Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКЫН СИРӸМӸ СВЯТОЙ ЕВАНГЕЛИ

13 Глава


1 Йымын пӧртӹм шӓлӓтӹмӹ гишӓн анзыцок келесӹмӓш. 3 Орлыкын тӹнгӓлтӹшӹжӹ. 14 Кого ясыланымаш. 24 Эдем Эргӹн толмыжы. 32 Кечӹ дон цӓшӹжӹ пӓлӹ агыл.

1Йымын пӧрт гӹц Иисус лӓкмӹ годым тыменьшӹвлӓжӹ логӹц иктӹжӹ Тӹдӹлӓн келесен: «Тымдышы! Анжал, махань кӱвлӓ, махань ӹлӹшвлӓ!»*a2Иисус тӹдӹлӓн манын: «Тӹнь ти кого кӱ ӹлӹшвлӓм ужат? Но тиштӹ кӱ вӹлӓн кӱ ак код. Цилӓ шӓлӓтӹмӹ лиэш».

3Елеон кырыкышты Йымын пӧрт ваштареш шӹнзӹмӹжӹ годым Иисус гӹц ӹшкетӹшток Петр, Иаков, Иоанн дӓ Андрей ядыныт:4«Мӓлӓннӓ келесӹ, кынам тидӹ лиэш? Тенге лишӓшлыкым махань пӓлӹк анжыкта?»

5Иисус нӹнӹлӓн попаш тӹнгӓлӹн: «Перегӓлтдӓ, иктӓт тӓмдӓм ӹнжӹ алталы.6Шукын вет Мӹньӹн лӹмем доно толыт. Нӹнӹ ”мӹнь Тӹдӹ ылам” маныт дӓ шукыштым алталат.7Вырсы юкым дӓ вырсы гишӓн увервлӓм колмыкыда, идӓ лӱд. Цилӓ тидӹ лишӓшлык, но тидӹ эче мычаш агыл.8Халык вӹкӹ халык кӹньӹлеш, кугижӓншӹ вӹкӹ – кугижӓншӹ. Шукы вӓре мӱлӓндӹ цӹтӹрнӓлтеш, шужымаш дӓ пыдыранзык толеш, тидӹ – орлыкын тӹнгӓлтӹшӹжӹ.

9Перегӓлтдӓ! Тӓмдӓм кычат дӓ суяш пуат, синагогвлӓштӹ шиӓш тӹнгӓлӹт. Мӹнь верцем тӓмдӓм вуйлатышывлӓ дӓ кугижӓвлӓ анзыкы шагалтат. Тидӹ нӹнӹлӓн Мӹнь гишӓнем пӓлдӹртӹмӓш лиэш.10Но тишец анзыц цилӓ халык лошты Пуры Уверӹм шӓрӹмӹлӓ.11Кынам тӓмдӓм судыш кычен нӓнгеӓт, мам попышашлыкда гишӓн анзыцок идӓ тыргыжланы. Ма тӓлӓндӓ ти цӓшӹн пуалтеш, тӹдӹмок попыда, вет тӓ агыл попаш тӹнгӓлӹдӓ, а Святой Шӱлӹш.12Ӹзӓжӹ шоляжым, ӓтяжӹ тетяжӹм пушташ пуат, а тетявлӓ ӓтя-ӓвӓштӹ ваштареш шагалыт дӓ нӹнӹм пуштыт.13Мӹньӹн лӹмем верц цилӓн тӓмдӓм ужын керддӹмӹ лит. А мычаш якте тырхышы ытаралтеш.

14Кышты лишӓшлык агыл, тӹштӹ Даниил пророкын попымы охыреммӹ йӹрнӹкӹм ужмыкыда, – лыдшы ынгылыжы – Иудейӹштӹ ылшывлӓ кырыкыш кыргыжышты.15Кӱ левӓш вӹлнӹ гӹнь, ӹнжӹ валы дӓ пӧртшӹ гӹц нимат нӓлӓш ӹнжӹ пыры.16Кӱ нырышты гӹнь, ӹшкӹмжӹн выргемжӹм нӓлӓш мӹнгеш ӹнжӹ пӧртӹл.17Ойхы лиэш тӹ кечӹвлӓн мӹшкӹрӓнвлӓлӓн дӓ цӹзӹм пукшышывлӓлӓн!18Тӓмдӓн кыргыжмыда телӹм ӹнжӹ ли манын, Йымым сарвалыда.19Тӹ кечӹвлӓн техень кого орлык лиэш, маханьы сӓндӓлӹкӹн тӹнгӓлтӹшӹжӹ гӹцок ылде, Йымы тӹдӹм ӹштӹмӹ паштек техеньӹ тишкевек ылде дӓ акат ли.20Ти кечӹвлӓм Господь ак кӹтӹкемдӹ ылгецӹ, иктӓт ытаралт ак керд ыльы. Но айырен нӓлмӹвлӓ верц ти кечӹвлӓм кӹтӹкемден.

21Тӹнӓм тӓлӓндӓ ”Теве тиштӹ Христос!” ӓли ”Тӹштӹ Тӹдӹ!” манын иктӓжӹ келесӓ гӹнь, идӓ ӹнянӹ.22Вет алтанзык христосвлӓ дӓ алтанзык пророквлӓ лӓктӹт, дӓ, лиэш гӹнь, айырен нӓлмӹвлӓмӓт алталаш манын, пӓлӹквлӓм дӓ цӱдӓвлӓм ӹштӓт.23Тӓ перегӓлтдӓ! Мӹнь тӓлӓндӓ цилӓ анзыцок келесенӓм.

24Тӹнӓм, ти орлык паштек, кечӹ пӹцкемӹшӓлтеш, тӹлзӹ сотым ак пу,25шӹдӹрвлӓ пӹлгом гӹц кенвазыт дӓ пӹлгомыштышы силавлӓ вӓр гӹц тӓрвӓнӓт.26Тӹнӓм Эдем Эргӹн кого сила дӓ лӹмлештӓрӓлтмӓш доно пӹлвлӓ лошты толмыжым ужыт.27Тӹдӹ Ангелвлӓжӹм колта дӓ мӱлӓндӹн нӹл монгыр гӹц, пӹлгомын ик тӹржӹ гӹц тӹнгӓлӹн, вес тӹр якте айырен нӓлмӹ эдемвлӓжӹм пога.

28Смоква пушӓнгӹ гишӓн тыштен попымы гӹц тыменьдӓ. Кынам тӹдӹн укшвлӓжӹ ӹлӹжӹт дӓ ӹлӹштӓшӹм лыктыт, тӹнӓм пӓледӓ: кӓнгӹж лишемеш.29Тиштӓт тенгеок. Кынам попымемӹн лиӓлт толмыжым ужыда, пӓлӹдӓ: тӹдӹ лишнок, амаса анзылны.30Тӓлӓндӓ лачок попем: тидӹ цилӓ лимешкӹ, ти шачыш ак пӹтӹ.31Пӹлгом дон мӱлӓндӹ пӹтӓт, но Мӹньӹн шамаквлӓэм ак пӹтеп.

32Ти кечӹ ӓли цӓш гишӓн иктӓт ак пӓлеп. Пӹлгомыштышы Ангелвлӓӓт, Эргӓт ак пӓлӹ, лач Ӓтя веле пӓлӓ,33седӹндон анжыда, ыдылда, идӓ амалы. Тӹ жеп кынам толмым тӓ ада пӓлӹ.34Тидӹм кужы корныш кешӹ эдем доно тӓнгӓштӓрӓш лиэш. Тӹдӹ пӧртшӹм кода, тӓрзӹвлӓжӹлӓн властьым дӓ каждыйлан пасна пӓшӓм пуа, а капка оролылан амалыде оролаш шӱдӓ.35Тенге, вычыда, идӓ амалы. Вет пӧрт хозан кынам толшашлыкшым ада пӓлӹ: ӓли вадеш, ӓли йыдпелӹн, ӓли ӓптӓн мырымы доно иквӓреш, ӓли ирок ирӹ.36Тӹдӹ трӱк толеш, седӹндон идӓ амалы, тӓмдӓм амален кишӹм ӹнжӹ уж!37Мам тӓлӓндӓ попем, цилӓлӓн попем: вычен шалгыда!»


*а 13:1 Ӹлӹш – строение.

*б 13:14 Дан 9:27.


предыдущая глава Глава 13 следующая глава