Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЙӸН СИРӸМӸ СВЯТОЙ ЕВАНГЕЛИ

22 Глава


1 Сӱӓн гишӓн тыштен шайыштмаш. 15 Кесарьлан лӹм окса. 23 Ӹлӹжмӹ гишӓн ядмаш. 34 Сек кого шӱдӹмӓш. 41 Христос кӱн Эргӹжӹ?

1Иисус пакылажы тыштен шайыштын:2«Пӹлгомыштышы Кугижӓншӹ ӹшкӹмжӹн эргӹжӹлӓн сӱӓн празныкым ӹштӹшӹ кугижӓ ганьы ылеш.3Сӱӓнӹш ӱжмӹвлӓм погаш тӹдӹ цоравлӓжӹм колтен, а хынавлӓн толмышты шоде.4Тӹдӹ эче вес цоравлӓжӹм колтен, колтымыжы годым шӱден: ”Ӱжмӹвлӓлӓн келесӹдӓ: теве цилӓ качкышым йӓмдӹленӓм, ӱшкӱжӹмӓт, ӧрдӹктӹмӹ презӹмӓт шӹшкӹлмӹ, цилӓ йӓмдӹ, сӱӓн стӧл лошкы толда”.5Но ӱжмӹвлӓ тидӹм шотыш нӓлделыт. Иктӹвлӓжӹ ӹшке нырышкышты, а весӹвлӓжӹ торгейӓш кенӹт,6молыжы кугижӓн цоравлӓжӹм кыченӹт, мыскылен орландаренӹт дӓ пуштыныт.7Тидӹ гишӓн колмыкы, кугижӓ когон шӹдешкен, ӹшке салтаквлӓжӹм колтен дӓ пуштшывлӓм пӹтӓрен, нӹнӹн халаштым йылатен.

8Вара цоравлӓжӹлӓн келесен: ”Сӱӓн стӧл йӓмдӹ, но ӱжмӹвлӓ ярдымы ылыныт.9Ӹнде корныважвлӓш кедӓ дӓ, кӱм мода, цилӓштӹм сӱӓнӹшкӹ ӱждӓ”.10Цоравлӓ корнывлӓшкӹ лӓктӹнӹт, кӱм моныт, цилӓштӹм канденӹт: худажымат, пурыжымат. Тенге сӱӓн стӧл лош халык циц погынен.

11Хынавлӓм анжаш пырымыкы, кугижӓ сӱӓн выргемӹм чидӹмӹ эдемӹм ужын12дӓ тӹдӹлӓн манын: ”Тӓнгем, кыце тӹнь тишкӹ сӱӓн выргемдеок пыренӓт?” Тӹдӹжӹ нимат пелештӹде.13Тӹнӓм кугижӓ тӓрзӹвлӓлӓн келесен: ”Кидшӹм-ялжым пиддӓ, тӹдӹм тӱнӹшӹ пӹцкемӹшӹш лыктын шуда. Тӹштӹ мӓгӹрӹмӓш дӓ пӱм пырмаш лиэш.14Вет ӱжмӹвлӓ шукын ылыт, а айырен нӓлмӹвлӓ – чӹдӹ”».

15Тӹнӓм фарисейвлӓ кенӹт дӓ Иисусым кыце-гӹнят шамакешӹжӹ кычаш манын кӓнгӓшенӹт.16Нӹнӹ Тӹдӹн докы ӹшкӹмӹштӹн тыменьшӹвлӓштӹм дӓ Ирод велкӹ ылшывлӓм колтенӹт. «Тымдышы! – маныныт нӹнӹ. – Мӓ пӓленӓ: Тӹнь тӧр Эдем ылат дӓ Йымын корныжылан тӧрӹм попен тымдет. Тӹнь эдемлӓн ярал лиӓш цацымы гишӓн ат шаны, Тӹлӓнет цилӓн икань ылыт.17Тенгежӹ мӓлӓннӓ келесӹ: Тӹнь кыце шанет, кесарьлан лӹм оксам тӱлӓш лиэш ӓли уке?»18Но нӹнӹн йойланымыштым пӓлен, Иисус келесен: «Яжон каяш цацышывлӓ, малын тӓ Мӹньӹм тергедӓ?19Ясак тӱлӹмӹ оксам Мӹлӓнем анжыктыда». Нӹнӹ Тӹдӹлӓн динарим канденӹт.20Иисус ядын: «Кӱм тиштӹ анжыктымы дӓ кӱн тиштӹ лӹмжӹ?»21Тӹдӹлӓн келесенӹт: «Кесарьын». Тӹнӓм нӹнӹлӓн попен: «Тенгежӹ кесарьлан кесарьыным, Йымылан Йымыным пуда».22Тидӹм колын, нӹнӹ ӧрӹнӹт дӓ Иисусым коден кенӹт.

23Ӹлӹж кӹньӹлмӓш уке маншы саддукейвлӓ тӹ кечӹн толыныт дӓ Иисус гӹц ядыныт:24«Тымдышы, Моисей келесен: ”Кӱ тетям шачыктыде кола гӹнь, шӱмбелжӹ тӹдӹн вӓтӹжӹм марлан нӓлшӓшлык дӓ колышын вырлыкшым пакыла шӓрӹшӓшлык”. 25Мӓ донна шӹм шӱмбел ылыныт: пӹтӓришӹжӹ ӹдӹрӹм нӓлӹн дӓ колен, тетяжӹ ылде, вӓтӹжӹм шоляжылан коден.26Кокшы донат, кымшы донат, цилӓ шӹмӹт донат тенгеок лин.27Цилӓштӹ паштек ӹдӹрӓмӓшӓт колен.28Тенгежӹ, ӹлӹжмӹкӹ, ӹдӹрӓмӓш шӹм шӱмбел гӹц кыдыжын вӓтӹжӹ лиэш? Вет тӹдӹ цилӓштӹнӓт вӓтӹштӹ ылын».

29Иисус нӹнӹлӓн келесен: «Тӓ Писанимӓт, Йымын силажымат ада пӓлӹ, седӹндон ямын каштыда.30Ӹлӹжмӹкӹ, ӹдӹрӹм ак нӓлеп, марланат ак кеп, пӹлгомышты Йымын Ангелвлӓ гань лит.31-32Колымаш гӹц ӹлӹжмӹ гишӓн тӓлӓндӓ Йымын попымыжым, ”Мӹнь Авраамын Йымыжы, Исаакын Йымыжы, Иаковын Йымыжы ылам” манмым, лыдделда ма? Йымы колышывлӓн Йымышты агыл, а ӹлӹшӹвлӓн!»33Халык, тидӹм колмыкы, Иисусын тымдымыжылан ӧрӹн шалген.

34Саддукейвлӓн попымыштым Иисус цӓрен шагалтен манмым колын, фарисейвлӓ иквӓреш погыненӹт.35Нӹнӹ логӹц иктӹжӹ, закон тымдышы, Иисусым тергӓш манын ядын:36«Тымдышы, законышты махань шӱдӹмӓш сек кого?»37Иисус тӹдӹлӓн келесен: «”Господь Йыметӹм шӱм вашт, йӓнг вашт, улы ынгылымашет доно яраты”.38Тидӹ пӹтӓришӹ дӓ сек кого шӱдӹмӓш.39Кокшыжат техеньок кого: ”Лишӹлетӹмӓт ӹшкӹметӹм яратымы семӹньок яраты”.40Ти кок шӱдӹмӓш цилӓ законлан дӓ пророквлӓн тымдымыштылан негӹц ылеш».

41Фарисейвлӓ иквӓреш ылмышты годым Иисус нӹнӹ гӹц ядын:42«Христос гишӓн тӓ мам шанедӓ? Тӹдӹ кӱн Эргӹжӹ?» Тӹдӹлӓн попенӹт: «Давидӹн».43Нӹнӹлӓн Иисус келесен: «А Шӱлӹш кымылангдымы годым Давид Тӹдӹм малын вара Господь манеш? Давидшӹ попен:44
”Господь Господемлӓн келесен:
Тӹньӹн тышманвлӓэтӹм ял лӹвӓкет пиштӹмешкем,
Мӹньӹн вургымла велнем шӹнзӹ”.

45Тенгежӹ, Давид Христосым Господь манеш гӹнь, кыце Тӹдӹ Давидӹн Эргӹжӹ лин кердеш?»46Иисусын ядмашеш иктӓт нимат келесен кердде, ти кечӹ гӹц иктӓт Тӹдӹ гӹц нимат ядаш смейӹде.


*а 22:24 Втор 25:5.

*б 22:31-32 Исх 3:6.

*в 22:37 Втор 6:5.

*г 22:39 Лев 19:18.

*д 22:44 Пс 109:1.


предыдущая глава Глава 22 следующая глава