Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЙӸН СИРӸМӸ СВЯТОЙ ЕВАНГЕЛИ

28 Глава


1 Ӹлӹж кӹньӹлмӓш. 11 Салтаквлӓн попымышты. 16 Тыменьшӹвлӓжӹлӓн Иисусын шӱдӹмӹжӹ.

1Кукшыгечӹ эртӹмӹкӹ, ӓрнян пӹтӓриш кечӹ валгалташ тӹнгӓлмӹ годым, Мария Магдалина дон вес Мария шӹгерӹм анжалаш толыныт.2Теве мӱлӓндӹ когон цӹтӹрнӓлтӹн: Господьын Ангелжӹ пӹлгом гӹц вален, шӹгер докы миэн дӓ ӓнгӹштӹшӹ кӱм карангден, вӹкӹжӹ шӹнзӹн.3Вӹлецӹн анжаш Ангел валгынзыш гань ылын, выргемжӹ лым гань ошы.4Тӹдӹ гӹц лӱдӹн, оролвлӓ цӹтӹрӓш тӹнгӓлӹнӹт дӓ колышы гань линӹт.

5А Ангел ӹдӹрӓмӓшвлӓлӓн попен: «Тӓ идӓ лӱд. Пӓлем, тӓ пыдален сӓкӹмӹ Иисусым кӹчӓлӹдӓ.6Тӹдӹ тиштӹ уке, попымыжы семӹньок Тӹдӹ ӹлӹжӹн, лишкӹрӓк толда дӓ Господьын кимӹ вӓржӹм анжалда.7Вара пӹсӹн кедӓ дӓ Тӹдӹн тыменьшӹвлӓжӹлӓн келесӹдӓ: Тӹдӹ колымаш гӹц ӹлӹжӹн дӓ тӓмдӓм Галилейӹштӹ вӓшлиэш. Тӹштӹ Тӹдӹм ужыда. Теве мӹнь тӓлӓндӓ попышашлыкем келесӹшӹм».

8Ӹдӹрӓмӓшвлӓ шӹгер гӹц пӹсӹн карангыныт, лӱдӹн дӓ когон сусу лин, Иисусын тыменьшӹвлӓжӹлӓн увертӓрӓш кыргыжыныт.9Теве тыменьшӹвлӓжӹлӓн увертӓрӓш кемӹштӹ годым Иисус нӹнӹм вӓшлин дӓ келесен: «Сусу лидӓ!» Нӹнӹ лишемӹнӹт, анзыланжы кымалын, ялжым элтӓленӹт.10Иисус попен: «Идӓ лӱд, кедӓ дӓ шӱмбелемвлӓлӓн Галилейӹш кеӓш келесӹдӓ. Нӹнӹ Мӹньӹм тӹштӹ ужыт».

11Ӹдӹрӓмӓшвлӓ кемӹкӹ, оролвлӓ логӹц южышты халашкы пыренӹт, архиерейвлӓлӓн ма лимӹм цилӓ увертӓренӹт.12А нӹнӹжӹ, халыкын когоракшывлӓ доно погынен кӓнгӓшен нӓлмӹкӹ, оролвлӓлӓн шукы оксам пуэнӹт13дӓ попенӹт: «Тӹдӹн тыменьшӹвлӓжӹ йыдым толыныт дӓ амалымына годым кӓпшӹм шолышт кенӹт манын келесӹдӓ.14Вуйлатышы докы тидӹ гишӓн увер миэн шоэш гӹнь, мӓ тӹдӹм ӹняндӓренӓ, дӓ тӓлӓндӓ нима гишӓнӓт шытырланаш ак кел».15Оролвлӓ, оксам нӓлӹн, келесӹмӹ семӹньок ӹштенӹт. Нӹнӹн попымыштым иудейвлӓ лошты тагачшы кечӹ яктеӓт шӓркӓлӓт.

16А луатик тыменьшӹжӹ Галилейӹш Иисусын шӱдӹмӹ кырык вӹкӹ кенӹт.17Иисусым ужмыкы, анзыланжы кымал вазыныт, а южышты коктешлӓненӹт.18Иисус лишемӹн дӓ нӹнӹлӓн келесен: «Мӹлӓм пӹлгомышты дӓ мӱлӓндӹ вӹлнӹ цилӓ власть пуалтын.19Седӹндон кедӓ дӓ цилӓ халыквлӓм тымдыда. Ӓтя, Эргӹ дӓ Святой Шӱлӹш лӹмеш нӹнӹм крестӹдӓ,20тӓлӓндӓ цилӓ шӱдӹмем ӹштен шалгаш нӹнӹлӓн тымдыда. Сӓндӓлӹк пӹтӹмешкӹ, Мӹнь кечӹнь тӓ сагада лиӓм. Аминь».


*а 28:10 Тиштӹ пӹтӓриш гӓнӓ Иисусын тыменьшӹвлӓжӹм «шӱмбелвлӓ» маныт.


предыдущая глава Глава 28 следующая глава