Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАТФЕЙӸН СИРӸМӸ СВЯТОЙ ЕВАНГЕЛИ

23 Глава


1 Фарисейвлӓ дон закон тымдышывлӓлӓн шижтӓрӹмӓш. 37 Иерусалим верц ойхырымаш.

1Тӹнӓм Иисус халыклан дӓ тыменьшӹвлӓжӹлӓн попаш тӹнгӓлӹн:2«Закон тымдышывлӓ дӓ фарисейвлӓ Моисейӹн вӓржӹм нӓлӹнӹт.3Тенгежӹ, мам нӹнӹ тӓлӓндӓ ӹштӓш шӱдӓт, цилӓ шоктыда, но нӹнӹ семӹнь идӓ ӹштӹ, вет нӹнӹ попат, но ак ӹштеп.4Нӹнӹ нелӹ, намалаш ясы намалтышым пидӹт дӓ эдемвлӓн ӹнгӹжӓшкӹштӹ пиштӓт, а ӹшкештӹ тӹдӹм парняшты донат ӹнештӹ тӓрвӓтеп.5Цилӓ пӓшӓштӹм эдемвлӓ ужышты манын веле ӹштӓт. Ӹшкӹлӓнӹштӹ филактерим кымдаэмдӓт дӓ выргемӹштӹшӹ ялавам кужемдӓт.6Празнык годым сек яжо вӓрвлӓм нӓлӓш дӓ синагогвлӓштӹ сек шотан вӓрвлӓштӹ шӹнзӓш яратат,7халык погынымы вӓрвлӓштӹ эдемвлӓн нӹнӹм жеплен вӓшлимӹштӹ, ”Тымдышы, тымдышы” манмышты нӹнӹлӓн келшӓ.

8А тӓмдӓм эдемвлӓ тымдышы ӹнжӹштӹ манеп, вет тӓмдӓн Тымдышыда иктӹ, тидӹ – Христос, тӓжӹ цилӓн шӱмбел ылыда.9Мӱлӓндӹ вӹлнӹ иктӹмӓт Ӓтя идӓ ман, тӓмдӓн Ӓтядӓ иктӹ, Тӹдӹ пӹлгомышты.10Тӓмдӓм эдемвлӓ ”ӹлӹмӓш корным анжыктышы” ӹнжӹштӹ манеп. Тӓмдӓн ӹлӹмӓш корным Анжыктышыда иктӹ веле – Христос.11Тӓ логӹцдӓ сек когожы тӓрзӹдӓ лижӹ,12вет кӱ ӹшкӹмжӹм кӱшкӹ шӹндӓ, валтымы лиэш, а кӱ ӹшкӹмжӹм лапемдӓ, лӱктӓлтеш.

13Ойхы тӓлӓндӓ, закон тымдышывлӓ дон фарисейвлӓ, яжон каяш цацышывлӓ! Пӹлгомыштышы Кугижӓншӹм эдемвлӓлӓн питӹредӓ, ӹшкежӓт тӹшкӹ ада пыры, пыраш шанышыжымат ада пырты.14Ойхы тӓлӓндӓ, закон тымдышывлӓ дӓ фарисейвлӓ, яжон каяш цацышывлӓ! Тӓ тылык ӹдӹрӓмӓшвлӓн пӧртӹштӹм незеремдедӓ дӓ, йӓл ужышты манын, кужын ыдылыда. Тидӹ гишӓн тӓмдӓм айыртемӹнок кого суйымаш выча.15Ойхы тӓлӓндӓ, закон тымдышывлӓ дӓ фарисейвлӓ, яжон каяш цацышывлӓ! Хоть иктӹм ӹшке векӹдӓ сӓртӓш манын, тангыжымат, мӱлӓндӹмӓт эртедӓ, а сӓртӹмӹкӹдӓ, тӹдӹм тылан адын тетяжӹм, ӹшке гӹцдӓ кок пачаш хударакым, ӹштедӓ.16Ойхы тӓлӓндӓ, виден каштшы слӧпӧйвлӓ! Тӓ попедӓ: ”Кӱ Йымын пӧрт доно цуратла, цуратлымыжы нимат ак шалгы, а кӱ Йымын пӧртӹн шӧртньӹжӹ доно цуратла, тӹдӹ цуратлымыжым шоктышашлык”.17Ышдымы дӓ слӧпӧйвлӓ! Мажы когорак: шӧртньӹ ӓли шӧртньӹм святойым ӹштӹшӹ Йымын пӧрт?18Эче тӓ попедӓ: ”Кӱ жертвенник доно цуратла, цуратлымыжы нимат ак шалгы, а кӱ жертвенник вӹлнӹ кишӹ жертва доно цуратла, тӹдӹ цуратлымыжым шоктышашлык”.19Ышдымы дӓ слӧпӧйвлӓ! Мажы когорак: подаркажы ӓли тидӹм святойым ӹштӹшӹ жертвенникшӹ?20Тенгежӹ, жертвенник доно цуратлышы тӹдӹн доно дӓ жертвенник вӹлнӹ ма улы, цилӓ донат цуратла.21Йымын пӧрт доно цуратлышы тӹдӹн доно дӓ тӹштӹ Ӹлӹшӹ доно цуратла.22Пӹлгом доно цуратлышы Йымын престолжы дӓ тӹштӹ Шӹнзӹшӹ доно цуратла.

23Ойхы тӓлӓндӓ, закон тымдышывлӓ дӓ фарисейвлӓ, яжон каяш цацышывлӓ! Тӓ пӱртньӹкӹн, ӓнисӹн дӓ тминӹн лӓктӹш гӹц лу пай гӹц иктӹжӹм Йымылан пуэдӓ, а законыштышы сек керӓлжӹм: пурын суйымым, ӹжӓлӓйӹмӹм, ӹнян ылмым ӧрдӹжеш кодедӓ. Тидӹжӹмӓт ӹштӓш келеш ыльы, весӹжӹмӓт ӧрдӹжеш кодаш ак кел.24Виден каштшы слӧпӧйвлӓ, тӓ кужынерӹм шӹрен кодедӓ, а верблюдым нелӹдӓ!25Ойхы тӓлӓндӓ, закон тымдышы дон фарисейвлӓ, яжон каяш цацышывлӓ! Тӓ карка дон плошкам вӹлец иреэмдедӓ, но кӧргӹштӹ шолыштмаш дӓ алталымаш доно темшӹ ылыт.26Слӧпӧй фарисей! Карка дон плошкан вӹлвӓлӹштӹ ире лижӹ манын, пӹтӓри кӧргӹштӹм итӹрӓйӹ.27Ойхы тӓлӓндӓ, закон тымдышывлӓ дӓ фарисейвлӓ, яжон каяш цацышывлӓ! Тӓ ошемдӹмӹ коропвлӓ гань ылыда: вӹлец анжаш цеверӹн кайыт, кӧргӹштӹ колышывлӓн лулегӹштӹ дӓ шукы йиш йӹрнӹк доно темӹнӹт.28Вӹлец анженжӹ тӓӓт эдем анзылны тӧр ӹштӹшӹлӓ кайыда, а кӧргӹдӓ яжон каяш цацымаш дӓ законым пыдыртымаш доно темӹн.29Ойхы тӓлӓндӓ, закон тымдышывлӓ дӓ фарисейвлӓ, яжон каяш цацышывлӓ! Пророквлӓлӓн итӹрӓ шӹгерӹм йӓмдӹледӓ, тӧр ӹштӹшӹвлӓн памятникӹштӹм яжоэмдедӓ30дӓ попедӓ: ”Мӓ ӓтянӓвлӓ ылмы годым ӹленнӓ ылгецӹ, пророквлӓн вӹрӹштӹм йоктарымашты нӹнӹ доно иквӓреш ана ли ыльы”.31Тенгелӓ, ӹшке ваштарешдӓ ӹшкеок попедӓ: тӓ пророквлӓм пуштшывлӓн эргӹштӹ ылыда.32Ӹнде ӓтявлӓдӓн ӹштӹмӹштӹм шоктыда.

33Кӹшкӹвлӓ, шим кӹшкӹ гӹц шачшывлӓ! Тылан адыш суйымы гӹц кыце ытледӓ?34Теве, Мӹнь тӓ докыда пророквлӓм, ышанвлӓм дӓ тымдышывлӓм колтем, а тӓ иктӹвлӓжӹм пуштыда, пыдален сӓкедӓ, весӹвлӓжӹм синагогвлӓштӹдӓ лыпш доно лыпшаш, хала гӹц халаш поктылаш тӹнгӓлӹдӓ.35Тенге, мӱлӓндӹ вӹлнӹ йоктарымы цилӓ вуйнаматдымы вӹр тӓ вӹкӹдӓ вазеш, тӧр ӹштӹшӹ Авельӹн вӹржӹ гӹц тӹнгӓлӹн, Йымын пӧрт дон жертвенник лошты тӓмдӓн пуштмы Захарийӹн, Варахийӹн эргӹжӹн, вӹржӹ якте.36Тӓлӓндӓ лачок попем: ти шачышлан цилӓ тидӹн верц шамакым кычаш вӓрештеш.

37Иерусалим, Иерусалим, пророквлӓм шин пуштшы, тӹнь докет колтымывлӓ вӹкӹ кӱвлӓм кӹшкен пӹтӓрӹшӹ! Кек ӹшке шылдыржы лӹвӓкӹ игӹвлӓжӹм погымы семӹнь маняр гӓнӓ Мӹнь тӹньӹн тетявлӓэтӹм погынем ыльы, но тӓ тореш линдӓ!38А ӹнде тӓмдӓн пӧртдӓ тӓлӓндӓ охыр кодеш.39Тӓлӓндӓ вет попем: ”Господьын лӹмжӹ доно Толшы хвальымы лижӹ” манмешкӹдӓ, тӓ Мӹньӹм ада уж».


*а 23:5 Филактери – Сирӹмӓш шамакым пиштӹмӹ коропля. Иудей пӱэргӹвлӓ тидӹм лепкӓэш дӓ шалахай кидеш, кӹнервуй гӹц кӱшнӹ, пижӹктенӹт. Тиштӹ закон гӹц шамаквлӓ ылыныт. А ялававлӓжӹ Йымылан айырымым анжыктенӹт, дӓ нӹнӹм вӹлвӓл выргем лыквлӓшкӹ сӓкенӹт. Анжы Числ 15:37-41, Втор 6:6-8.

*б 23:23 Пӱртньӹк – мята.

*в 23:27 Короп – греклӓ тиштӹ «гробница».

*г 23:30 Ӓтявлӓ – ти шамак доно Библиштӹ шӹренок перви ӹлӹшӹ ӓтя-тьотявлӓм анжыктат.

*д 23:39 Пс 117:26.


предыдущая глава Глава 23 следующая глава