Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЙӸН СИРӸМӸ СВЯТОЙ ЕВАНГЕЛИ

26 Глава


1 Иисус ваштареш йӹвӹрт попен келшӹмӓш. 6 Иисусым миро доно шӹрӹмӓш. 14 Иисусым выжалаш Иуда йӧнӹм кӹчӓлеш. 17 Когечӹ вады качкыш. 26 Святой вады качкыш. 31 Петрӹн карангмыжы гишӓн Иисус анзыцок попа. 36 Иисус Гефсимаништӹ. 47 Иисусым кычен нӓнгемӓш. 57 Синедрион анзылны. 69 Петрӹн карангмыжы.

1Цилӓ тидӹм попен пӹтӓрӹмӹкӹ, Иисус тыменьшӹвлӓжӹлӓн келесен:2«Тӓ пӓледӓ: кок кечӹштӹ Когечӹ лиэш, дӓ Эдем Эргӹ пыдален сӓкӓш пуалтеш».

3Тӹнӓм Каиафа лӹмӓн архиерейӹн кудывичӹштӹжӹ архиерейвлӓ, закон тымдышывлӓ, халыкын когоракшывлӓ погыненӹт4дӓ Иисусым алтален кычаш дӓ пушташ иквӓреш шанен пиштенӹт.5Но попенӹт: «Халык лошты пыдыранымаш ӹнжӹ ли манын, тидӹм празнык годым ӹштӓш ак кел».

6Иисусын Вифаништӹ проказа церӓн манмы Симонын пӧртӹштӹжӹ ылмыжы годым7Тӹдӹн докы ик ӹдӹрӓмӓш лишемӹн, алебастр ӓтеш шергӓкӓн миром стӧл тӹрӹштӹшӹ Иисус докы канден дӓ Тӹдӹн вуйышкыжы опталын.8Тидӹм ужын, тыменьшӹвлӓжӹ шӹдешкен колтенӹт дӓ попенӹт: «Малын тенге такеш кычылт пӹтӓрӹмӓш?9Ти миром шергеш выжалаш дӓ оксажым незервлӓлӓн пуаш лиэш ыльы».10Но Иисус, тидӹм пӓлӹмӹкӹжӹ, нӹнӹлӓн келесен: «Малын ӹдӹрӓмӓшӹм тыргыжландаредӓ? Тӹдӹ Мӹлӓм пуры пӓшӓм ӹштен.11Незервлӓ сагада соок лит, а Мӹнь тӓ сагада со ам ли.12Ти миром вӹкем опталмыжы доно тӹдӹ Мӹньӹм таяш йӓмдӹлен.13Тӓлӓндӓ лачок попем: улы сӓндӓлӹк мычкы, кышты Пуры Уверӹм шӓрӓш тӹнгӓлӹт, тенгеок ти ӹдӹрӓмӓшӹн мам ӹштӹмӹжӹ гишӓн попаш дӓ ӹшкӹмжӹм ӓшӹндӓрӓш тӹнгӓлӹт».

14Тӹнӓм луаткокты гӹц иктӹжӹ, Искариот Иуда лӹмӓнжӹ, архиерейвлӓ докы кеен15дӓ келесен: «Мӹнь Тӹдӹм тӓлӓндӓ выжалем гӹнь, мӹлӓнем мам пуэдӓ?» Нӹнӹ тӹдӹлӓн кымлы ши оксам сӧренӹт.16Тилец вара Иисусым выжалаш Иуда йӧнӓн жепӹм кӹчӓлӓш тӹнгӓлӹн.

17Шергиндӹ празныкын пӹтӓриш кечӹнжок тыменьшӹвлӓжӹ Иисус докы миэнӹт дӓ келесенӹт: «Когечӹ качкышым Тӹлӓнет кышак йӓмдӹлӓш шӱдет?»18Тӹдӹ попен: «Халашкы ик эдем докы кедӓ дӓ тӹдӹлӓн келесӹдӓ: ”Тымдышына попа: Мӹньӹн жепем лишнок, тыменьшӹвлӓэм доно иквӓреш тӹнь донет когечӹ качкышым эртӓрӹнем”».19Иисус кыце шӱден, тыменьшӹвлӓжӹ тенгеок ӹштенӹт дӓ когечӹ качкышым йӓмдӹленӹт.

20Вады шомыкы, Иисус луаткок тыменьшӹжӹ доно иквӓреш вӓрлӓнен21дӓ качмышты годым келесен: «Тӓлӓндӓ лачок попем: тӓ логӹцдӓ иктӹжӹ Мӹньӹм выжала».22Нӹнӹ пиш сылык линӹт, цилӓнок Тӹдӹ гӹц ядышташ тӹнгӓлӹнӹт: «Господь, мӹньок агыл?»23Иисус келесен: «Мӹнь донем иквӓреш кидӹм ӓтӹш виктӓлтӹшӹ Мӹньӹм выжала.24Лачок, Эдем Эргӹ гишӓн кыце сирӹмӹ, ӹлӹмӓш гӹц Тӹдӹ тенге кеӓ, но Эдем Эргӹм выжалышылан ойхы лиэш: шачде ылгецӹ, тӹ эдемлӓн яжорак лиэш ыльы».

25Тӹнӓм Тӹдӹм выжалышы Иуда келесен: «Равви, тидӹ мӹньок агыл?» Иисус тӹдӹлӓн келесен: «Ӹшке тидӹм келесӹшӹц».

26Качмышты годым Иисус киндӹм нӓлӹн, благословаен, тодылын, тыменьшӹвлӓжӹлӓн пуэн дӓ келесен: «Нӓлдӓ, качда: тидӹ Мӹньӹн Кӓпем».27Вара цӓшкӓм нӓлӹн, таум ӹштен, нӹнӹлӓн пуэн дӓ келесен: «Тишецӹн цилӓнӓт йӱдӓ.28Тидӹ – сулыкыштым простяш манын, шукы эдем верц йоктарымы Мӹньӹн у согонь Вӹрем.29А тӓлӓндӓ келесем: Ӓтямӹн Кугижӓншӹштӹжӹ тӓ донда иквӓреш у якшар ӓрӓкӓм йӱмӹ кечӹ шомешкӹ, Мӹнь виноград кӹцкӹ гӹц ӹштӹмӹм ӹнде ам йӱ».30Нӹнӹ варажы псаломым мыренӹтӓт, Елеон кырыкыш кенӹт.

31Тӹнӓм Иисус нӹнӹлӓн попен: «Ти йыдым тӓ цилӓн Мӹнь гӹцем карангыда, вет сирӹмӹ: ”Кӹтӧзӹжӹм лыпшал шуэм, дӓ шарык кӹтӧ шӓлӓнӓ”.32Но Мӹнь, ӹлӹж кӹньӹлмӹкем, тӓмдӓм Галилейӹштӹ вӓшлиӓм».33Петр Тӹдӹлӓн келесен: «Тӹнь гӹцет цилӓн карангыт гӹнят, мӹнь нигынамат ам каранг!»34Иисус келесен: «Тӹлӓт лачок попем: ти йыдымок, ӓптӓн мыралтымешкӹ, тӹнь кым гӓнӓ Мӹнь гӹцем карангат».35Петр попен: «Мӹлӓнем Тӹнь донет иквӓреш колаш вӓрештеш гӹнят, Тӹнь гӹцет ам каранг!» Мол тыменьшӹвлӓжӓт тенгеок попенӹт.

36Вара Иисус тыменьшӹвлӓжӹ доно иквӓреш Гефсимани манмы вӓрӹш толын дӓ нӹнӹлӓн келесен: «Мӹнь тӹшкӹ йымыдылаш кеем, толмешкем, тиштӹ шӹнзӹдӓ».37Сагажы Петрӹм дӓ Зеведейӹн кок эргӹжӹм нӓлӹн. Иисус ойхыраш дӓ ясыланаш тӹнгӓлӹн.38Тӹнӓм Иисус нӹнӹлӓн попен: «Мӹньӹн йӓнгем колышашла ойхыра, тиштӹ лидӓ дӓ Мӹнь семӹнемок тӓӓт идӓ амалы».39Изиш ӧрдӹшкӹрӓк карангмыкы, кымык вазын сарвален попен: «Ӓти! Лиэш гӹнь, ти цӓшкӓ Мӹньӹм эртен кежӹ ыльы, тенге гӹнят Мӹньӹн шанымы семӹнь агыл, а Тӹньӹн шанымет семӹнь лижӹ».40Иисус тыменьшӹвлӓ докы толын, нӹнӹм амалышывлӓм ужын дӓ Петрлӓн попен: «Мӹнь донем иквӓреш ик цӓшӹмӓт амалыде тырхен кердделда ма?41Аздаралташ ӹнжӹ ли манын, амалыде пыт шалгыда дӓ ыдылда. Шӱлӹш кымылан, а кӓп силадымы».

42Кокшы гӓнӓ Иисус эчеӓт карангын дӓ сарвален ыдылын: «Ӓти! Мӹньӹн йӱде, ти цӓшкӓ эртен ак керд гӹнь, Тӹньӹн шанымет семӹнь лижӹ».43Пӧртӹлмӹкӹжӹ, тыменьшӹвлӓжӹм эчеӓт амалышывлӓм ужын, вет нӹнӹн сӹнзӓштӹм ом темден.44Нӹнӹм коден, Иисус эчеӓт карангын дӓ, тӹ шамакымок попен, кымшы гӓнӓ ыдылын.45Вара тыменьшӹвлӓжӹ докы толын дӓ нӹнӹлӓн келесен: «Тӓ эчеӓт амаледӓ дӓ кӓнедӓ? Теве жеп толын шон, Эдем Эргӹ сулыканвлӓн кидӹшкӹ пуалтеш.46Кӹньӹлдӓ, кенӓ: теве Мӹньӹм выжалышы лишемеш».

47Иисусын попымыжы годымок луаткок тыменьшӹжӹ гӹц иктӹжӹ, Иуда, теве толын. Тӹдӹн доно иквӓреш архиерей дон халыкын когоракшывлӓн колтымы шукы эдем ылын. Нӹнӹ мечӓн, шывынян ылыныт.48Выжалышы нӹнӹлӓн Иисусым тенге пӓлдӓрӓш сӧрен ылын: «Кӱм мӹнь шыпшалам, Иисус ылеш. Тӹдӹм кычыда».49Иуда тӹнӓмок Иисус докы толын дӓ попен: «Равви, сусу ли!» Вара Тӹдӹм шыпшалын.50Иисус тӹдӹлӓн келесен: «Тӓнгем, тӹнь тидӹлӓн толынат ма?» Тӹнӓм толшывлӓ лишкӹжӹ миэнӹт, Иисус вӹкӹ кидӹштӹм лӱктӓлӹнӹт дӓ Тӹдӹм роалтен кыченӹт.

51Иисус доно иквӓреш ылшы логӹц иктӹ мечшӹм шыпшын лыктын, архиерейӹн цоражым роалын, тӹдӹн пӹлӹшӹжӹм пӹчкӹн шуэн.52Иисус тӹдӹлӓн попен: «Мечетӹм вӓрӹшкӹжӹ пиштӹ, вет мечӹм нӓлшӹвлӓ меч гӹцок колат.53Ӓли Мӹнь Ӓтям гӹц кӹзӹток палшыкым ядын ам керд шанет? Тӹдӹ Мӹлӓнем луаткок легион гӹцӓт шукы Ангелвлӓжӹм колта ыльы.54Но ма лишӓшлык, тидӹжӹ кыце вара Писаништӹ келесӹмӹ семӹнь шокталт кердеш?»

55Тӹ цӓшӹнок Иисус халыклан келесен: «Разбойник вӹкӹ лӓкмӹлӓ, мечӹм, шывыньым нӓлӹн, тӓ Мӹньӹм кычаш толында. Кечӹнь тӓ анзылныда Йымын пӧртӹштӹ тымден шӹнзенӓм, а тӓ Мӹньӹм кычыделда.56Пророквлӓн сирӹмӹштӹ семӹньок шокталтшы манын, цилӓ тидӹ лин». Тӹнӓм цилӓ тыменьшӹвлӓжӹ Иисусым коден кыргыжыныт.

57Иисусым кычышывлӓ Тӹдӹм Каиафа архиерей докы канденӹт, тӹшкӹжӹ закон тымдышывлӓ дӓ халыкын когоракшывлӓ погыненӹт.58А Петр ӧрдӹж гӹц Иисус паштек архиерейӹн кудывичӹжӹ якте кен. Тӹшкӹ пырымыкы, пакылажы ма лимӹм ужаш манын, тӓрзӹвлӓ сага шӹнзӹн.

59Архиерейвлӓ, халыкын когоракшывлӓ дӓ улы Синедрион, Иисусым пушташ манын, Тӹдӹн ваштареш алтален йӓтлӹмӓшвлӓм кӹчӓлӹнӹт,60но шукын алтален попенӹт гӹнят, моделыт. Остаткаэш алтален попышы кок эдем толыныт61дӓ келесенӹт: «Тӹдӹ попен: ”Мӹнь Йымын пӧртшӹм шӓлӓтен дӓ кым кечӹштӹ угӹц ӹштен кердӓм”».62Архиерей кӹньӹл шагалын дӓ Иисуслан келесен: «Ма нимат ат келесӹ? Ваштарешет йӓтлен попымылан мам вӓшештет?»63Иисус юкымат лыкде. Архиерей Тӹдӹлӓн попен: «Ӹлӹшӹ Йымы анзылны сарвалем, мӓлӓннӓ келесӹ: Тӹнь Христос, Йымын Эргӹ ылат ма?»64Иисус тӹдӹлӓн манын: «Ӹшке тидӹм келесӹшӹц. Эчежӹ тӓлӓндӓ попем: тилец вара тӓ Эдем Эргӹн Силан Йымын вургымла монгырышты шӹнзӹмӹжӹм дӓ пӹлгомыштышы пӹл вӹлӓн толмыжым ужыда».

65Тӹнӓм архиерей ӹшке выргемжӹм кышкедӹн дӓ келесен: «Тӹдӹ Йымым мыскыла! Эче махань свидетельвлӓ мӓлӓннӓ келӹт! Теве ӹнде тӓ Йымым мыскылымыжым колда!66Тӓ кыце шанедӓ?» Нӹнӹжӹ келесенӹт: «Вуйнаматан, колышашлык!»67Тӹнӓм иктӹвлӓжӹ Иисусын шӹргӹшкӹжӹ шӹвенӹт, Тӹдӹм шинӹт, весӹвлӓжӹ шӹргӹжӹ гӹц савенӹт68дӓ попенӹт: «Эй, Христос, пророк ылат гӹнь, кӱ Тӹньӹм савен – келесӹ!»

69Петр тӱнӹ, кудывичӹштӹ, шӹнзен. Тӹдӹн докы ик тӓрзӹ ӹдӹр толын дӓ келесен: «Тӹнят Галилей гӹц ылшы Иисус доно иквӓреш ылынат».70«Мам тӹнь попет, ам пӓлӹ», – цилӓн анзылны Петр тореш келесен.71Капка гӹц лӓкмӹжӹ годым тӹдӹм весӹ ужын дӓ тӹштӹ ылшывлӓлӓн келесен: «Тидӓт Назорей Иисус доно иквӓреш ылын».72Петр «Ти Эдемӹм ам пӓлӹ» манын, эчеӓт цуратлен келесен.73Изиш лимӹкӹ, тӹштӹ шалгышывлӓ Петр докы толыныт дӓ попенӹт: «Лачокат, тӹнят нӹнӹ логӹц ылат, тӹньӹм попымашетӓт пӓлдӹртӓ».74Тӹнӓм Петр ”Ти Эдемӹм ам пӓлӹ” манын, Йымы анзылны цуратлен попаш тӹнгӓлӹн. Тӹнӓмок ӓптӓн мыралтен колтен.75Петр Иисусын попымы шамакшым ӓшӹндӓрен: «Ӓптӓн мыралтымешкӹ, кым гӓнӓ Мӹнь гӹцем карангат». Вара тӹшецӹн лӓктӹнӓт, шӱм ясы доно мӓгӹрен.


*а 26:7 Алебастр тиштӹ гипсӹм агыл, а шергӓкӓн кӱм анжыкта.

*б 26:25 Равви – тымдышым шотеш пиштен попымаш.

*в 26:31 Зах 13:7.

*г 26:49 «Сусу ли» – грек йӹлмӹштӹ тидӹжӹ шӱдӹмӓш агыл, а здоровайымы шамак.

*д 26:64 Пс 109:1, Дан 7:13.


предыдущая глава Глава 26 следующая глава