Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКЫН СИРӸМӸ СВЯТОЙ ЕВАНГЕЛИ

16 Глава


1 Ӹлӹж кӹньӹлмӓш. 9 Лишӹлвлӓжӹлӓн Иисусын каймыжы.

1Кукшыгечӹ эртӹмӹкӹ, Мария Магдалина, Иаковын Мария ӓвӓжӹ дӓ Саломия Иисусын кӓпшӹм шӹрӓш кеӓш манын, тотлы пышан ӱм оксала нӓлӹнӹт.2Кукшыгечӹ иргодешӹжӹ когон ирӹ, кечӹ лӓкмӹ годым, нӹнӹ шӹгер докы кенӹт.3Ӹшке лоштышты попенӹт: «Ӓнгӹштӹшӹ кӱм мӓлӓннӓ кӱ карангден пуа?»

4Анжалыныт дӓ ужыныт: кӱм ӧрдӹжӹшкӹ карангдымы. Кӱжӹ пиш кого ылын.5Нӹнӹ кӧргӹшкӹ пыренӹт, тӹштӹ вургымла велнӹ шӹнзӹшӹ ош выргемӓн ӹрвезӹм ужыныт дӓ лӱдӹнӹт.6Но тӹдӹ нӹнӹлӓн келесен: «Идӓ лӱд. Тӓ пыдален сӓкӹмӹ Назарет Иисусым кӹчӓлӹдӓ. Тӹдӹ ӹлӹжӹн, тиштӹ уке. Теве Тӹдӹм пиштӹмӹ вӓр.7А ӹнде кедӓ, Тӹдӹн тыменьшӹвлӓжӹлӓн дӓ Петрлӓн тенге келесӹдӓ: ”Кыце тӓлӓндӓ попен, тӓмдӓм Галилейӹштӹ вӓшлиэш. Тӹштӹ Тӹдӹм ужыда”».

8Ӹдӹрӓмӓшвлӓ лӓктӹнӹт дӓ шӹгер гӹц кыргыжыныт. Нӹнӹм лӱдмӓш ӓвӓлтен, дӓ лӱдӹн цӹтӹренӹт. Нӹнӹ лӱдмӹштӹ доно иктӹлӓнӓт нимат попыделыт.

9Кукшыгечӹ иргодеш ирок ирӹ ӹлӹж кӹньӹлмӹкӹжӹ, Иисус пӹтӓриок Мария Магдалиналан кайын. Иисус тӹдӹн кӧргӹжӹ гӹц шӹм иӓм поктен лыктын ылын.10Мария кен дӓ Иисус доно иквӓреш ылшы, Тӹдӹн верц ойхырышы дӓ мӓгӹрӹшӹвлӓлӓн увертӓрен.11Иисус ӹлӹшӹ дӓ Тӹдӹм Мария ужмы гишӓн колмыкышты, нӹнӹ ӹнянӹделыт.

12Тидӹн паштек Иисус нӹнӹ логӹц коктылан солаш кемӹштӹ годым вес сӹн доно кайын.13Нинӹ пӧртӹлӹнӹт дӓ молылан шайыштыныт, но нӹнӹлӓнӓт ӹнянӹделыт.

14Вара Иисус луатик тыменьшӹжӹлӓн качмышты годым ӹшкӹлӓнӹштӹ кайын. Нӹнӹ Тӹдӹм ӹлӹжшӹм ужшы эдемвлӓн попымыштылан ӹнянӹделыт, седӹндон Тӹдӹ ӹнянӹдӹмӹштӹ дӓ йӓнгӹштӹ пингӹдеммӹ гишӓн вырсенрӓк попен.15Нӹнӹлӓн келесен: «Сӓндӓлӹк мычкы кедӓ дӓ Пуры Уверӹм Йымын ӹштӹмӹ улы сӓндӓлӹклӓн шӓрӹдӓ.16Кӱ ӹнянӓ Пуры Уверлӓн дӓ крестӓлтеш – ытаралтеш. Кӱ ак ӹнянӹ – суялтеш.17Ӹнянӹшӹвлӓ сага техень пӓлӹквлӓ лит: Мӹньӹн лӹмем доно нӹнӹ иӓвлӓм поктен лыкташ, у йӹлмӹвлӓ доно попаш тӹнгӓлӹт.18Кидӹшкӹштӹ кӹшкӹм нӓлӹн кердӹт, дӓ пуштын кердшӹм иктӓ-мам йӱт гӹнь, тидӹ нӹнӹлӓн нимахань эксӹкӹм ак ӹштӹ. Нӹнӹ кидӹштӹм церлӹвлӓ вӹкӹ пиштӓт, дӓ нӹнӹжӹ паремӹт».

19Нӹнӹлӓн тидӹм попымыкы, Господь пӹлгомыш кузен кен дӓ Йымын вургымла велӹшкӹ шӹнзӹн.20Тӹдӹн тыменьшӹвлӓжӹ кенӹт дӓ цилӓ вӓре увертӓрен тымденӹт. Господь нӹнӹ доно иквӓреш ӹштен дӓ шамакшым пӓлӹквлӓ доно пингӹдемден. Аминь.


предыдущая глава Глава 16 следующая глава