Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

АПОКАЛИПСИС

ЭЛИ ИОАННЭНЬ ПАНЖОЗЬ НЕЯВКС

Глава 20

Христосонь Инязорксчись тёжа иень перть

1Сестэ мон неинь менельстэ валгиця ангел, конань кедьсэ ульнесь тоначинь потмакстомо отьманть эйстэ панжома ды кшнинь покш терть.2Сон кундызе инегуенть ды сюлмсизе-тертизе сонзэ тёжа иес. Те инегуесь – кезэрень гуй, лиякс меремс, Идемевсесь эли Сатанась.3Мейле ангелэсь ёртызе инегуенть потмакстомо отьмантень, панжомасо пекстызе отьмань кенкшенть ды путсь лангозонзо пекстамо тешкс: илязо ветне инегуесь манчемас весе раськетнень, зярс а ютыть тёжа иетне. Те шканть ютазь, сонзэ эряви нолдамс олячис, ансяк а куватьс.

4Вана мон неинь инязоронь озамо таркат, конатнес озасть сеть, кинень максозель судямонь-ветямонь кирдемавий. Истя жо мон неинь сетнень оймест, конатнень керсизь пряст Иисусто ёвтнеманть кисэ ды Пазонь валонть пачтямонзо кисэ. Сынь эзть сюконя идем ракшантень эли сонзэ чопачантень ды эзть путо конязост, кедезэст идем ракшанть тешксэнзэ. Ней сынь велявтсть эрямос ды ульнесть инязорокс Христос марто тёжа иеть.5Те васенце вельмема. Кадовикс кулозтне жо эзть велявто эрямос, зярс эзть юта тёжа иетне.6Уцяскавт сетне, кинень максови эрямось васенце вельмема шкане! Сынь, алкукскак, Пазонь ломанть! Сынст лангсо омбоце куломанть виезэ арась. Сынь кармить важодеме Пазонь ды Христосонь попокс ды кармить улеме инязорокс Христос марто вейсэ тёжа иень перть.

Сатанась ули изнязь

7Зярдо прядовить тёжа иетне, Сатананть нолдасызь пекстамо кудостонзо. Сон таго туи манчеме масторлангонь ниле ёнкстнэва эриця раськетнень, конатненень мерить Гог ды Магог. Сон сынст весень пурнасынзе тюремас. Неть ломантнень ламочист прок иневедь чиресэ чувар.8Ды сынь срадыть весе моданть ланга ды эрьва ёндо пирясызь Пазонь ломантнень эрямо-аштема таркаст, лиякс меремс, Пазонь вечкевикс ошонть.9Апак учо менельстэ Пазонть пельде пры тол ды пултасынзе ятонь ушмотнень.10Сестэ Идемевсесь, кона манчесь масторлангонь раськетнень, ули ёртозь кирвитолсо ды палыкандалсо палыця эрькентень, косо идем ракшаськак ды кенгелиця пазмарицяськак. Тосо сынст кармить пиштевтеме чинек-венек ды пингеде пингес.

Пазось суди кулозтнень

11Вана мон неия инязоронь пек покш ашо озамо тарканть ды сонзэ лангсо Озадо аштицянть. Сонзэ вановтонть эйстэ оргодсть ды допрок ёмасть модась ды менелесь.12Мон неинь кулозтнень – инетнень ды вишкинетнень – Пазонть икеле стядо аштицякс. Панжозельть книгат, мейле панжозель эрямо книгаськак. Ды кулозтнень судясть тевест коряс, кода сёрмадозель неть книгатнесэ.13Сестэ иневедесь максынзе эсензэ кулозтнень; Куломась ды Тоначись максызь эсест кулозтнень; ды сынст эйстэ эрьванть судясть тевензэ коряс.14Мейле Куломанть ды Тоначинть ёртызь кирвитолонь эрькентень. Те улияк омбоце куломась.15Кие апак сёрмадоль эрямо книгантень, сень ёртызь кирвитолонь эрькентень.


предыдущая глава Глава 20 следующая глава