Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЙӸН СИРӸМӸ СВЯТОЙ ЕВАНГЕЛИ

27 Глава


1 Иисусым Понтий Пилатын кидӹшкӹ пуат. 3 Иудан колымыжы. 11 Пилатын ядыштмыжы. 15 Пушташ решӹмӓш. 27 Салтаквлӓн мыскылымышты. 32 Иисусым пыдален сӓкӹмӓш. 45 Иисусын колымыжы. 57 Иисусым тайымаш. 62 Шӹгерӹм оролымаш.

1Ирок ирӹ архиерейвлӓ дон халыкын когоракшывлӓ, цилӓн погынен, Иисусым пушташ пумы гишӓн кӓнгӓшенӹт.2Вара Тӹдӹм пидӹн нӓнгенӹт дӓ Понтий Пилатлан, вуйлатышылан, пуэнӹт.

3Иисусым пушташ суйымым пӓлен нӓлмӹкӹ, Тӹдӹм выжалышы Иуда ӹшке самыньжым ынгылен дӓ архиерейвлӓ дон халыкын когоракшывлӓн пумы кымлы ши оксаштым мӹнгеш пуэн.4«Вуйнаматдымы вӹрӹм выжален, мӹнь сулыкым ӹштенӓм», – манын. Нӹнӹжӹ тӹдӹлӓн келесенӹт: «Мӓлӓннӓжӹ ма? Ӹшке анжы».5Йымын пӧртеш оксажым шуэн колтенӓт, Иуда лӓктӹн кен дӓ кечӓлтӹн.

6Архиерейвлӓ оксам нӓлӹнӹт дӓ келесенӹт: «Тидӹм Йымын пӧртӹн казнаш пиштӓш ак яры. Тидӹ – вӹрӹн ӓкшӹ».7Попен ярыктымыкы, ти окса доно коршок ӹштӹшӹн ныржым вес мӱлӓндӹ гӹц толшывлӓм таяш манын нӓлӹнӹт.8Седӹндон ти нырым тагачы яктеӓт «Вӹр ныр» маныт.9Тенге Иеремий пророк гач келесӹмӹ шамак шокталтын, тӹдӹжӹ попен: «Нӹнӹ кымлы ши оксам, Израиль эргӹвлӓн ти Эдемлӓн пумы ӓкӹм, нӓлӹнӹт10дӓ, Господь мӹлӓм шӱдӹмӹлӓок, коршок ӹштӹшӹн ныржым ти окса доно нӓлӹнӹт».

11А Иисус вуйлатышы анзыкы шагалын. Вуйлатышы Тӹдӹ гӹц ядын: «Тӹнь иудейвлӓн Кугижӓштӹ ылат?» Иисус тӹдӹлӓн келесен: «Ӹшке тидӹм келесӹшӹц».12А кынам Иисусым архиерейвлӓ дон халыкын когоракшывлӓ вуйнаматеш лыктыныт, Тӹдӹ нимат попыде.13Тӹнӓм Пилат Тӹдӹлӓн келесен: «Тӹнь ваштарешет кынарын йӓтлен попат, ат кол ма?»14Но Иисус тӹдӹлӓн ик шамакешӹжӓт вӓшештӹде, седӹндон вуйлатышы когон ӧрӹн.

15Питӹрен шӹндӹмӹвлӓ логӹц халыкын айырен нӓлмӹ ик эдемӹм Когечӹ празныкеш ирӹкӹш лыкташ вуйлатышын овуцажы ылын.16Тӹнӓм питӹрӹмӓштӹ цилӓлӓн пӓлӹмӹ Варавва лӹмӓн эдем шӹнзен.17Тенге, халык погынымыкы, Пилат нӹнӹ гӹц ядын: «Тӓлӓндӓ мӹнь Вараввам ӓли Христос манын лӹмдӹмӹ Иисусым лыктам? Кыдыжым лыктыктынедӓ?»18Пилат вет пӓлен: йӓнгӹштӹ йылымы гишӓн Тӹдӹм кычен пуэнӹт.

19Тӹнӓм, суйымы вӓрӹштӹ шӹнзӹмӹжӹ годым, тӹдӹлӓн вӓтӹжӹ келесӓш колтен: «Ти тӧр ӹштӹшӹ эдемлӓн нимат ит ӹштӹ, мӹнь тагачы Тӹдӹ гишӓн омынышты когон ясыланенӓм».20Но архиерейвлӓ дон халыкын когораквлӓжӹ Вараввам ирӹкӹш лыкташ ядаш дӓ Иисусым пуштыкташ халыкым тӓрвӓтенӹт.21Вуйлатышы халык гӹц эче ядын: «Ти коктыт гӹц кыдыжым колтыктынедӓ?» Нӹнӹ келесенӹт: «Вараввам».22Пилат нӹнӹлӓн попен: «Мам вара мӹнь Христос манмы Иисус доно ӹштем?» Тӹдӹлӓн цилӓн попенӹт: «Пыдален сӓкӹмӹ лижӹ!»23Вуйлатышы келесен: «Махань вара худам Тӹдӹ ӹштен?» Но нӹнӹ эче когоракын сасленӹт: «Пыдален сӓкӹмӹ лижӹ!»

24Пилат ужын: нимат ак палшы, а пыдыранымаш когоэмеш веле, седӹндон, вӹдӹм нӓлӹн, халык анзылны кидшӹм мышкын дӓ келесен: «Ти тӧр ӹштӹшӹ Эдемӹн вӹржӹ гишӓн мӹнь вуйнаматан ам ыл, ӹшке анжыда».25Улы халык келесен: «Тӹдӹн вӹржӹ мӓ вӹлнӹнӓ дӓ тетявлӓнӓ вӹлнӹ лижӹ!»26Тӹнӓм Пилат нӹнӹлӓн Вараввам колтен, а Иисусым лыпш доно лыпшыктен, пыдален сӓкӓш пуэн.

27Вара вуйлатышын салтаквлӓ Иисусым преториш канденӹт, Тӹдӹн йӹржӹ улы полкым погенӹт.28Иисусын выргемжӹм кыдашыныт дӓ якшар выргемӹм чиктенӹт.29А вара, имӓн укшвлӓ доно вуйгӹшӹлӹм пидӹн, Тӹдӹн вуйышкыжы пиштенӹт дӓ вургымла кидӹшкӹжӹ пандым кычыктенӹт. Анзыланжы сукалтен шӹнзӹн, мыскылен попенӹт: «Сусу ли, иудейвлӓн Кугижӓштӹ!»30Вӹкӹжӹ шӹвенӹт, пандыжым нӓлӹн, Тӹдӹм вуйжы гӹц шинӹт.31Тӹдӹм мыскылен ситӓрӹмӹкӹштӹ, вӹлецӹнжӹ якшар выргемӹм кыдашыныт, ӹшке выргемжӹм чиктенӹт дӓ пыдален сӓкӓш нӓнгенӹт.

32Лӓкмӹштӹ годым нӹнӹ Кириней гӹц ылшы Симон лӹмӓн эдемӹм вӓшлинӹт, тӹдӹлӓн Иисусын крестӹжӹм намал нӓнгектенӹт.33Нӹнӹ Голгофа манмы вӓрӹш толыныт, ти лӹмжӹ «лепкӓ вӓр» манмым анжыкта.34Тӹштӹ Иисуслан шӓкшӹм ярымы шапышы ӓрӓкӓм йӱӓш пуэнӹт. Иисус тотештӹнӓт, ӹнежӹ йӱ ылын.

35Иисусым пыдален сӓкӹмӹкӹ, шӹвӓм ӹштен, выргемжӹм пайыленӹт36дӓ Тӹдӹм оролен шӹнзенӹт.37Иисусын вуй вӹлӓнжӹ Тӹдӹн вуйнаматшым анжыктен сирӹмӹм сӓкенӹт: «Тидӹ Иисус, иудейвлӓн Кугижӓштӹ».38Тӹдӹн доно иквӓреш кок разбойникӹм пыдален сӓкенӹт: иктӹжӹм вургымла монгыреш, весӹжӹм шалахай монгыреш.

39Эртен кешӹвлӓ, вуйыштым ӹрзен, Тӹдӹм мыскылен40попенӹт: «Тӹнь, Йымын пӧртӹм шӓлӓтен дӓ кым кечӹштӹ угӹц ӹштен кердшӹ, ӹнде Ӹшкӹметӹм Ӹшке ытары! Тӹнь Йымын Эргӹ ылат гӹнь, крестӹ гӹц валы».41Тенгеок архиерейвлӓӓт закон тымдышывлӓ, халыкын когораквлӓжӹ дӓ фарисейвлӓ доно иквӓреш мыскылен попенӹт:42«Йӓлӹм ытарен, а Ӹшкӹмжӹм ытарен ак керд. Тӹдӹ Израильӹн Кугижӓжӹ гӹнь, ӹнде крестӹ гӹц валыжы, тӹнӓм Тӹдӹлӓн ӹняненӓ.43Тӹдӹ Йымылан ӹнянен. Йымы Тӹдӹм ытарынежӹ гӹнь, кӹзӹток ытарыжы, вет Тӹдӹжӹ Ӹшкӹмжӹм Йымын Эргӹ ылам манын».44Иисус доно иквӓреш пыдален сӓкӹмӹ разбойниквлӓӓт Тӹдӹм тенгеок вырсенӹт.

45Куд цӓшӹш кемӹ гӹц ӹндекшӹшкӹ кемӹ якте улы мӱлӓндӹ вӹлнӹ пӹцкемӹш лин.46Ӹндекш цӓш кытлашты Иисус кого юк доно сӹгӹрӓл колтен: «Или, Или! Лама савахфани?» Тӹдӹжӹ «Йымем, Йымем! Малын Мӹньӹм коденӓт?» манмы лиэш.47Сагажы шалгышывлӓ логӹц южышты тидӹм колын попенӹт: «Тӹдӹ Илиям ӱжеш».48Нӹнӹ логӹц иктӹжӹ тӹнӓмок кыргыж толын, губкым нӓлӹн, шапышы ӓрӓкӓэш нӧртен, панды вуеш керӹлӹн дӓ Иисуслан йуӓш пуэн.49А молывлӓжӹ попенӹт: «Вычал, анжалына, Илия Тӹдӹм ытараш толеш ма?»50Но Иисус эчеӓт когон сӹгӹрӓл колтен, дӓ йӓнгжӹ лӓктӹн.51Тӹнӓм Йымын пӧртӹштӹ кечӹшӹ кого савыц кӱшӹцӹн ӱлӹкӹ коктеш кышкедӓлтӹн, мӱлӓндӹ цӹтӹрнӓлтӹн, кого кӱвлӓ шелӹнӹт,52шӹгер ыражвлӓ пачылтыныт. Колышы шукы святойын кӓпшӹ ӹлӹжӹн,53Иисусын ӹлӹж кӹньӹлмӹкӹжӹ, нӹнӹ шӹгерлӓ гӹц лӓктӹнӹт, святой халашкы пыренӹт дӓ шукы эдемлӓн кайыныт.54Шӱдӹвуй дӓ тӹдӹн доно иквӓреш Иисусым оролышывлӓ, мӱлӓндӹ цӹтӹрнӹмӹм дӓ ма лимӹм ужмыкы, когон лӱдӹнӹт дӓ попенӹт: «Тӹдӹ лачокшымат Йымын Эргӹ ылын».

55Тӹштӹ тенгеок ӹдӹрӓмӓшвлӓ шукын ылыныт дӓ ӧрдӹж гӹц анжен шалгенӹт, нӹнӹ Иисус паштек Галилей гӹцок толыныт дӓ Тӹдӹлӓн служенӹт.56Нӹнӹ лошты Мария Магдалина, Иаков дон Иосийӹн Мария ӓвӓштӹ дӓ Зеведейӹн эргӹвлӓжӹн ӓвӓштӹ ылыныт.

57А вады лимӹкӹ, Аримафейӹштӹшӹ Иосиф лӹмӓн паян эдем толын. Тӹдӓт Иисусын тыменьшӹжӹ ылын.58Тӹдӹ, Пилат докы миэн, Иисусын кӓпшӹм ядын. Тӹнӓм Пилат кӓпӹм пуаш шӱден.59Иосиф, кӓпӹм нӓлӹн, тӹдӹм ире итӹн мӹнереш вӹдӹлӹн60дӓ ӹшкӹлӓнжӹ йӓмдӹлӹмӹ у шӹгерлӓ ыражышкы пиштен. Шӹгержӹм кырык нереш капайымы ылын. Иосиф шӹгер ӓнгжӹм кого кӱ доно питӹрен дӓ кен.61Тӹшток Мария Магдалина дон вес Мария ылыныт, нӹнӹ шӹгер ваштареш шӹнзенӹт.

62Вес кечӹн, когарня иргодеш, архиерейвлӓ дон фарисейвлӓ Пилат докы погыненӹт63дӓ попенӹт: «Хозана, мӓ ӓшӹндӓрӹшнӓ, тӹ алталышет ӹлӹмӹжӹ годым ”Кым кечӹ эртӹмӹкӹ, ӹлӹжӓм” манын келесен.64Седӹндон кымшы кечӹ якте шӹгержӹм оролаш шӱдӹ. Уке гӹнь тыменьшӹвлӓжӹ Тӹдӹн кӓпшӹм, йыдым толын, шолышт кердӹт дӓ халыклан ”Колымаш гӹц ӹлӹжӹн” манын попаш тӹнгӓлӹт. Тӹнӓм остатка алталымыжы пӹтӓришӹ гӹцӓт хударак лиэш».65Пилат нӹнӹлӓн келесен: «Оролвлӓдӓ ылыт, кедӓ, мыштымыда семӹнь оролыда».66Нӹнӹ кенӹт дӓ шӹгерӹм оролаш шагалтенӹт, кӱэшӹжӹ пецӓтӹм шӹнденӹт.


*а 27:9-10 Иер 32:9, Зах 11:12-13.

*б 27:27 Претори – Вуйлатышын ӹлӹмӹ пӧртшӹ, тенгеок суйымы вӓр.

*в 27:29 Вуйгӹшӹл – венок.

*г 27:33 «Лепкӓ вӓр» – Греклӓ «Вуйгарка вӓр».

*д 27:35 Шӹвӓ – жребий.

*е 27:45 Куд цӓш – мӓмнӓн жеп доно тура кечӹвӓл.

*ж 27:46 Пс 21:2.


предыдущая глава Глава 27 следующая глава