Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЙӸН СИРӸМӸ СВЯТОЙ ЕВАНГЕЛИ

25 Глава


1 Лу ӹдӹр гишӓн тыштен попымаш. 14 Кым цора гишӓн тыштен попымаш. 31 Халыквлӓм суйымаш.

1Тӹнӓм Пӹлгомыштышы Кугижӓншӹ лу ӹдӹр гань лиэш, кыдывлӓ, лампыштым нӓлӹн, армарым вӓшлиӓш лӓктӹнӹт.2Нӹнӹ логӹц вӹзӹтшӹ ышан, вӹзӹтшӹ шанен моштыдымы ылыныт.3Шанен моштыдымывлӓ ӹшке лампывлӓштӹм нӓлӹнӹт, но ӱм сагашты нӓлделыт,4а ышанвлӓ лампывлӓштӹ доно иквӓреш ӱмӓт ӓтеш нӓлӹнӹт.5Армары йӹле толдеӓт, цилӓн нерӓлтен колтенӹт дӓ амален кенӹт.6Но йыдпелӹн сӹгӹрӓлмӹ юк шактен: ”Теве армары толеш, тӹдӹм вӓшлиӓш лӓкдӓ!”

7Тӹнӓм ӹдӹрвлӓ цилӓн кӹньӹлӹнӹт дӓ ӹшке лампывлӓштӹм тӧрлӓтенӹт.8Шанен моштыдымывлӓ ышанвлӓлӓн келесенӹт: ”Мӓлӓннӓ ӱм пудай, мӓмнӓн лампывлӓнӓ йӧрӓт”.9А ышанвлӓ келесенӹт: ”Мӓлӓннӓӓт, тӓлӓндӓӓт ак ситӹ ӹнжӹ ли манын, лучи выжалышывлӓ докы кедӓ дӓ ӹшкӹлӓндӓ нӓлдӓ”.10Нӓлӓш кемӹкӹштӹ, армары толын, йӓмдӹ ылшывлӓ тӹдӹн доно иквӓреш сӱӓн празныкыш пыренӹт, паштекӹштӹ амасам питӹренӹт.11Вара молы ӹдӹрвлӓ толыныт дӓ попенӹт: ”Хоза, хоза! Мӓлӓннӓ пач”.12А тӹдӹжӹ нӹнӹлӓн келесен: ”Тӓлӓндӓ лачок попем: тӓмдӓм ам пӓлӹ”.13Тенгежӹ, амалыде вычыда, вет Эдем Эргӹ толмы кечӹмӓт, цӓшӹмӓт ада пӓлӹ.

14Тидӹм тенгеӓт анжыкташ лиэш: вес сӓндӓлӹкӹш кемӹжӹ анзыц эдем ӹшке докыжы цоравлӓжӹм ӱжӹн дӓ пурлыкшым нӹнӹлӓн ӹнянен коден.15Иктӹлӓн вӹц талант оксам, весӹлӓн коктым, кымшылан иктӹм – каждыйлан ӹштен кердмӹжӹ семӹнь пуэн дӓ тӹнӓмок лӓктӹн кен.16Вӹц талантым нӓлшӹжӹ кеен дӓ, окса гӹц оксам ӹштен кычылтын, эче вӹц талантым ӹштен нӓлӹн.17Тенгеок кок талантым нӓлшӹжӓт эче коктым ӹштен нӓлӹн.18А ик талантым нӓлшӹжӹ кен, рокым капаен дӓ хозажын оксажым таен.

19Шукы жеп эртӹмӹкӹ, цоравлӓн хозашты пӧртӹлӹн дӓ оксам кыце кычылтмыштым терген.20Вӹц талантым нӓлшӹ цора эче вӹц талантым уштарен канден дӓ келесен: ”Хоза, тӹнь мӹлӓм вӹц талантым пуэнӓт, а теве эче вӹц талантым мӹнь нӹнӹ доно ӹштен нӓлӹнӓм”.21Хозажы тӹдӹлӓн келесен: ”Яра! Тӹнь пуры дӓ ӹнян цора ылат. Изиштӹ тӹнь ӹнян линӓт, тӹньӹм шукым анжаш шагалтем. Хозаэтӹн сусушкыжы тол”.22Кок талантым нӓлшӹ цораат толын дӓ попен: ”Хоза, тӹнь мӹлӓм кок талантым пуэнӓт, а теве эче кок талантым нӹнӹ доно ӹштен нӓлӹнӓм”.23Хоза тӹдӹлӓн келесен: ”Яра! Тӹнь пуры дӓ ӹнян цора ылат. Изиштӹ ӹнян линӓт, тӹньӹм шукым анжаш шагалтем. Хозаэтӹн сусушкыжы тол”.

24Ик талантым нӓлшӓт толын дӓ келесен: ”Хоза, мӹнь тӹньӹн пингӹдӹн ядшы эдем ылметӹм пӓленӓм: кышты ӱдӹделат, тӹштӹ тӹредӓт, кышты вырлыкашым шӓвӹделат, тӹштӹ погет.25Мӹнь лӱдӹнӓм, седӹндон кенӓм дӓ тӹньӹн талант оксаэтӹм рокыш таенӓм, теве тӹньӹн оксаэт”.26Хоза тӹдӹлӓн келесен: ”Худа дӓ ялахай цора! Кышты мӹнь ӱдӹделам, тӹштӹ тӹредмем, кышты вырлыкашым шӓвӹделам, тӹштӹ погымем тӹнь пӓленӓт,27седӹндон оксаэм торгейӹшӹвлӓлӓн пуаш келеш ыльы, пӧртӹлмӹкем, ӹшкӹмемӹнӹм тӱлет доно нӓлӓм ыльы.28Тенге, нӓлдӓ тӹдӹ гӹц талантым дӓ лу талантан эдемлӓн пуда.29Вет кӱн улы, тӹдӹлӓн пуалтеш, дӓ тӹдӹн шукы лиэш, а кӱн уке – улыжат нӓлӓлтеш.30А ярдымы цорам тӱнӹшӹ пӹцкемӹшӹш лыктын шуда. Тӹштӹ мӓгӹрӹмӓш дӓ пӱм пырмаш лиэш”». [Тидӹм келесӹмӹкӹ, Иисус юкшым когоэмден попен: «Кӱн пӹлӹшӹжӹ колышташ улы, колжы!»]

31«Цилӓ святой Ангелвлӓ доно иквӓреш лӹмлештӓрӓлт толмыкыжы, Эдем Эргӹ ӹшке лӹмлештӓрӓлтшӹ престолышкыжы шӹнзеш.32Тӹдӹн анзылны цилӓ халыквлӓ погынат, дӓ кыце кесӹвлӓ гӹц шарыквлӓм кӹтӧзӹ айыра, Тӹдӓт тенгеок эдемвлӓм иктӹ-весӹ гӹц айыра.33Шарыквлӓм Ӹшкежӹ гӹц вургымла монгырыш шагалта, а кесӹвлӓм – шалахай монгырыш.

34Вара Кугижӓ Ӹшкежӹ гӹц вургымлашты шалгышывлӓлӓн келесӓ: ”Ӓтямӹн благословайымывлӓ, толда. Сӓндӓлӹкӹм ӹштӹмӹ годымок тӓлӓндӓ йӓмдӹлӹмӹ Кугижӓншӹм тӓ кӹзӹт соэшок нӓлӹдӓ.35Вет Мӹнь шужышы ылынам, тӓ Мӹлӓм качкышым пуэндӓ; йӱмем шон, тӓ Мӹньӹм йӱктендӓ; ӧрдӹж эдем ылынам, тӓ Мӹньӹм токыда пыртендӓ.36Цӓрӓ ылынам, тӓ Мӹньӹм чиктендӓ, церлӹ ылынам, тӓ Мӹнь докем каштында; кызаматышты ылынам, тӓ Мӹнь докем толында”.37Тӹнӓм тӧр ӹштӹшӹвлӓ Тӹдӹлӓн келесӓт: ”Господь, кынам мӓ Тӹньӹм шужышым ужынна дӓ пукшеннӓ? Ӓли кынам мӓ йӱмет шомым ужынна дӓ йӱктеннӓ?38Кынам ӧрдӹж эдем ылметӹм ужынна дӓ токына пыртеннӓ? Кынам Тӹньӹм цӓрӓм ужынна дӓ чиктеннӓ?39Кынам мӓ Тӹньӹм церлӹм ӓли кызаматышты ужынна дӓ Тӹнь докет толынна?”40А Кугижӓ нӹнӹлӓн келесӓ: ”Тӓлӓндӓ лачок попем: мам тӓ ти изирӓк шӱмбелемвлӓ логӹц иктӹлӓн ӹштендӓ, цилӓжӹмӓт Мӹлӓм ӹштендӓ”.

41Вара шалахай велнӹшӹвлӓлӓн келесӓ: ”Проклятайымывлӓ, Мӹнь дорцем карангда, диавол дон тӹдӹн ангелвлӓжӹлӓн йӓмдӹлӹмӹ курымашлык тылыш кедӓ.42Вет Мӹнь шужышы ылынам, тӓ Мӹлӓм качкаш пуделда; йӱмем шон, тӓ Мӹньӹм йӱктӹделда;43ӧрдӹж эдем ылынам, Мӹньӹм пыртыделда, цӓрӓ ылынам, Мӹньӹм чиктӹделда, церлӓт ылынам, кызаматыштат ылынам, а тӓ Мӹнь докем каштделда”.44Тӹнӓм нӹнӓт Тӹдӹлӓн вӓшештӓт: ”Господь! Кынам мӓ Тӹньӹм шужышым ӓли йӱмӹ шошым, ӓли ӧрдӹж ылшым, ӓли цӓрӓм, ӓли церлӹм, ӓли кызаматышты ужынна дӓ Тӹлӓт палшыделна?”45Тӹдӹ нӹнӹлӓн келесӓ: ”Тӓлӓндӓ лачок попем: мам тӓ ти изирӓквлӓ логӹц иктӹлӓн ӹштӹделда, Мӹлӓнем ӹштӹделда”.46Нинӹжӹ курымаш орлыкышкы кеӓт, а тӧр ӹштӹшӹвлӓ – курымаш ӹлӹмӓшкӹ.»


предыдущая глава Глава 25 следующая глава