусын вуйышкыжы опталын.

4Южшы шӹдешкенӹт дӓ иктӹ-весӹштӹлӓн попенӹт: «Малын тенге миром такеш кычылт пӹтӓрӓш?5Ти миром кымшӱдӹ утла динариэшвыжалаш, оксажым незервлӓлӓн пуаш лиэш ыльы». Нӹнӹ ӹдӹрӓмӓшӹм вырсенӹт.

6Но Иисус келесен: «Тӹдӹн гӹц карангда, малын тӹдӹм шытырланыктынедӓ? Тӹдӹ Мӹлӓм пуры пӓшӓм ӹштен.7Незервлӓ сагада со лит, тӓ нӹнӹлӓн, кынам шанедӓ, тӹнӓм пурым ӹштен кердӹдӓ. А Мӹнь тӓ сагада со ам ли.8Тӹдӹ ма кердмӹжӹм ӹштен, анзыцок Мӹньӹн кӓпем таяш шӹрен йӓмдӹлен.9Тӓлӓндӓ лачок попем: цилӓ сӓндӓлӹк мычкы, кышты Пуры Уверӹм шӓрӓш тӹнгӓлӹт, тенгеок ти ӹдӹрӓмӓшӹн мам ӹштӹмӹжӹ гишӓн попаш дӓ ӹшкӹмжӹм ӓшӹндӓрӓш тӹнгӓлӹт».

10Луаткок тыменьшӹжӹ гӹц иктӹжӹ, Искариот манмы Иуда, Иисусым выжалаш манын, архиерейвлӓ докы кен.11Иудам колыштмыкы, архиерейвлӓ сусу линӹт дӓ тӹдӹлӓн ши оксам тӱлӓш сӧренӹт. Иисусым выжалаш манын, Иуда йӧнӓн жепӹм вычаш тӹнгӓлӹн.

12Шергиндӹ празныкын пӹтӓриш кечӹн, кынам овуца семӹнь когечӹ патям шӹшкӹлӹнӹт, тыменьшӹвлӓжӹ Иисус гӹц ядыныт: «Тӹнь когечӹ качкышым кышты качкаш шанет? Мӓ тӹдӹм йӓмдӹлӓш кенӓ».13Тӹнӓм Иисус нӹнӹ логӹц коктылан келесен колтен: «Халашкы кедӓ. Тӹштӹ кувшинеш вӹдӹм намал кешӹ пӱэргӹм тӓ вӓшлидӓ. Паштекшӹ кедӓ.14Кыды пӧртӹш пыра, тӹ пӧрт хозалан келесӹдӓ: ”Тымдышына ядеш: Мӹлӓм тыменьшӹвлӓэм доно когечӹ качкышым качкаш кӹдежет кышты?”15Тӹ эдем тӓлӓндӓ тидӹлӓн йӓмдӹлӹмӹ дӓ поген шӹндӹмӹ йонгата кӱшӹл кӹдежӹм анжыкта. Тӹшӓк мӓлӓннӓ цилӓ йӓмдӹлӹдӓ».16Тыменьшӹвлӓжӹ кенӹт, халашкы пыренӹт. Цилӓжӓт Иисусын попымыжы семӹньок лин. Нӹнӹ когечӹ качкышым йӓмдӹленӹт.

17А вады шомыкы, тӹшкӹ луаткок тыменьшӹжӹ доно иквӓреш Иисус толын.18Стӧл лошты качмышты годым Тӹдӹ келесен: «Тӓлӓндӓ лачок попем: тӓ логӹцдӓ иктӹжӹ, кӱ кӹзӹт Мӹнь донем иквӓреш качкеш, Мӹньӹм выжала».19Тыменьшӹвлӓжӹ когон сылыкланенӹт. Иктӹ паштек весӹ Тӹдӹ гӹц ядышташ тӹнгӓлӹнӹт: «Мӹньок агыл? Мӹньок агыл?»20Но Иисус келесен: «Луаткоктыт гӹц иктӹжӹ, кӱ ӓтӹш Мӹнь донем иквӓреш киндӹм темдӓлеш.21Лачок, Эдем Эргӹ гишӓн кыце сирӹмӹ, ӹлӹмӓш гӹц Тӹдӹ тенге кеӓ, но Эдем Эргӹм выжалышылан ойхы лиэш: шачде ылгецӹ, тӹ эдемлӓн яжорак лиэш ыльы».

22Качмышты годым Иисус киндӹм нӓлӹн, благословаен, тодылын, нӹнӹлӓн пуэн дӓ келесен: «Нӓлдӓ, качда. Тидӹ Мӹньӹн Кӓпем».23Вара цӓшкӓм нӓлӹн, таум ӹштен, нӹнӹлӓн пуэн. Цилӓнӓт тӹшец йӱнӹт.24Иисус попен: «Тидӹ – шукы эдем верц йоктарымы Мӹньӹн у согонь Вӹрем.25Тӓлӓндӓ лачок попем: Йымын Кугижӓншӹштӹ у якшар ӓрӓкӓм йӱмӹ кечӹ шомешкӹ, Мӹнь виноград кӹцкӹ гӹц ӹштӹмӹм ӹнде ам йӱ».

26Варажы нӹнӹ псаломым мыренӹтӓт, Елеон кырыкыш кенӹт.

27Иисус нӹнӹлӓн попен: «Цилӓн тӓ Мӹнь гӹцем ти йыдым карангыда. Сирӹмӹ: ”Кӹтӧзӹжӹм лыпшал шуэм – шарыквлӓ шӓлӓнӓт”.28Но Мӹнь, ӹлӹж кӹньӹлмӹкем, тӓмдӓм Галилейӹштӹ вӓшлиӓм».29Петр Тӹдӹлӓн келесен: «Цилӓн Тӹнь гӹцет карангыт гӹнят, мӹнь агым!»30Иисус келесен: «Тӹлӓнет лачок попем: тагачы, ти йыдымок, ӓптӓн кок гӓнӓ мыралтымешкӹ, тӹнь кым гӓнӓ Мӹнь гӹцем карангат».31Но Петр пытрак ӹняндӓрен попен: «Тӹнь донет иквӓреш мӹлӓм колаш вӓрештеш гӹнят, мӹнь Тӹнь гӹцет ам каранг!» Весӹвлӓӓт тидӹмок попенӹт.

32Нӹнӹ Гефсимани манмы вӓрӹш толыныт, дӓ Иисус тыменьшӹвлӓжӹлӓн келесен: «Мӹнь йымыдылмем годым тиштӹ шӹнзӹдӓ».33Тӹдӹ сагажы Петрӹм, Иаковым дӓ Иоанным нӓлӹн. Иисус ӧрӹн лӱдӓш дӓ ясыланаш тӹнгӓлӹн.34Тӹдӹ манын: «Мӹньӹн йӓнгем колышашла ойхыра, тиштӹ лидӓ дӓ тӓӓт идӓ амалы».

35Изиш ӧрдӹшкӹрӓк карангмыкы, Иисус мӱлӓндӹ вӹкӹ шынгалтын. Лиэш гӹнь, ти жеп Мӹнь дорцем эртен кежӹ ыльы манын, сарвален попен.36Тӹдӹ попен: «Авва! Ӓти! Тӹнь цилӓ кердӓт. Ти цӓшкӓм Мӹнь дорцем карангды. Но Мӹнь шанымем семӹнь агыл, а Тӹнь шанымет семӹнь лижӹ».

37Вара Тӹдӹ тыменьшӹвлӓжӹ докы толын, нӹнӹм амалышывлӓм ужын дӓ Петрлӓн попен: «Симон, тӹнь амалет? Ик цӓшӹмӓт амалыде тырхен кердделат?38Аздаралташ ӹнжӹ ли манын, амалыде пыт шалгыда дӓ ыдылда. Шӱлӹш кымылан, а кӓп силадымы».

39Иисус угӹц кен дӓ тӹ шамак донок ыдылын.40Кынам Тӹдӹ пӧртӹлӹн, тыменьшӹвлӓжӹм эчеӓт амалышывлӓм ужын, вет нӹнӹн сӹнзӓштӹм ом темден, дӓ Иисуслан мам келесӓшӓт пӓлӹделыт.

41Кымшы гӓнӓ толмыкы, Иисус келесен: «Тӓ эчеӓт амаледӓ дӓ кӓнедӓ? Ситӓ! Жеп шон. Эдем Эргӹ сулыканвлӓн кидӹш пуалтеш.42Кӹньӹлдӓ, кенӓ. Теве Мӹньӹм выжалышы лишемеш».

43Иисусын попымыжы годымок луаткок тыменьшӹжӹ гӹц иктӹжӹ, Иуда, дӓ тӹдӹн сага мечӓн дӓ шывынян шукы эдем толын. Нӹнӹм архиерейвлӓ, законым тымдышывлӓ дӓ халыкын когораквлӓжӹ колтенӹт.44Выжалышы нӹнӹлӓн Иисусым тенге анжыкташ сӧрен: «Кӱм мӹнь шыпшалам, Иисус ылеш. Тӹдӹм кычыда дӓ оролен нӓнгедӓ».45Толмыкы, Иуда тӧрӧк Иисус докы миэн дӓ манын: «Равви! Равви!» Вара Тӹдӹм шыпшалын.46Вара Иисус вӹкӹ кидӹштӹм лӱктӓлӹнӹт дӓ роалтен кыченӹт.47Тӹштӹ шалгышывлӓ логӹц иктӹжӹ мечшӹм лыктын дӓ архиерейӹн тӓрзӹжӹм роалын, тӹдӹн пӹлӹшӹжӹм пӹчкӹн шуэн.

48Тӹнӓм Иисус нӹнӹлӓн келесен: «Разбойник вӹкӹ лӓкмӹлӓ, мечӹм, шывыньым нӓлӹн, тӓ Мӹньӹм кычаш толында.49Кечӹнь Йымын пӧртӹштӹ тӓ доныда ылынам дӓ халыкым тымденӓм, а тӓ Мӹньӹм кычыделда. Но Писаништӹ келесӹмӹ шокталтшашлык».50Иисусым коден, цилӓ тыменьшӹжӹ кыргыжыныт.

51Но ик сӓмӹрӹк пӱэргӹ Иисус паштек кен. Тӹдӹн цӓрӓ монгырыштыжы лач мӹнер леведӹш веле ылын. Салтаквлӓ пӱэргӹм роалтен кыченӹт,52а тӹдӹ, леведӹшӹжӹм коден, нӹнӹ гӹц цӓрӓн кыргыжын.

53Иисусым архиерей докы нӓнгенӹт, дӓ тӹшкӹ архиерейвлӓ, халыкын когораквлӓжӹ дӓ законым тымдышывлӓ цилӓн погыненӹт.54А Петр ӧрдӹж гӹц Тӹдӹн паштек архиерейӹн кудывичӹшкӹжӹ кен дӓ тӓрзӹвлӓ сага тыл тӹрӹш ӹрӓш шӹнзӹн.

55Архиерейвлӓ дӓ цилӓ Синедрион, Иисусым пушташ манын, Тӹдӹн ваштареш йӓтлӹмӓшӹм кӹчӓлӹнӹт, но моделыт.56Тӹдӹм алтален йӓтлӹшӹ шукын линӹт, но нӹнӹн попымышты вӓш-вӓш келшен толде.57Южшы шагалыныт дӓ Тӹдӹн ваштареш, алтален, тенге попенӹт:58«Мӓ Тӹдӹн тенге попымыжым колынна: ”Эдемвлӓн кид доно ӹштӹмӹ Йымын ти пӧртӹм Мӹнь шӓлӓтем дӓ, эдем кид тӹкнӹдеок, кым кечӹштӹ весӹм ӹштен шӹндем”».59Но нӹнӹн тенге попымыштат иктӹ-весӹштӹ гӹц айыртемӓлтӹн.

60Тӹнӓм архиерей кӹньӹл шагалын, анзык лӓктӹн дӓ Иисус гӹц ядын: «Тӹнь малын нимат ат попы? Ваштарешет йӓтлен попымылан мам вӓшештет?»61Но Иисус юкымат лыкде дӓ вӓшештӹде. Архиерей Тӹдӹ гӹц эче ядын: «Тӹнь Христос, хвальымы Йымын Эргӹ, ылат ма?»62Иисус келесен: «Мӹнь ылам. Тилец вара тӓ Эдем Эргӹн Силан Йымын вургымла монгырышты шӹнзӹмӹжӹм дӓ пӹлгомыштышы пӹл вӹлӓн толмыжым ужыда».63Тӹнӓм архиерей ӹшке выргемжӹм кышкедӹн дӓ келесен: «Эче махань свидетельвлӓ мӓлӓннӓ келӹт?64Тӓ Йымым мыскылымыжым колда. Тидӹлӓн тӓ мам келеседӓ?» Иисус вуйнаматан дӓ колышашлык, цилӓн маныныт.

65Тӹнӓм южшы Тӹдӹн вӹкӹ шӹвӓш тӹнгӓлӹнӹт. Иисусын лицӓжӹм питӹренӹт, Тӹдӹм шинӹт дӓ попенӹт: «Ӹнде пророкла попы!» Тӓрзӹвлӓӓт Иисусым лицӓ гӹц шинӹт.

66Кынам Петр ӱлнӹ, кудывичӹштӹ, ылын, тӹшкӹ архиерейӹн ик тӓрзӹ ӹдӹржӹ толын.67Тыл сага ӹрен шӹнзӹшӹ Петрӹм ужын, тӹшленрӓк анжалын дӓ манын: «Тӹнят ти Назарет Иисус доно иквӓреш ылынат».68Но Петр тореш келесен: «Мам тӹнь попет, ам пӓлӹ дӓ ам ынгылы», – манын дӓ анзыл кудывичӹш ашкедӹн. Тӹнӓмок ӓптӓн мыралтен.69Тӓрзӹ ӹдӹр тӹдӹм эче ужын дӓ тӹштӹ шалгышывлӓлӓн попаш тӹнгӓлӹн: «Тидӓт нӹнӹ логӹц».70Петр эчеӓт тореш попен. Изиш лимӹкӹ, сагажы шалгышывлӓ тӹдӹлӓн келесенӹт: «Лачокат, тӹнь нӹнӹ логӹц ылат. Тӹнят Галилей гӹц ылат, тӹньӹн попыметӓт нӹнӹн ганьы».71«Тӓ Кӱ гишӓн попедӓ, тӹ Эдемӹм мӹнь ам пӓлӹ» манын, Петр Йымы анзылны цуратлен попаш тӹнгӓлӹн.72Тӹнӓм ӓптӓн кокшы гӓнӓ мыралтен колтен, дӓ Петр Иисусын попымы шамакшым ӓшӹндӓрен: «Ӓптӓн кок гӓнӓ мыралтымешкӹ, тӹнь кым гӓнӓ Мӹнь гӹцем карангат». Вара тӹдӹ мӓгӹрӓш тӹнгӓлӹн.


*а 14:5 300 динари – тинӓр оксажы ик иӓш пӓшӓдӓр нӓрӹ ылын.

*б 14:27 Зах 13:7.

*в 14:36 Авва – арамей йӹлмӹштӹ «ӓти» манмым анжыкта.

*г 14:62 Дан 7:13.

*д 14:63 Выргемӹм кышкедмӓш – тенге ӹштӹмӓш кого ойхым, худалан шотлымым анжыкта.


предыдущая глава Глава 14 следующая глава